Zhɛrɛmi 24 - Ghena ta Shala

Kwaciga ta ya ta dasekwa bake

¹ Pa Mahwətə ncɛte ɗa kwaciga ta ya ta dasekwa bake nyi keveyi geva kwa kema ta ghɛa Mahwətə, kwa sebe ta nya fəhwe Yekoniya, wəzege ta Zhowakim, meghea ka Zhəwda, mbelia jama nyi mbe Zhəwda, ka ɗepe mene wəshi ba'a ka caŋa caŋa Nabəkodonozor, meghea ka Babilone shave mbe Zhɛrəzalɛm kajive Babilone.

² Ma kwa ghate ta kwaciga ne, ya ta dasekwa nyi ganji ganji ya kwa, kala ka ghate ta ya nyi ndake mbeli. Ma kwa bake ta kwaciga ne, kazhi kazhi ya nyi kwa, kashɛ mbeli zeme we.

³ Ntake Mahwətə ka'yɛwe va 'ya: «Wa yanewe na wa Zhɛrɛmi?» Ma 'ya zhɛnete: «Ya ta dasekwa: keganji ganjinji kweci, kazhi kazhi kweci kashɛma mbeli zeme.»

⁴ Tagha, ma ke Mahwətə sha 'ya:

⁵ «Wa nya ghena nya geze 'ya Shala Mahwətə ta ka Israyɛl nya: Kala nya mawe ya ta dasekwa ganji mbeli ne, tsagha mawe ka Zhəwda nyi fəhwe nyi mbeli 'ya, nyi ŋkamte nyi 'ya se teke kajive Babilone.

⁶ Katenewe ghweme 'ya te hɛ ba'a katezhɛneke hɛ 'ya kadzete hɛɗi nya. Kazhɛne 'ya kaŋzla hɛ we, ama ŋa yateŋa hɛ 'ya, kazhɛne 'ya kanteɗe hɛ we, ama mɓe yatemɓe hɛ 'ya.

⁷ Kateve nda zəzə nya nza hɛ kaɗepete ɗa kaMahwətə 'ya ke hɛ. Katezhɛne geva hɛ kase sha 'ya le wənəa nci pɛtɛ. Kambelia ɗa tenza hɛ, 'ya perə, kaShala ta nci tenza 'ya.

⁸ Ama wa nya ghena nya geze 'ya Mahwətə te ghəa Sɛdɛsiyas meghea ka Zhəwda, mbelia jama ta ŋkɛ, mbeli nyi ketene mbe Zhɛrəzalɛm ba'a mbeli nyi kenzanji mbe Ɛzhipte nya: kala nya temene nda mbeli ke ya ta dasekwa nyi shɛma nyi mbeli zeme temene nda 'ya ke hɛ.

⁹ Ma tsagha, pɛtɛ teghazlənə ŋkwa nyi te hɛɗi lema kenakɛ hɛ hɛ. Te yayata ŋkwa nya tazeyi hɛ 'ya ne, hɛ ya kaghena heca nyi sla mbeli keɗema kaghena keyiɗə ŋkwa, kacimə keŋele ŋkwa keɗema kaghena kebezla ŋkwa.

¹⁰ Kateghwene yɛ mpa, ma ba'a ba 'ya kadzehwa hɛ, pa te və nya tezamte geva sebe te hɛ te hɛɗi nya ndeke nda nya 'ya ke hɛ le ka shihɛ nci.»