1 Piyɛre 4 - Ghena ta Shala

Mpi mɛnɛfɛ nya va ka zele Shala

¹ Nahe Kriste kesahwe yaka mbe geva ta ŋkɛ. Ma gheyɛ perə ne, ve mə ghə te wəsə kwetɛŋe: nahe nde Kriste nya kesa yaka mbe geva ta ŋkɛ kesərəakɛ jaɗafa. Ma kaŋa ŋayɛ ne, nahe zəzə nya kehi kanza kawəsə kempa.

² Ma se tsetsenya ne, mene mə wəsə nya ɗe Shala mbe nza ta ŋayɛ, mba yɛ kemene zəzə ta geva.

³ Kwa nza ŋkɛ ma vəashi ne, wəsə nya zeɗehwe nda ke ka keɗepema Shala yase yɛ kamene, laka nza mbe vale tahe, ɗe ta geva, ghwəyi, ɓerawe, ve nda ghə ke wəshi kesa ba'a hawe va kweci shala, wəsə nya ndiremi kashasha.

⁴ Ma tsetsenya ne, kala meŋele newe ka ɗepema Shala va nya ɗema yɛ kave nda ghə kala hɛ ke dzeghwa kwa ndiremi. Tagha gɛ, kaŋele ŋayɛ hɛ.

⁵ Ama katezhɛne nda ghena hɛ ke Shala nya ɗeke ɗeke kameha ghwə te mbeli nyi teghweme ba'a nyi kempə mpə.

⁶ Vatse gezete nda geva Ghena kwatenca nya ganyɛ ke mbelia kwahɛɗi perə. Nahe ghwə kemehate geva te hɛ kala wəshi nyi menete hɛ, kala mbeli pɛtɛ. Ama tsetsenya, te zlaɓa ta Sefəa Shala ne, wərə hɛ kanza teghweme kala nya nza Shala.

Nza ta mbeli jikə

⁷ Nahe kiɗi ta və kenza takwa takwa. Nza mə kentsehwele ntsehwele ba'a le ntsə kezha səkwə ghə.

⁸ Kaba ne, ɗe mə ghəa ŋayɛ fate fate, kwa nza ŋkɛ ɗe nde dəpə jaɗafa kwele kwele.

⁹ Kemaneve mə mbeli ki ghɛa ŋayɛ kaɗema le ndəghwə ndəghwə.

¹⁰ Mene nda mə slene ke kweci mbeli, kala wəsə nya kemave yayata va Shala. Tsagha ne, katenza yɛ kaka mene slene ganji ta wəshi nyi ve nda Shala keghə keghə ke mbeli.

¹¹ Ma wəndə nya kegeze ghena ne, nza ŋkɛ kande geze ghena ta Shala. Ma wəndə nya kemene slene ne, mene slene ŋkɛ le berete nya ve nda Shala, yitea nza tsahe Shala mbeli mbe pɛtɛa wəshi laka Yɛsə Kriste. Ŋa ŋkɛ nza zləvə ba'a berete kaghala ghala. Amɛn.

Sa yaka tewəmbəreke Kriste

¹² Ka mcɛhɛ ɗa ganji, nzama yɛ heheɓake kenza yɛ mbe ghwə ta yaka, kala wəsə nya temene ŋayɛ geva kwete wəsə meŋele ma.

¹³ Ama zlama mə yitea sa yaka tewəmbəreke Kriste. Tagha gɛ, katezlama yɛ ba'a katenza yɛ fare fare fate fate, vəa ŋkwa nya tencɛ zləvəa ŋkɛ ŋkɛ.

¹⁴ Ma keŋelekɛ ŋayɛ mbeli va nya nza yɛ kaka təkwə təkwə Kriste ne, zlama ya va gheyɛ, kwa nza ŋkɛ kənəa gheyɛ Sefəa Shala nya nza zləvə te.

¹⁵ Mba kwete wəndəa ŋayɛ kesa yaka kala nde pesle ŋkwa, kala ghərə, kala nde mefətekwə keɗema kala nde negha geva kadzehwa ghena ta kweci mbeli.

¹⁶ Ma kenza ŋkɛ va nya nza wəndə kande Kriste sa yaka ŋkɛ ne, zhɛ nda ma hawe ma. Tsa nda hana ŋkɛ ke Shala va nya nza ŋkɛ kande Kriste ɓetəkə.

¹⁷ Kwa nza ŋkɛ nahe vəa gha ta meha ghwə kese, hwa mbelia Shala gha geva ŋkɛ. Ma keghate geva ŋkɛ te gheɓəmə ne, tsema tenza kiɗi ta mbeli nyi keɗema kayɛ Ghena kwatenca nya ganyɛ ta Shala wa?

¹⁸ Kwa nza ŋkɛ ma ke Ghena ta Shala gezete: «Ma kenza nde tekwazhizhi mbele mbeli nyi tiɗiɗi ne, tema tenza ŋkɛ le ka 'yaghwa mehele ba'a ka jaɗafa wa?»

¹⁹ Tsagha ne, ndeke nda mpia nci mbeli nyi kesa yaka kala nya ɗe Shala ke Nde pa ŋkwa nya hi mbeli kave nda ghə, laka mene ganyɛ.