Zhɛrɛmi 9 - Ghena ta Shala

Mbeli nyi kelehwe ŋkwa tseŋwə va hɛ

¹ Ma nda ghwəli ya va 'ya kwamte te ɓerama kala ka dzehwa mte ne, nza nahe 'ya kesərəakɛ mbelia ɗa kalə ɗa cakeɗake. Pɛtɛ hɛ kaka vale tahe, kawəvəsəa ka mbəɗəkwəa kɛfi.

² Ma ke Mahwətə: «Kala rəgi nya tentsə ghɛnia nci. Ma nda nza hɛ kaka sleke hɛɗi ne, kese laka kaganda we, ama laka tseŋwə. Wəshi kwa ndiremi yamene hɛ kadzehwe kadzehwe, ama 'ya, keɗepete ɗa hɛ we.

³ Ntsehwele yayata wəndə yitea mcɛnyɛ! Yagha wəndə teve ghə te wəza meghekɛ, kwa nza ŋkɛ yayata wəza ma kaghwete ŋkwa, kala Zhakob ya tsemanyɛ ŋkɛ. Ya mcɛ ŋa ne, kateŋwashɛ ŋwashɛ ŋayɛ ŋkɛ.

⁴ Yayata wəndə kaghwete nde ghedəkwəa ŋkɛ, wəndə shɛ kageze kaganda we. Nahe hɛ keseneve tseŋwə. Va beze ghena ta nci ne, mba hɛ kazhɛneke geva kase sha 'ya we.

⁵ Wəsə kwa berete ba'a mbəɗəkwə yamene hɛ kadzehwe kadzehwe, kaɗe hɛ kaɗepe ɗa we.» 'Ya Mahwətə nde gezete.

⁶ Vatse gɛ, wa nya ghena nya geze Mahwətə nde berete nya: «Katedzeghe hɛ 'ya kwa ghwə kezha newe nza ta nci. Wa kwete wəsə nya nza 'ya kamenete va fete ta mbelia ɗa?

⁷ Kala have nya nza dala te ghɛnia nci. Tseŋwə yasla mɛa nci. Le mehele geze nda ghena hɛ ke nde ghwəɗəkwəa nci, ama kwa wənəa nci ne, keleŋa yaŋa nda hɛ.»

⁸ Ma ke Mahwətə: «Ashɛ kehi kavate ɗa 'ya te hɛ wəka? Kehi kawate dewa 'ya te mbeli nyi wəka?»

Vəa yɛ nehwene

⁹ Ntake 'ya kanehwene ba'a kaŋgaɗe ghə yitea yɛ ghweme, kanehwene 'ya yitea ŋkwa keya wəshi nyi te hɛɗi. Kwa nza ŋkɛ nahe hɛ keterenji pɛtɛ, wəndə shɛ kezhɛne kadzeghwa te hɛ we. Kezhɛne mbeli kafa nehwene ta wəshi keseɗa te hɛ we. Pɛtɛ yɛ wəshi keseɗa le 'yɛ kezamte geva.

¹⁰ Ma ke Mahwətə: «'Ya katezhɛre Zhɛrəzalɛm kakwəfi, kaŋkwa kewəfərə ta yɛ kelɛ gamba ba'a yɛ meleme ta Zhəwda kaŋkwa nyi dɛrɛŋe rɛŋe kaɗema wəndə kanza mbe.»

¹¹ Ma kenza wəndə nya kentsehwele ntsehwele shɛ, fate ba'a zlape ghena nya gezete nda Mahwətə ŋkɛ. Wa raberə nza hɛɗi nya kebeze beze, ketere tere kala ɓerama nya ɗema mbeli kadzeghwa te wa?

¹² Ma ke Mahwətə zhɛkwa: «Va nya wəfəyite wəshi nyi tekete nda 'ya ke hɛ hɛ, kese hɛ kafa ba'a kazele wəshi nyi gezete nda 'ya ke hɛ we.

