1 Piyɛre 3 - Ghena ta Shala

Nza ta yɛ mi le zhili

¹ Tsagha shɛnyɛ gɛ mi, hawe mə va zhilia ŋayɛ. Ya kweci hwa hɛ ɗema kayɛ ghena ta Shala ne, katenza yɛ va hɛ laka dzeghwa ta ŋayɛ, ya mbeli gezetema ghena.

² Kwa nza ŋkɛ katenewe hɛ tsema tsema nza dzeghwa ta ŋayɛ ganyɛke ba'a le zləvə.

³ Zelema yɛ kanza kendeɗe ndeɗe ŋayɛ kwa ntsə, laka ndere shintia ghə nyi dzawe dzawe, wəshi kepesa geva mze kwa tere tere keɗema lekwesa nyi nza zləvə te hɛ ma.

⁴ Ama zele mə ndeɗe nya kwa wənə, wənə nya kagwedə ba'a nya gweɗakwe ɓetəkə. Nya ya kandeɗe nya nza zləvə te kwa kema ta Shala, kaza sebe te ndeɗea shɛ we.

⁵ Tsetse se mi nyi kevate ghə te Shala vəashi kapesa geva. Nahe hɛ kehawete nda hawe ke zhilia nci.

⁶ Tsetse se Sara kahawe va Abraham, laka heka ŋkɛ kande sleke ŋkɛ. Nahe yɛ kenza kaŋwalea kwɛa nta fate fate kenza yɛ kamene ganyɛ, kaɗema kasərə mehele ta ŋayɛ kadake va kwete wəsə.

⁷ Tsagha shɛnyɛ gɛ zhili, newe mə ghweme te mia ŋayɛ laka nza jikə. Ɗepete mə kaka dewə ŋeli mi. Hawe mə va hɛ, kwa nza ŋkɛ hweŋkwa ya va hɛ kezha kemave mpi nya kaganda nya kese va Shala kala gheyɛ. Mene mə kala nya, yitea ɗema kwete wəsə kafɛa yɛ səkwə ta ŋayɛ.

Sa yaka mbe mene wəsə nya tiɗiɗi

⁸ Ma kakwa keɗaŋe ne, nza mə le zəzə ba'a mehele nya kwetɛŋe. Ɗe mə ghəa ŋayɛ kala ka kesaka ma, nza mə kaka ganjia mehele ba'a kaka shifə ghə kwelɛ ghəa ŋayɛ.

⁹ Wama wəsə nya ndiremi yɛ le wəsə nya ndiremi, keɗema ŋele le ŋele ma. Ama wəpi mə ŋkwa, kwa nza ŋkɛ wəpi yameɗeyi ŋayɛ Shala kwa hekakɛ ŋayɛ ŋkɛ.

¹⁰ Kwa nza ŋkɛ ma ke Ghena ta Shala: «Ma wəndə nya keɗe kafa deme te nza ganyɛ ba'a kanakɛ zeɗe nza ne, nda ŋkɛ kaya ghəa ŋkɛ va ŋwashɛ ŋwashɛ ba'a tseŋwə.

¹¹ Nahe ŋkɛ kehi kazhɛre nda wəmbə ke wəsə nya ndiremi, kamene ganyɛ ba'a kazele kwelɛŋe le hwepe ghə.

¹² Kwa nza ŋkɛ te mbeli nyi tiɗiɗi nza ntsə ta Nde sleke ŋkwa, ɗeke ɗeke kafa səkwə ta nci. Ama kazhɛre nda wəmbə ŋkɛ ke mbeli nyi kemene wəsə kwa ndiremi.»

¹³ Wa nde temene ŋayɛ wəsə kwa ndiremi, kenza ŋkɛ nahe yɛ kehwepete ghə kamene ganyɛ wa?

¹⁴ Ya gheyɛ nza kasa yaka va nya mene wəsə nya tiɗiɗi yɛ ne, zlama ya va gheyɛ. Ghazlənəma yɛ va kweci mbeli ba'a tazema mehele ta ŋayɛ ma.

¹⁵ Ama ɗepete mə kwa wənəa ŋayɛ Kriste ya kaNde sleke ŋayɛ. Nza mə ɗeke ɗeke keveci keveci kampa yitea ghəa ŋayɛ kwa kema ta pɛtɛa mbeli nyi ke'yɛwe ve ghə ta ŋayɛ va gheyɛ.

¹⁶ Ama mene mə le gwedə ba'a hawe, laka mehele nya ganyɛ, yitea zhɛ nda hawe ke mbeli nyi kegeze ghena nyi ndiremi ndiremi te dzeghwa ta ŋayɛ nya ganyɛ mbe Kriste.

¹⁷ Kwa nza ŋkɛ megela ma sa yaka mbe slene ganyɛ, kenza ŋkɛ kaɗe ta Shala ŋkɛ, ke sa yaka mbe mene wəsə kwa ndiremi.

¹⁸ Kwa nza ŋkɛ nahe Kriste le ghəa ŋkɛ kemtenyɛ kwetɛŋe zhigə kezha jaɗafa ta mbeli pɛtɛ. Gheŋkɛ nya kawəndə nya ɗema fete ve ne, nahe ŋkɛ kemte kezha ka beze ghena, yitea beghe ŋayɛ kalə sha Shala. Geva ta ŋkɛ nya kawəndə ŋelɛ yapeslekɛ mbeli, ama nahe Sefəa Shala kezhɛnave nda mpi.

¹⁹ Laka berete ta Sefəa shɛ ne, nahe ŋkɛ kelə kazlapete nda ghena ta Shala ke mbelia kwahɛɗi nyi kwa daŋgayɛ,

²⁰ nyi keɗema keyɛte Shala vəashi, kwa nza Shala kaneghe hɛ ghalanza te və nya baŋete kwambelə Nowɛ. Deke mbeli ɓɛhwɛ, deghese nci ka dzembe kwambelə ba'a ka mbele va yɛmə.

²¹ Nahe yɛməa shɛ kenza kawəsə kencɛ batɛme nya kembele ŋayɛ ŋkɛ tsetsenya. Kenza ŋkɛ kayaɓe nza wale wale nya te geva ŋkɛ we, ama ka'yɛwe mehele ganyɛ va Shala. Kambele ŋayɛ batɛmea shɛ te zlaɓa ta same ta Yɛsə Kriste kwa kwele,

²² nya kedzeme ghweme ba'a nya kentishɛ laka bela kwa zeme ta Shala, nya te ghəa ka ghwene ta Shala, ka sleke ŋkwa ba'a berete nyi pelɛ ghweme.