1 Wəshi nyi Mene Ka Meghe 15 - Ghena ta Shala

David kahi geva yitea kele səndəkwə

¹ Nahe David keŋate ghɛ kwele kwele mbe meleme ta ŋkɛ. Pa hite ŋkwa kamenete cɛ lekwesa te kezha nza səndəkwə Shala mbe ba'a pa hite cɛ lekwesa kaŋa ŋkɛ.

² Kwetere wəmbəa ŋkɛ, cape kageze: «Deke ka Lɛvi yanza hweŋkwa va hɛ kezha kele səndəkwəa Shala, kwa nza nde nahe Mahwətə kentave hɛ fəyitekeghə yitea kele ba'a yitea mene slene ta ŋkɛ.»

³ Pa David tsenete pɛtɛa ka Israyɛl pelɛ Zhɛrəzalɛm kezha kele səndəkwəa Mahwətə kadzete ŋkwa nya kehite geva kaŋa ŋkɛ.

⁴ Pa tsenete ka dzeghe Shala nya kaŋwalea Aron le ka Lɛvi.

⁵ Hwa hɛ Əwriyɛl nya kameghe le ka kesaka yitenyɛ gwəmsə ba'a bakemsə kwa yita ta Kɛhat,

⁶ wəndə nya te ghə Asaya le mbelia ŋkɛ gwəmsə bake ba'a bakemsə kwa peləa Merari,

⁷ Zhowɛl nya kawəndə nya te ghə kwa peləa Gɛrshom,

⁸ wəndə nya te ghə Shemaya ba'a kweci mbelia ŋkɛ gwəmsə bake kwa peləa Ɛlisafan,

⁹ wəndə nya te ghə Ɛliyɛl ba'a kweci mbelia ŋkɛ deghesemsə kwa peləa Hɛbron,

¹⁰ wəndə nya te ghə Aminadab ba'a kweci mbeli gwəmsə ba'a meŋe bakeghəmbe kwa peləa Əwziyɛl.

¹¹ Pa David hekate yɛ Sadok le Abiyatar nyi kaka dzeghe Shala ba'a yɛ Əwriyɛl, Asaya, Zhowɛl, Shemaya, Ɛliyɛl le Aminadab nyi kaka Lɛvi.

¹² Ma ke sha hɛ: «Ma gheyɛ mbelia jama nyi te ghəa mbeli kwa yita ta ka Lɛvi ne, zhɛrete mə ghəa ŋayɛ wɛŋe wɛŋe, tsagha mbeli nyi kwa yita ta ŋayɛ nda yɛ kakeleke səndəkwəa Mahwətə, Shala ta ka Israyɛl kezha keleghe kadzete ŋkwa nya hite 'ya kaŋa ŋkɛ.

¹³ Kakwa ghate ne, kenza yɛ teke we, vatse nda se Shala Mahwətə ta ɓəmə kavate ɗa te gheɓəmə pa te mte. Va nya ɗema mə kese ka'yɛwe ghena kala nya kegezete geva.»

¹⁴ Pa ka dzeghe Shala yaɓemte ghəa nci wɛŋe wɛŋe kezha kele səndəkwəa Mahwətə.

¹⁵ Pa ka Lɛvi heyite ghə yitea səndəkwəa Mahwətə kakele te bazla le geta kala ghena nyi gezete nda Moyize ke hɛ se va Mahwətə.

¹⁶ Pa David gezete nda ke ka meghea ka Lɛvi kezha nteyi mbeli kwa yita ta nci kezha gha cimə hɛ katsa wəshi ketsa kala getsepele, ŋgwəleŋə le gwalɛaŋe, ba'a kancɛ zlama ta nci laka ŋgwəleŋə nya dzawe.

¹⁷ Hɛman, wəzege ta Zhowɛl yaveyi mbeli ɓiyitsa te ghəa nci ba'a kwete wəndəa ŋkɛ Asaf, wəzege ta Bɛrɛkiya, tsagha kwete wəndəa nci Ɛtan, wəzege ta Kəwshaya kwa yita ta Merari.

