1 Wəshi nyi Mene Ka Meghe 29 - Ghena ta Shala

Wəshi nyi tsehete mbeli kezha ŋa ta ghɛa Shala

¹ Ma ke meghe David sha mbeli nyi tetsene: «Ma wəzege ta ɗa Salomon nya ntave Shala kwetɛŋe ne, mba ŋkɛ kawəzege, dewə ntsehwele ve. Ndagwara nahe slene nya ketemene geva kenza wəbake. Kwa nza ŋkɛ kenza ŋkɛ kaŋa ghɛ meghe kezha wəndə ŋelɛ we, ama ghɛa Shala Mahwətə.

² Nahe 'ya kehwepete ghə kezha slekete wəshi nyi teŋa ghɛ Shala shɛ mbeli le: yɛ mze kwa tere tere, mze kwa ghwə ghwə, mze kwa tɛawetɛa, lɛ, sheghwə, kezha wəshi mze nyi tevɛsə mbeli le mze nyighɛ. Nahe 'ya ketsenete mama ta pelɛ nyi ghemea ghemea ba'a kweci pelɛ kesleke ŋkwa ganyɛke, le pelɛ kwa ŋkereyi kala mekwəlivə le kweci keghə keghə, le kweci ma ta pelɛ nyi pa mbeli dzawe ba'a kweci teɓehwe.

³ Ɓiyitsa kwa nza nde kwele kwele ɗehwe ghɛa Shala ta ɗa 'ya ne, kave mze kwatera le mze kwa ghwə ghwə nyi kaŋa ɗa 'ya kadzevare nyi tsenete 'ya kezha ŋa ghɛa shɛ.

⁴ Kave mze kwa tere tere ta ka Ofir 'ya kakiləwə 100.000 ba'a kiləwəa mze kwa tɛawetɛa nya ganyɛ 240.000 kezha vɛvɛa kadzevare dewe ta ghɛa Shala.

⁵ Ma tsetsenya ne, wa wəndə nya nza ɗe ve kezha kele mze kwa tere tere keɗema mze kwa tɛawetɛa kase le ɗe ta ŋkɛ kaŋa Mahwətə kezha vɛsə wəshi mze kwa tere tere ba'a ŋa mze kwa tɛawetɛa nyi kehi ka vɛsə mze le hɛ wa?»

⁶ Tagha gɛ, ntake ka meghe nyi mbe yita, le ka meghe nyi mbe hwelefe ta ka Israyɛl, le ka meghea ka sewajɛ nyi te ghəa mbeli slibə le nyi te ghəa mbeli gwəmsə ba'a mbeli nyi te ghəa mbeli nyi mbe wəvəsə nyi kemene nda slene ke meghe kave wəshi gəmə le ɗe ta nci,

⁷ pa hɛ keleke mze kwa tere tere kakiləwə 170.000, dəɓərəa mze kwa tere tere 10.000, mze kwa ghwə ghwə kwele ma ke kiləwə 300.000, mze kwa tɛawetɛa gare kiləwə slibə gwəmsə ŋkwaŋe ba'a kiləwəa lɛ kwele ma ke miliyeŋə mahekene.

⁸ Ma mbeli nyi nza pelɛ nyi nza səkəmə dzawe te va hɛ, kave nda hɛ ke Yɛhiyɛl nya mbe yita ta Gɛrshon kezha mcɛləa ghɛa Shala.

⁹ Pɛtɛ mbeli nyighɛ kave wəsəa nci le ɗe ta wənə kaŋa Mahwətə ba'a kazlama hɛ kwele kwele. Kwele kwele zlama meghe David perə.

Səkwə ghə ta David

¹⁰ Pa David tsate nda hana ke Mahwətə kwa kema ta mbeli nyi tetsene, ma ke: «Hana ŋa na kaŋa keveci keveci Mahwətə, Shala ta shia n'yɛ Zhakob!

¹¹ Mahwətə, ŋa ŋa kwele, le berete le zləvə, le ganyɛ ba'a le meghe! E'e ŋa ŋa wəshi nyi pelɛ ghweme le nyi te hɛɗi pɛtɛ Mahwətə, kwa nza nde gha meghe nya kwele, nya kesleke pɛtɛa wəshi pɛtɛ.

¹² Va gha se mcɛlə le zləvə pɛtɛ, gha nde sleke wəshi pɛtɛ. Va gha nza berete le kwele, mbe dzeve ta ŋa nza berete nya kenza kandeke nda kwele ba'a berete ke wəndə.

¹³ Tsetsenya gɛ Shala ta n'yɛ, katsa ŋa ŋ'wese ghen'yɛ ba'a katsahe sləa ŋa nya nza zləvə te ghen'yɛ kwa cimə.

¹⁴ Kwete 'ya hwa wəsə we, wəsə mbelia ɗa we, se laka ghen'yɛ nda se n'yɛ kakemave berete kafə ŋa wəshi nyi we. Se va gha kemave pɛtɛa wəshi ghen'yɛ pɛtɛ, deke wəshi nyi kese va gha yave ŋa n'yɛ.

¹⁵ Mentiɓə ghen'yɛ kwa kema ta ŋa, kambeli nyi kedzeghwa kala ka shihɛ n'yɛ pɛtɛ. Kala shenaŋkwe nya keza kahe kahe kaɗema mbeli kaveyi zəzə te, nza ta n'yɛ te hɛɗi.

