Zhake 1 - Ghena ta Shala

Njiŋwe ŋkwa

¹ Se va Zhake, wəndə nya kemene nda slene ke Shala ba'a ke Nde sleke ŋkwa Yɛsə Kriste. 'Ya kanjiŋwe jikə ta mbelia Shala nyi ketaze taze te hɛɗi lema.

Yɛ ba'a ntsehwele

² Ka kesaka ma, ma kenza mama ta wəshi kadzeghe ŋayɛ ne, nza mə le zlama.

³ Nahe yɛ keɗepe, ma kenza yɛ ta ŋayɛ bereteke mbe wəshi nyi kedzeghe ŋayɛ ne, katezhɛre ŋayɛ hɛ kaka zereghe ghena.

⁴ Ama ntsehwele mə kezha ncɛ geva zereghe ghena ta ŋayɛ fate fate, kezha baŋe yɛ kanza kambeli ganji kaɗema beze te gheyɛ, wəsə shɛ kashaŋe yɛ ve we.

⁵ Ma keɗema ntsehwele shɛ va kwete wəndəa ŋayɛ ne, səkwə ŋkɛ va Shala kezha ve nda ŋkɛ, kwa nza ŋkɛ mbe ve nda Shala ke mbeli pɛtɛ, kaŋka wəndə ŋkɛ te we, le ganyɛ ve nda ŋkɛ ke mbeli.

⁶ Ama pa yɛte nda te'yɛwe ŋkɛ, mba ghəa ŋkɛ kenza bake bake, kwa nza ŋkɛ ma wəndə nya nza ghəa ŋkɛ bake bake ne, kala gaŋkeɓe ta ndərə nya gaŋkeɓe ba'a nya dzəwəvəɗəŋə sefə ŋkɛ.

⁷ Ma wəndə nya kala nya ne, zəzəma ŋkɛ katekemave kwete wəsə ŋkɛ va Nde sleke ŋkwa ma,

⁸ ma kwa nza ghəa ŋkɛ bake bake ne, keveci keveci zhɛre mehele ŋkɛ.

Titikwə ba'a mcɛlə

⁹ Wərə nde Kriste nya kande titikwə kanza fare fare va nya ndeke nda ŋkwa ganyɛ Shala,

¹⁰ tsagha nza nde Kriste kande mcɛlə fare fare, va nya zhɛre ŋkɛ Shala kawəndə nya ɗema zləvə te. Kwa nza ŋkɛ kala ghwə ta wəfe nya hwa gamba teza nde mcɛlə.

¹¹ Ma kwa same veci ne, pa ghyana ta ŋkɛ nya dzawe ghwelemte wəfea shɛ, pa ghwə ta ŋkɛ betenji ba'a pa ndeɗea ŋkɛ zanyɛ. Tsagha teza nde mcɛlə mbe wəshi nyi mene ŋkɛ.

Dzeghe ŋkwa ba'a ghwete ŋkwa

¹² Zlama ya va wəndə nya kenza dɛŋe dɛŋe mbe dzeghe. Ma vəa ŋkwa nya tekiɗimte geva dzeghe nya te ne, katekemave derə meghea hərə ŋkwa ŋkɛ, mpi nya meɗeyi nda Nde sleke ŋkwa ke mbeli nyi keɗe ŋkɛ ŋkɛ.

¹³ Ma keɗe wəndə kamene wəsə kwa ndiremi ne, gezema ŋkɛ: «Shala nde ghwete ɗa», ke ma. Kwa nza ŋkɛ ne, kaɗe Shala kamene wəsə kwa ndiremi ba'a kakese ŋkwa kadzembe wəsə kwa ndiremi we.

¹⁴ Ama mawe kwa ndiremia ŋkɛ nde tsəkwə ba'a nde ghwete yayata wəndə kadzembe wəsə kwa ndiremi.

¹⁵ Ma kwetere wəmbəa ŋkɛ ne, kadzawa hwə mawe kwa ndiremia shɛ kaya jaɗafa. Ma kwa kelenyɛ jaɗafa gɛ, pa ŋkɛ yake mte.

¹⁶ Ka kesaka ma, ghwetema ghəa ŋayɛ yɛ ma.

¹⁷ Ma yayata wəsə ganyɛ nya kemenete ɓəmə geva ba'a yayata wəsə gəmə nya nza zləvə te ne, sawa pelɛ ghweme hɛ, va Shala nya kepate wəshi nyi kewaŋe ŋkwa pelɛ ghweme. Kazhɛre pa Shala we, kagaŋkəɗə ŋkɛ we, ŋkwesle shɛ yite we.

¹⁸ Le ɗe ta ŋkɛ ndeke ɓəmə mpi ŋkɛ laka ghena nya kaganda, kezha nza gheɓəmə te kema ta pɛtɛa wəshi nyi pate ŋkɛ.

Fa ghena ba'a mene slene le

¹⁹ Ka kesaka ma, zəzəte mə ghena nya megela. Ntsə mə geva yitea fa ghena, ama gezema ghena ba'a hwepema wənə yɛ kahe kahe ma.

²⁰ Kwa nza ŋkɛ ma wəndə nya nza wənəa ŋkɛ tehwepe ne, kamenete wəsə tiɗiɗi ŋkɛ kwa ntsə ta Shala we.

²¹ Vatse gɛ, sərəakɛ mə wəshi nyi ndiremi ndiremi le 'yaghwa mehele. Kemaneve mə ghena ta Shala nya mɓeyi ŋkɛ kwa wənəa ŋayɛ le shifə ghə, kwa nza ŋkɛ wərə ghena shɛ kambelete ŋayɛ.

²² Mene mə slene le ghena ta Shala, nzama yɛ kambeli nyi kefa nahe ma, ma kenza ŋkɛ tsagha ne, ghəa ŋayɛ yaghwete yɛ.

²³ Kwa nza ŋkɛ, ma wəndə nya kefate ghena ta Shala nda ɗema ŋkɛ mene wəsə nya gezete ghena shɛ ne, yipə yipə ŋkɛ le wəndə nya kenewe ghəa ŋkɛ kwa deraŋgale, kaneweve nza ta ŋkɛ ŋkɛ kala nya nza ŋkɛ,

²⁴ kanewe ghəa ŋkɛ ŋkɛ, ntəŋə ŋkɛ, kazaghə ŋkɛ tsema tsema nza ta ŋkɛ.

²⁵ Ma wəndə nya keve nda ghə keveci keveci ke wəsə mahalegə nya tiɗiɗi, nya keve nda nza waɗe ke mbeli, nya kenzanyɛ dɛŋe dɛŋe te ne, kazlama ŋkɛ yitea fa wəsə mahalegəa shɛ kezha zaghə kwa sebe we, ama katemene slene ŋkɛ le. Ma wəndəa shɛ ne, kewəpi wəpi tenza ŋkɛ mbe wəshi nyi mene ŋkɛ pɛtɛ.

²⁶ Ma keveyi ghəa ŋkɛ wəndə kande zele Shala nda ɗepema tsefe ghɛnia ŋkɛ ŋkɛ ne, ghəa ŋkɛ yaghwete ŋkɛ, gəmə Shala nya zele ŋkɛ.

²⁷ Ma zele Shala nya kehi sha Shala Yita ne, newe ghweme te ka mezhɛtiti ba'a ka wedidi mbe yaka ta nci, ya ghəa ŋkɛ va devələ geva mbe wəshi nyi te hɛɗi lema.