1 Wəshi nyi Mene Ka Meghe 16 - Ghena ta Shala

¹ Pa mbeli se kaveyi səndəkwə mbe cɛ lekwesa nya hite David kaŋa ŋkɛ. Kwetere wəmbəa ŋkɛ, pa mbeli dzeghekɛ nda melɛ kwa tere tere ba'a melɛ kejikə ghə ke Shala.

² Ma kwa keɗaŋemte dzeghe melɛ nyighɛ David ne, cape kawəpi mbeli te sləa Mahwətə.

³ Pa nehete nda wəshi kezeme ke ka Israyɛl: yayata za keɗema male keŋ'wete hwa ta ɗafa, zake gatewe nya takɛ mbeli yitea ya ta peha, zake nya takɛ mbeli yita rɛzɛŋe kwa ghwele ghwele.

Ka Lɛvi katsahe Mahwətə kwa cimə

⁴ Pa David veyi kweci ka Lɛvi nyi kemene slene te kema va səndəkwəa Mahwətə kezha mene gəsəkə, katsahe ba'a kahawe va Mahwətə, Shala ta ka Israyɛl.

⁵ Asaf ya te ghəa nci, Zakari sləwəfəa ŋkɛ. Yɛyiyɛl, Shemiramot, Yɛhiyɛl, Matitiya, Ɛliyab, Benaya, Obɛd-Ɛdom le Yɛyiyɛl nde se katsa ŋgwəleŋə getsepele ba'a ŋgwəleŋə. Ma Asaf le ŋa ŋkɛ, ciŋəci yase ŋkɛ kaŋwesa.

⁶ Mba yɛ ka dzeghe Shala Benaya le Yaziyɛl kavɛ veke te kema va səndəkwəa Shala.

⁷ Ma te vecia shɛ, kwa ghate ta David ŋkɛ kageze nda ke yɛ Asaf le kweci ka Lɛvi kezha gha cimə ketsahe Mahwətə.

⁸ Tsahe mə Mahwətə, zlape mə sləa ŋkɛ, Geze mə wəshi ganji nyi menete ŋkɛ pɛtɛ hwa kweci mbeli.

⁹ Gha nda mə cimə, tsahe mə le tsa wəshi, geze mə wəshi ganji nyi menete ŋkɛ pɛtɛ.

¹⁰ Nza mə fare fare te, gheŋkɛ Shala nya kaganda kwetɛŋenyɛ, nza mə le zlama mbe wənəa ŋayɛ, gheyɛ mbeli nyi kezele Mahwətə.

¹¹ Zele mə Mahwətə nde berete, sepa mə keveci keveci yitea nza ŋkɛ hwa gheyɛ.

¹² Zəzəte mə wəshi ganji nyi menete ŋkɛ, zəzəte mə wəshi meŋele nyi menete ŋkɛ ba'a meha ghwə nya kesame kwa mɛa ŋkɛ.

¹³ Gheyɛ hwelefe ta Israyɛl nya kande mene slene ta ŋkɛ, gheyɛ, ŋwalea Zhakob nyi ntave ŋkɛ.

¹⁴ Shala ta ɓəmə ne, gheŋkɛ Mahwətə nya kesleke hɛɗi pɛtɛ.

¹⁵ Zəzəte mə jikə geva ta ŋkɛ kaghala, le ghena ta ŋkɛ kaŋa sebe ta hwelefe slibə keshi keshi.

¹⁶ Gheŋkɛ jikə geva nya menete ŋkɛ le Abraham, le fela nya zemete ŋkɛ kaŋa Izak,

¹⁷ nya zhɛrete ŋkɛ kaghena nya gezeyi nda ŋkɛ kaghala ghala ke Zhakob, ba'a kajikə geva nya kaghala ghala kaŋa Israyɛl

¹⁸ te və nya gezete ŋkɛ: «Kateve ŋa hɛɗia ka Kanan 'ya, kawəsə kezeme ghɛ nya kendeke ŋayɛ geva», a ke.

¹⁹ Kwele kwele se ka shihɛ ŋayɛ we, ɓɛhwɛ se hɛ kaka se se te hɛɗia shɛ.

²⁰ Dzete nya meleme, dzete kwete, dzete nya hɛɗia meghe, dzete ŋa kwete, se hɛ kadzeghwa.

²¹ Ama kese Shala kapele mbeli kezha ɗate hɛ we. Te ghəa nci se ŋkɛ kageze nda ghena ke ka meghe, ma ke:

²² «Yagha yɛ kakwaɗe mbeli nyi ntave 'ya, mba yɛ kemene nda wəsə kwa ndiremi ke ka mɛ ŋkwa ta ɗa!»

²³ Gha nda mə cimə ke Mahwətə gheyɛ mbeli nyi te hɛɗi lema pɛtɛ, geze mə mbele ŋkwa ta Mahwətə keveci keveci.

