1 Wəshi nyi Mene Ka Meghe 22 - Ghena ta Shala

¹ Vatse se ŋkɛ kageze: «Teke ghɛa Shala Mahwətə, ba'a wa nya reghwetɛ nya dzeghe melɛa nci ka Israyɛl te nya.»

David kahi ŋa ta ghɛa Shala

² Pa David gezete nda ke mbeli kezha tsene ka se se nyi te hɛɗia ka Israyɛl. Pa ŋkɛ ndeke nda slene ta pelɛ katsehe ke hɛ kezha ŋa ghɛa Shala.

³ Pa David tsenete lɛ kwele kwele perə kezha gezla kwesa ta yɛ gelembe ba'a wəshi kebaŋe wəshi kadzevare ŋkwa. Pa tsenete mze kwa tɛawetɛa kwele kwele kashɛma mbeli ɓelate nza ta ɗaŋeɗa ta nci.

⁴ Tsagha wəba ta sheghwə lekeleke nyi fə nda ka Sidon le ka Tir kwele kwele.

⁵ Ma ke David: «Mba wəzege ta ɗa Salomon kawəzege, dewə ŋeli ŋkɛ. Ndagwara ghɛa teŋa mbeli kaŋa Mahwətə ne, pa mbe yayata meleme hi sləa ŋkɛ kadzemte yitea kwelea ŋkɛ le ganyɛa ŋkɛ. Ma tsetse ŋkɛ, 'ya katesleke nda wəshi keŋa.» Tsetse tseɓate wəshi keŋa ghɛa Shala David kwele kwele nda temte ŋkɛ.

David kageze nda ke Salomon kezha ŋa ghɛa Shala

⁶ Pa David hekate wəzege ta ŋkɛ Salomon kagezete nda kezha ŋa nda ghɛa ŋkɛ ke Mahwətə, Shala ta ka Israyɛl.

⁷ Ma ke shɛ: «Wəzege ta ɗa, mbe zəzə 'ya le ghəa ɗa kezha ŋa nda ghɛ ke Shala Mahwətə ta ɗa.

⁸ Ama ne, nahe Mahwətə kegezete ɗa: Nahe na kempəmte mbeli kwele kwele hwa mpa nyi ghyana ghyana nyi menete na. Kaŋa ɗa ghɛ na kezha tsahe sləa ɗa mbeli mbe we, va nya shekeyi mimia na te hɛɗi kwele kwele kwa kema ta ɗa.

⁹ Ama kateya wəzege nya ketenza kawəndə nya le kwelɛŋe na. Kateve nda kwelɛŋe 'ya va ka jaga ta ŋkɛ nyi dzasle yite. Salomon tenza sləa ŋkɛ, kateve nda kwelɛŋe 'ya le nza gwezlayɛ ke ka Israyɛl mbe vəa ŋkɛ.

¹⁰ Gheŋkɛ nde teŋa ɗa ghɛ. Kawəzege ta ɗa tenza ŋkɛ, kayita tenza 'ya shɛ. Kateve nda berete 'ya ke meghea ŋkɛ kənəa ka Israyɛl kaghala ghala.

¹¹ Ma ke David mbakete: Ma tsetsenya gɛ wəzege ta ɗa, nza Shala Mahwətə ta ŋa le gha kezha ŋ'wete na kaŋate nda ghɛ kala nya gezete ŋkɛ te gha.

¹² Ndeke ŋa ɗepe tseɓa ghena le ntsehwele ŋkɛ keveyi ŋa ŋkɛ kənəa ka Israyɛl, kezha ɗepe yɛ fete na yitea wəshi mahalegəa Shala Mahwətə ta ŋa.

¹³ Ma keyɛte wəshi mahalegə na kamene slene le ghena nyi gezeke nda ŋkɛ laka Moyize ke ka Israyɛl, ma tsagha ne, pɛtɛ tejive wəshi nyi mene na mbe kema mbe kema. Nza le ntsə geva ba'a le berete. Mba na kedake va wəsə ba'a mba na keghazlənə.

¹⁴ Nahe 'ya kebazlakɛ ghə kezha tsene wəshi keŋa ghɛa Mahwətə. Nahe 'ya ketsenete mze kwa tere tere kwele ma ke kiləwə miliyeŋə mahekene ba'a mze kwa tɛawetɛa kakiləwə miliyeŋə mahekenemsə. Ma mze kwa ghwə ghwə ba'a lɛ ne, kadzeghete nza ta nci mbeli va wəba ta nci we. Nahe 'ya kehite yɛ sheghwə ba'a yɛ pelɛ. Wərə na kambake hɛ zhɛkwa.

¹⁵ Kwele kwele tenza ka mene slene va gha le ka tsehe pelɛ, le ka feɗe sheghwə, le kweci mbeli nyi keɗepe kweci slene kamene.

¹⁶ Ma kaŋa yɛ mze kwatera, le mze kwa ghwə ghwə, le mze kwa tɛawetɛa, le lɛ ne, mba te hɛɗi tenza hɛ va gha. Sate te ŋkwa, pa Mahwətə nza le gha.»

¹⁷ Kwetere wəmbəa ŋkɛ, pa David gezete nda ke ka meghe nyi mbe Israyɛl pɛtɛ kezha kemane wəzege ta ŋkɛ Salomon.

¹⁸ Ma ke sha hɛ: «Le gheyɛ Shala Mahwətə ta ŋayɛ, ashɛ tsagha ŋkɛ zəzə 'ya we? Nahe ŋkɛ kendeke ŋayɛ nza kwelɛŋe te yayata bela ta ŋkwa, ghala nya veyi mbeli nyi heca nyi mbe meleme ŋkɛ mbe dzeve ta ɗa. Wa nyi hɛ nyi tsetsenya mbe dzeve ta Mahwətə ba'a mbe ŋa mbelia ŋkɛ.

¹⁹ Ma tsetsenya gɛ, hite mə wənəa ŋayɛ le nza ta ŋayɛ kezha sepa kaɗepete Shala Mahwətə ta ŋayɛ. Sate mə te ŋkwa yitea slene shɛ yɛ ŋate ghɛa Shala Mahwətə. Ma tsagha, wərə yɛ kave səndəkwəa jikə geva ta Mahwətə ba'a wəshi nyi keveyi geva kaŋa Shala ki ghɛ nya teŋa yɛ kezha sləa ŋkɛ.»