¹⁸ Kadzeyitea hɛ zhɛkwa ne, le kweci mbelia nci shɛ ka Lɛvi, ka ya ghɛ: Zakari, Bɛn, Yaziyɛl, Shemiramot, Yɛhiyɛl, Əwni, Ɛliyab, Benaya, Masɛya, Matitiya, Ɛliflɛhəw, Miknɛya, Obɛd-Ɛdom le Yɛyiyɛl.

¹⁹ Hwa mbeli nyi te ghəa cimə ne, Hɛman, Asaf ba'a Ɛtan ka ŋwesa yɛ ciŋəci mze kwa ghwə nyi kegaka kwele kwele.

²⁰ Zakari, Aziyɛl, Shemiramot, Yɛhiyɛl, Əwni, Ɛliyab, Masɛya ba'a Benaya ka tsa getsepele nyi ketsa geva felɛawe felɛawe.

²¹ Ma yɛ Matitiya, Ɛliflɛhəw, Miknɛya, Obɛd-Ɛdom, Yɛyiyɛl le Azaziya, ŋgwəleŋə nyi kegaka beŋwe beŋwe yatsa hɛ kezha mbake cimə.

²² Ma Kenaniya nya te ghəa ka Lɛvi nyi kekele səndəkwə, kele ta səndəkwəa shɛ yasleke ŋkɛ kwa nza nde nahe ŋkɛ keɗepete nza ta ŋkɛ tiɗiɗi.

²³ Ma yɛ Bɛrɛkiya le Ɛlkana nyi kaka ya degha, dekwede nza hɛ yitea səndəkwəa shɛ,

²⁴ tsagha yɛ Obɛd-Ɛdom le Yɛhiya nyi kaka ya degha perə. Ma yɛ Shebaniya, Yoshafat, Netanɛyɛl, Amasay, Zakari Benaya le Ɛliyɛzɛr nyi kaka dzeghe Shala kwa ŋa nci ne, veke yavɛ hɛ mbe kema ta səndəkwəa Shala.

Dzembe ta səndəkwəa Shala kadzembe Zhɛrəzalɛm

²⁵ Ma mbe zlama ɓiyitsa, cape yɛ David, le mbelia jama ta ka Israyɛl le mbeli nyi te ghəa ka sewajɛ kalə kakele səndəkwəa jikə geva ta Mahwətə ki ghɛa Obɛd-Ɛdom.

²⁶ Yitea kemane ta Shala kakemane ka Lɛvi nyi kekele səndəkwə nyagha, pa mbeli dzeghekɛ nda melɛ le mcɛmcɛli mberefaŋe ba'a game lɛmə mberefaŋe.

²⁷ Karalame pawa nyi slɛahe slɛahe ya kənəa David, tsagha ka Lɛvi nyi kekele səndəkwəa Shala pɛtɛ ɓiyitsa perə. Ka tsa wəshi, le mbeli nyi te ghəa cimə ba'a Kenaniya nya te ghəa mbeli nyi kekele səndəkwə. Nahe David kezhɛne kaseɗete lekwesa pawa ta ka dzeghe Shala.

²⁸ Ka Israyɛl pɛtɛ ka keleghe səndəkwəa Shala kadzeme Zhɛrəzalɛm le tsa kaka, kavɛ yɛ kwelɛghə le veke ba'a kaŋwesa ciŋəci, getsepele le ŋgwəleŋə.

²⁹ Ma te və nya ntsehe səndəkwəa Mahwətə mbe meleme ta David ne, pa Mikal, wəzha ta Sawəl wəmbɛanakɛ ŋkwa dzawa te wəfela, pa nakɛ meghe David kawetse va zlama. Tagha gɛ, pa nde ɗema ghena ta ŋkɛ kwa wənəa nta.