¹⁶ Shala Mahwətə ta n'yɛ, wəshi nyi hite nyi ghen'yɛ kwele kwele kezha ŋa ŋa ghɛ nya lə n'yɛ katsahe sləa ŋa mbe, gha nya kaShala nya kaganda, se va gha se hɛ pɛtɛ.

¹⁷ Shala ta ɗa, nahe 'ya keɗepe kanewe wəsə nya mbe wənə na va mbeli ba'a wəsə nya tiɗiɗi yaɗe na. Ma kaŋa ɗa ne, mbe tiɗiɗi ta wənəa ɗa veyi mcɛləa ɗa 'ya pɛtɛ le ɗe ta wənəa ɗa. Ma tsetsenya tse ne, nahe 'ya kenakɛ mbelia ŋa nyi tetsene teke kamene kala nyagha le zlama.

¹⁸ Mahwətə, Shala ta ka shihɛ n'yɛ Abraham, Izak le Zhakob, ndeke nda ɗe ta wənə nya tiɗiɗi kala nyagha ke mbelia ŋa, zhɛrete wənəa nci kanza dɛŋe dɛŋe laka gha.

¹⁹ Ndeke nda wənə nya kenza tiɗiɗi ke wəzege ta ɗa Salomon kezha yate ghena nyi gezete na ŋkɛ, le wəshi nyi teke nda na ke mbeli, le wəshi mahalegəa ŋa kamene slene le hɛ pɛtɛ kezha ŋate ghɛ nya hite wəshi 'ya pɛtɛ kaŋa ŋkɛ ŋkɛ.»

²⁰ Kwetere wəmbəa ŋkɛ, ma ke David sha mbeli nyi tetsene: «Tsa nda mə hana ke Shala Mahwətə ta ŋayɛ.» Pɛtɛ hɛ katsa nda hana ɓiyitsa ke Mahwətə, Shala ta ka shihɛ nci. Gwəɗəŋə hɛ, cape hɛ ghedəkwə ghə mbe kema ta Mahwətə ba'a mbe kema ta meghe.

Mbeli veyi Salomon kameghe. Mte ta David

²¹ Ma te hendɛ ta ŋkwa, pa hɛ dzeghekɛ nda melɛ kejikə geva le melɛ kwa tere tere ke Mahwətə. Pa dzeghekɛ Shala le sla slibə, slibə game le zhɛgwə timɛti slibə, pa tɛ nyi ve nda mbeli kala nyi kehi. Kwele kwele wəshi melɛ nyi dzeghekɛ mbeli wərə kabehekɛ ka Israyɛl nyi te ŋkwa shɛ pɛtɛ.

²² Ma te vecia shɛ, nahe hɛ kezehwe wəshi kezeme, kasahwe wəshi kese le zlama. Kakwa bake zhigə, pa hɛ ntave Salomon, wəzege ta David kameghe. Pa hɛ fikɛ le n'yi kaveyi kameghea nci yitea slene ta Mahwətə, te ŋkwa shɛnyɛ, pa hɛ veyi Sadok kande dzeghe Shala nya kwele.

²³ Ntishɛ Salomon pelɛ pasla ta Mahwətə kameghe te ŋkwa yitenyɛ David. Mbe kema mbe kema jive ŋkɛ, pɛtɛ ka Israyɛl kafa nda ghena.

²⁴ Pɛtɛ ka meghe, le ka sewajɛ ba'a le kweci ŋwalea David kahawe va kwelea meghe Salomon.

²⁵ Pa Mahwətə mbakete kwelea Salomon kwa kema ta pɛtɛa ka Israyɛl. Pa zhɛrete kameghe nya hawe mbeli ve kwele kwele za ma ke kweci meghe nyi kese pelɛ pasla ta ka Israyɛl mpelɛa ma ke gheŋkɛ.

²⁶ Te ghəa jikə ta ka Israyɛl se David, wəzege ta Zhɛsɛ kameghe.

²⁷ Va wəfaɗemsə menete ŋkɛ te meghe. Mberefaŋe menete va ŋkɛ mbe Hɛbron, mahekenemsə mahekeneghəmbe pelɛ Zhɛrəzalɛm.

²⁸ Mbe meha nya le zeɗe mtenyɛ ŋkɛ kande mcɛlə ba'a le zləvə. Wəzege ta ŋkɛ Salomon nde dzete zhia ŋkɛ.

²⁹ Ma ghena ta meghe David le wəshi nyi menete ŋkɛ se te kwa ghate pa te kwa keɗaŋe ne, te rafe hɛ mbe palepa nya heka mbeli kapalepa ta wəshi nyi menete Saməyɛl nya kande kelɛŋə, mbe nya heka mbeli kapalepa ta wəshi nyi menete nde mɛ ŋkwa Natan ba'a mbe nya heka mbeli kapalepa ta wəshi nyi menete nde mɛ ŋkwa Gad.

³⁰ Ghena ta meghea ŋkɛ, le wəshi meyidala nyi menete ŋkɛ, le kweci wəshi nyi dzawe nyi kese kataze nda mehele, ba'a le ghena nyi kese kamene geva mbe Israyɛl, le kweci hɛɗi ya mbe palepa shɛ.