1 Piyɛre 1 - Ghena ta Shala

Njiŋwe ŋkwa

¹ Se va Piyɛre, nde ghwene ta Yɛsə Kriste, ke mbeli nyi tsehave Shala, nyi kepesleyi geva dzeyi mbe yɛ sla ta hɛɗia Poŋe, mbe Galasi, mbe Kapadose, mbe Azi ba'a mbe Bitini.

² Shala Yita nde tsehave ŋayɛ kala nya zəzəte ŋkɛ kezha nza yɛ kaŋa ŋkɛ, kezha nza yɛ kambeli nyi keveyi geva tekeleke kaŋa ŋkɛ se laka Sefəa ŋkɛ, kezha yɛ nda fete yɛ ke Yɛsə Kriste ba'a kezha zhɛre ŋayɛ mimia ŋkɛ nya keshekeyi geva wɛŋe. Pa zlaɓa ta Shala le kwelɛŋea ŋkɛ nza le gheyɛ kwele kwele.

Ve ghə nya kakaganda

³ Tsahe ɓəmə Shala nya kaYitenyɛa Yɛsə Kriste, Nde sleke ɓəmə. Ma mbe wəba ta ganyɛa ŋkɛ ne, nahe ŋkɛ keyake ɓəmə kakwa bake zhigə laka same ta Yɛsə kwa kwele le mpi hwa mbelia kwahɛɗi. Tsagha ve ghə nya kakaganda ya va gheɓəmə,

⁴ laka neghe wəshi nyi keveyi nda Shala ke mbelia ŋkɛ, wəshi nyi keɗema kaza, nyi ɗema reɗa kadzete, nyi keɗema kazhɛre pa. Shala nde wəmbəyi kaŋa ŋayɛ pelɛ ghweme,

⁵ ke gheyɛ nyi ya berete ta ŋkɛ laka yɛ kezha mbele nya kenza ɗeke ɗeke kancɛ geva te keɗaŋe ta və.

⁶ Zlama mə yitea ghena shɛ, ya gheyɛ nza le kema teheɗe kavə ɓɛhwɛ tsetsenya va mama ta wəshi nyi kedzeghe ŋayɛ.

⁷ Ma nda dzeghe ŋayɛ wəshi nyi kala nyi ne, kezha newe berete ta yɛ ta ŋayɛ. Za ma tenza zləvəa ŋkɛ ke mze kwa tere tere nya dzeghakɛ mbeli kwa ghwə. Kala nyagha tekema tsahe, zləvə kwele yɛ vəa ŋkwa nya tenca Yɛsə Kriste.

⁸ Kaɗe Yɛsə yɛ, ya tsema nakɛma yɛ. Nahe yɛ keyɛhwe, ya tsema nakɛma yɛ zhɛkwa, vatse zlama yɛ kwele kwele kakwa shɛma geze.

⁹ Vatse kemave mbele ta mpia ŋayɛ yɛ kazhɛme ta yɛ ta ŋayɛ.

¹⁰ Kwele kwele se ka mɛ ŋkwa ta Shala kazele hweŋkwa ta mbelea shɛ. Nahe hɛ kegezete ŋayɛ ghena kelɛŋə te zlaɓa nya teve ŋayɛ Shala.

¹¹ Nahe hɛ kentsəte geva kantsate və ba'a mama ta nca nya tenca wəshia shɛhɛ kwa laka Sefəa Kriste nya mbe hɛ ba'a zlape yaka nyi tesa Kriste le zləvə nya tekema ŋkɛ kwa sebe ɓiyitsa.

¹² Nahe Shala kencɛte nda ke ka mɛ ŋkwa kaɗema ghena nya zlape hɛ kenza kezha ghəa nci, ama kezha gheyɛ. Nahe ghena shɛ kegezete ŋayɛ geva tsetsenya laka ka zlape Ghena kwatenca nya ganyɛ, nyi kegezete ghena le berete ta Sefəa Shala nya kesawa pelɛ ghweme. Kamawe ɗepe ta ŋkɛ kwele kwele ka ghwene ta Shala le ghəa nci.

Heka ŋkwa kanza wɛŋe

¹³ Vatse gɛ ne, nza mə ɗeke ɗeke kezha mene slene, kezha nza mehele ta ŋayɛ kefeɗeghe feɗeghe. Veyi mə zəzə ta ŋayɛ te wəsə nya keteve ŋayɛ geva vəa ŋkwa nya tenca Yɛsə Kriste.

¹⁴ Fa nda mə ghena ke Shala, mba yɛ kepele nda ghəa ŋayɛ kesla ntsə kala nya mene yɛ vəashi, te və nya se yɛ kaka ɗepema wəshi.

¹⁵ Ma kala nya nza Shala nya kehekakɛ ŋayɛ tekeleke ne, nza mə kambeli nyi keveyi geva tekeleke mbe dzeghwa ta ŋayɛ pɛtɛ.

¹⁶ Kwa nza ŋkɛ ma ke Ghena ta Shala gezete: «Nza mə kambeli nyi keveyi geva tekeleke kala nya nza 'ya tekeleke.»

¹⁷ Mbe səkwə ghə ta ŋayɛ ne, kaheka Shala yɛ kaYita, nya kemeha ghwə te mbeli kakwa ntama ghala, ama kala wəsə nya menete yayata wəndə. Tsagha gɛ ne, nza mə le hawe va Shala laka ve nda ghə, mba yɛ teke te hɛɗi.

¹⁸ Kwa nza ŋkɛ nahe yɛ keɗepe kaɗema le wəshi nyi ketekiɗi: yɛ mze kwa tɛawetɛa le mze kwa tere tere mbeɗeke ŋayɛ mbeli va mama ta nza kwa ndiremi nya tekeve yɛ yitea ka shihɛ ŋayɛ we,

¹⁹ ama le mimia Yɛsə Kriste nya le zləvə kala ŋa game nya ɗema beze ba'a reɗa te.

²⁰ Nahe Shala kentave Kriste vəashi tewə ghweme ba'a hɛɗi kepate geva, nda ncɛte geva ŋkɛ tsetsenya mbe kwa keɗaŋe ta və kezha gheyɛ.

²¹ Laka gheŋkɛ yɛ Shala nya kekelakame Yɛsə kwa kwele le mpi ba'a nya kevate zləvə te yɛ. Kala nyagha ne, kave yɛ ta ŋayɛ ba'a ve ghə ta ŋayɛ yɛ te Shala.

²² Nahe yɛ keyaɓemte wənəa ŋayɛ kwa nza yɛ kayɛ nda fete ke ghena nya kaganda, kezha ɗe ghəa ŋayɛ yɛ le wənə kwetɛŋe kala ka kesaka ma. Ɗe mə ghəa ŋayɛ le wənə kwetɛŋe kwelɛ ghəa ŋayɛ.

²³ Kwa nza ŋkɛ nahe yɛ kezhɛne kayake geva, kaɗema laka ka yitehɛ nyi ketempə, ama te zlaɓa ta kwete felehwe nya keɗema katedaɗə, te zlaɓa ta ghena ta Shala nya teghweme, nya kenza kaghala ghala.

²⁴ Kwa nza ŋkɛ ma ke mbe Ghena ta Shala: «Nahe pɛtɛa mbeli kenza kala gwəzə, nahe zləvəa nci kenza kala ghwə ta gwəzə. Ma kaghwele gwəzə ne, kabete ghwə ta nci.

²⁵ Ama kaghala ghala nza ghena ta Nde sleke ŋkwa.» Ghena shɛ yagezete ŋayɛ Ghena kwatenca nya ganyɛ.