Zhɛrɛmi 16 - Ghena ta Shala

Nza ta Zhɛrɛmi kwetɛŋenyɛ

¹ Ma ke ghena ta Mahwətə sha 'ya:

² «Mba na kewəme male kezha ya ŋwale tezhili le ŋwalea kwɛ te hɛɗi nya.

³ Kwa nza ŋkɛ ne, wa nya ghena nya geze 'ya Mahwətə nya te ghəa ŋwale tezhili le ŋwalea kwɛ nyi keteya te hɛɗi nya ba'a te ghəa ka yitehɛ nci le yɛ megheyɛa nci:

⁴ katempə hɛ va zereghwe nyi dzawe, wəndə shɛ katenehwene hɛ keɗema katela hɛ we, ama kala dədə te wəve tenza hɛ. Katempə hɛ va yɛ kafayɛ le ma, kawəshi kezeme ta yɛ zleŋa ba'a yɛ kelɛ gamba tenza mbeli nyi kempə mpəa nci.»

⁵ Ma ke Mahwətə sha 'ya zhɛkwa: «Mba na kedzeki ghɛ nya nza nehwene ki, mba na kedzehwa sla shiŋəli, ləma na kanjiŋwe ŋkwa va mte ma, kwa nza ŋkɛ nahe 'ya kekelemte kwelɛŋea ɗa, ganyɛa ɗa ba'a zhɛ helia ɗa shave hwa mbeli nyi.

⁶ Te hɛɗi nya ne, selekə lekə tempə ka mcɛləa kɛfi le ka titikwəa kɛfi kateɗema wəndə shɛ kala hɛ, kanehwene yitea hɛ keɗema kaperawe geva ba'a kaŋsə ghə kwele we.

⁷ Wəndə shɛ kateta nda wəsə kezeme ke wəndə nya mte wəndə ve kezha gweɗakwe nda wənə we, wəndə shɛ katesa nda yɛmə nehwene ke wəndə nya mte yitenyɛ keɗema meghekɛ we.

⁸ Dzekima ghɛ nya takɛ gəsəkə mbeli ki na ma. Ntishɛma na hwa mbeli kazeme wəshi ba'a kasa wəshi ma.

⁹ Kwa nza ŋkɛ wa nya ghena nya geze 'ya Mahwətə nde berete, Shala ta ka Israyɛl nya: ‹'Ya katefɛamte zlewezla nyi hwa gəsəkə, yɛ cimə zlama, yɛ ciməa zhilia makwashi ba'a yɛ ciməa makwashi. Mba yɛ teghweme ba'a kwa ntsə ta ŋayɛ temene geva ŋkɛ.›

¹⁰ Ma kegezete nda ghena nya na ke mbelia shɛhɛ, ya kwete kate'yɛwe hɛ va gha: ‹Tewəmbəreke wa keleke ɓəmə ndiremi nya wəba nya Mahwətə wa? Wa ghena nya bezemte nda mə wa? Wa fete nya menete nda gheɓəmə ke Shala Mahwətə ta ɓəmə wa?›

¹¹ Ma tezhɛne nda na ke hɛ gɛ: ‹Wa nya ghena nya geze Mahwətə nya: Va nya wəfəyite ɗa ka shihɛ ŋayɛ kalənji yitea kweci shala kezha hawe va hɛ ba'a kezha gwəɗəŋə kwa kema ta nci. Nahe hɛ kewəfəyite ɗa, kese hɛ kave wəshi nyi tekete nda 'ya ke hɛ yitea ghə we.

¹² Ma gheyɛ le ŋa ŋayɛ ne, za ma yɛ mene wəshi nyi ndiremi ndiremi ke ka shihɛ ŋayɛ. Yayata wəndəa ŋayɛ kantsə geva mbe ntɛaŋentɛa ghəa ŋkɛ, kaɗema kafa ghena ta ɗa.

¹³ Vatse teŋkamte ŋayɛ 'ya se te hɛɗi nya kadzete kwete nya ɗepetema yɛ ba'a nya ɗepetema ka shihɛ ŋayɛ. Tagha tehawe yɛ va kweci shala veci le viɗi, kwa nza ŋkɛ ne, mba 'ya kamene ŋayɛ ganyɛ ɗa ya tsemanyɛ ŋkɛ we.›»

Zhɛne geva nya wəba kase

¹⁴ Ma ke Mahwətə: «Ma vəashi ne, ‹Le Mahwətə nya kefəakave ka Israyɛl shave mbe Ɛzhipte›, ke mbeli sha zeme fela. Ma gɛ ne, katese kwete və nya tegeze mbeli:

¹⁵ ‹Le Mahwətə nya kefəakave ka Israyɛl shave mbe hɛɗi nya laka bela kwa gwela ba'a shave mbe kweci hɛɗi nyi tetazeyi geva hɛ.› Kaganda tezhɛne hɛ 'ya kase kadzete hɛɗi nya ndeke nda 'ya ke ka shihɛ nci.»

Kambele kwete hwa ka beze ghena we

¹⁶ Ma ke Mahwətə: «Kwele kwele teghwene ka kese mbeli kala kelepe 'ya kase kakese hɛ, kwa sebe ta ŋkɛ, kateghwene ka zlɛaŋezlɛa kwele kwele kase kahe hɛ se te yayata ŋkwa, hwa yɛ ghweme, pelɛ yɛ wəmbəa ŋkwa, pa kwa yɛ zlera.

¹⁷ Kwa nza ŋkɛ te yɛ dzeghwa ta nci ntsə ta ɗa, kawəfərənji hɛ va 'ya we, darahwe beze ghena ta nci kwa ntsə ta ɗa.

¹⁸ Pɛtɛ teŋki nda zhɛme nya mbe beze ghena ta nci nyi bake nyi 'ya ke hɛ, va nya zhɛrete hɛɗia ɗa hɛ wale wale le wəshi kwadanjia nci. Nahe hɛ keviɗikɛ hɛɗia ɗa le yɛ shala tseŋwəa nci.»

Pɛtɛ mbeli kateɗepete Shala nya kaganda

¹⁹ Mahwətə, gha ya kaberete ta ɗa, kande ya ɗa ba'a kaŋkwa kewəfərə ta ɗa mbe vəa yaka. Sha gha tese kweci hwelefefi te ŋkwa nyi zhigə hɛɗi. Ma tegeze hɛ: «Kekemave hweŋkwa kezele Shala ganyɛ ka shihɛ n'yɛ we, wəshi kwadanji nyi keɗema kaketekɛ ŋkwa shala shɛhɛ.

²⁰ Wərə wəndə ŋelɛ nya keɗema kashala kamenete nda yɛ shala ke ghəa ŋka na?»

²¹ Ma ke Mahwətə: «Ma tsetsenya gɛ, 'ya katencɛ nda yɛ wəba ta ɗa le berete ta ɗa ke hɛ. Ma tsagha, kateɗepete sləa ɗa hɛ kaMahwətə.»