²⁴ Geze mə zləvəa ŋkɛ ke mbeli pɛtɛ, geze nda mə wəshi ganji nyi menete ŋkɛ ke mbeli pɛtɛ te hɛɗi lema.

²⁵ Va nya nza ŋkɛ wəbake Mahwətə ba'a dayɛ mbeli katsahe. Ghazlənə ma mbeli ve ke kweci shala pɛtɛ.

²⁶ Wəshi gəmə kweci shala nyi va mbeli te hɛɗi pɛtɛ, ama Mahwətə nde pate ghweme.

²⁷ Kaɓele kema ta ŋkɛ va waŋe le kwele, viɗi ŋkwa nya nza ŋkɛ te va berete ba'a va zlama.

²⁸ Gheyɛ mbeli nyi te hɛɗi pɛtɛ, se mə kahawe va Mahwətə, zlape mə zləvəa ŋkɛ ba'a berete ta ŋkɛ.

²⁹ Zlape mə zləvəa sləa ŋkɛ, kele mə wəsə nya ve nda yɛ kase mbe kema ta ŋkɛ. Gwəɗəŋə mə kaŋa ghə mbe kema ta Mahwətə, kwa ncɛ ghəa ŋkɛ ŋkɛ kaShala.

³⁰ Bare bare mə mbe kema ta ŋkɛ, gheyɛ mbeli nyi te hɛɗi lema! Kaganda ne, kanza hɛɗi bereteke, kaŋzla ŋkɛ we.

³¹ Zlama ŋkwa nya pelɛ ghweme, wetse hɛɗi le zlama! Geze nda mbeli ke mbeli pɛtɛ: «Meghe nya kwele Mahwətə!»

³² Gaka ndərə le wəshi nyi kwa pɛtɛ! Nza ŋkwa nya hwa gamba mbe gəsəkə le wəshi nyi mbe pɛtɛ!

³³ Tsa lewela kezlama yɛ wəfe nyi mbe ghɛa wəfe kwa kema ta Mahwətə, kwa nza nde gheŋkɛ kase kezha meha ghwə te hɛɗi.

³⁴ Tsahe mə Mahwətə, kwa nza ŋkɛ ganyɛke ŋkɛ, kakiɗi ɗe ta ŋkɛ we.

³⁵ Geze nda mə: «Shala nya kembele n'yɛ, mbelete n'yɛ, tsenete n'yɛ shɛ na mbelemte n'yɛ va kweci hwelefefia mbeli. Ma tsagha, kwa tsahe ŋa n'yɛ, kateheka sləa ŋa nya wɛŋe ghen'yɛ, katezlama ghen'yɛ kezha tsahe ŋa.»

³⁶ Hana Mahwətə, gha Shala ta ka Israyɛl, se vəashi ba'a pa kaghala ghala. Ma ke pɛtɛa mbeli gezete: «Amɛn! Tsahe mə Mahwətə!»

³⁷ Pa David gezete nda zhɛkwa ke Asaf ba'a ke kweci mbelia ŋkɛ kanza tagha yitea səndəkwəa jikə geva le Mahwətə kezha mene slene ta nci kaɗema slene kaghereŋe kala nya kegezete geva kaŋa keveci keveci.

³⁸ Pa David ntave Obɛd-Ɛdom le kweci ka menəhɛnyɛ kazhili ŋkwaŋemsə degheseghəmbe kaka ya ŋkwa, ba'a yɛ Obɛd-Ɛdom, wəzege ta Yedəwtəwn le Hosa.

³⁹ Pa David dapate nda slene ta cɛ lekwesa ta Mahwətə nya te ŋkwa kesəkwə Shala kwa Gabawon ke nde dzeghe Shala Sadok ba'a ke kweci ka dzeghe Shala nyi kwa yita ta ŋkɛ.

⁴⁰ Tagha dzeghe melɛ kwatera tere hɛ te reghwetɛ ke Mahwətə masheke le tɛhwɛɗi keveci keveci. Pɛtɛa wəshi nyi kerafete geva mbe palepa ta wəshi mahalegə nya gezete nda Mahwətə ke ka Israyɛl.

⁴¹ Zlaɓe se hɛ le yɛ Hɛman, Yedəwtəwn ba'a le kweci zhili ntave mbeli tekeleke kezha tsahe Mahwətə, kwa nza ta ŋkɛ kaghala ghala.

⁴² Te dzeve ta yɛ Hɛman le Yedəwtəwn yɛ veke le ciŋəcia ka tsa wəshi, tsagha kweci wəshi ketsa le nyi vɛ mbeli hwa cimə nyi kaŋa Shala. Ma ŋwale tezhilia Yedəwtəwn ne, kaka ya ŋkwa nya mɛ degha hɛ.

⁴³ Kwetere wəmbəa ŋkɛ, pa yayata wəndə zhɛneghe geva kalə sha ghɛa ŋkɛ. Cape David kalə sha ŋa ŋkɛ ghɛ perə kanjiŋwe mbelia ŋkɛ.