¹³ Pa hɛ nzanji dɛŋe dɛŋe te wəshi nyi ɗe ghəa nci, kazele yɛ Ba'al kala nya tekave nda ka shihɛ nci ke hɛ.

¹⁴ Yawa, wa nya ghena nya geze 'ya Mahwətə nde berete, Shala ta ka Israyɛl nya: 'ya kateve nda cɛana kampeɗe ba'a yɛmə nya nza wəsəa kwamasa hwe kasa ke hɛ.

¹⁵ Katetaze hɛ 'ya hwa hwelefefi nyi ɗepema hɛ, ya ka shihɛ nci, katezele 'ya le mpa kezha zamte sebe te hɛ.»

¹⁶ Wa nya ghena nya geze Mahwətə nde berete nya: «Ntsehwele mə, hekake mə mi nyi kenehwene kase! Ghwenakɛ mə ŋkwa kazele ka caŋa caŋa kase!

¹⁷ Se hɛ kahe kahe kanehwene ɓəmə! Sawa nehwene sərəɓə sərəɓə mbe ntsə ta ɓəmə ba'a nza kema ta ɓəmə patsa patsa mbe nehwene!»

¹⁸ Ma ke Zhɛrɛmi: Kafefa nehwene mbeli pelɛ Siyon: «Ayaga! Bətə sebe te ghen'yɛ, wa nya hawe te ghen'yɛ kwa slə n'yɛ ghen'yɛ te hɛɗia n'yɛ gɛ! Nahe mbeli kempəate ghɛa n'yɛ te hɛɗi.»

¹⁹ Gheyɛ mi, fate mə ghena ta Mahwətə, veyite mə sleme yitea ghena nya geze ŋkɛ. Tekete nda mə nehwene ke ŋwalea kwɛa ŋayɛ, tekete nda yayata male ke kwa ghedəkwə nta:

²⁰ «Dzawa yadzawa mte te wəfela ta cɛa ɓəmə, dzeki yadzeki ghɛa ɓəmə nyi ganji ganji ŋkɛ. Ŋwale yafə ŋkɛ dzeyi kwa yɛ hweŋkwa ba'a megelɛgeshi dzeyi te yɛ ŋkwa kebeke.»

²¹ «Gha Zhɛrɛmi, gezete ghena nya geze ŋa nya 'ya Mahwətə zhɛkwa: ‹Selekə lekə mbeli nyi kempə mpə te hɛɗi kala dədə nyi te wəve, kala yɛ ghəa ha nyi mba dzeyi te sebe va ka cɛsle ha, kaɗema wəndə shɛ kafə hɛ we.›»

Ɗepete Mahwətə ya kantsehwele ganyɛ

²² Wa nya ghena nya geze Mahwətə nya: «Mba nde ntsehwele ntsehwele kefege le ntsehwelea ŋkɛ! Mba wəndə nya nza berete ve kemene fege le berete ta ŋkɛ! Mba nde mcɛlə kemene fege le mcɛləa ŋkɛ!

²³ Ma keɗe wəndə kamene fege ne, mene fege ŋkɛ laka ɗepe nya ɗepe ɗa ŋkɛ, kwa nza ŋkɛ 'ya Mahwətə, slene yamene 'ya kezha ve ganyɛ, nza tiɗiɗi ba'a kaganda te hɛɗi. Wəshi nyi kala nyi yaɗe 'ya», wa'a ke Mahwətə.

Ke mbeli keslamte mɓɛta ta geva nahe

²⁴ Ma ke Mahwətə: «Katese kwete hɛ nya teve ɗa 'ya te mbeli nyi keslamte mɓɛta ta geva:

²⁵ ka Ɛzhipte, ka Zhəwda, ka Ɛdom, ka Amon, ka Mowab ba'a ka ŋsə ŋsəa balɛaha nyi te ɓerama. Kwa nza ŋkɛ ne, nahe pɛtɛa hwelefefia shɛhɛ kenza kaka slamtema mɓɛta ganji ba'a nahe ka Israyɛl kenza kaka slamtema mɓɛta kwa wənəa nci.»