Slene 19 - Ghena ta Shala

Pol mbe Ɛfɛze

¹ Ma kwa nza Apolos mbe Korɛnte ne, cape Pol jive mbe hɛɗi nya hwa ghweme ba'a ntsehe mbe Ɛfɛze. Pa ŋkɛ ntsate kweci mbeli nyi ketəkwə təkwə mbagha,

² ma ke 'yɛwete ghena va hɛ: «Nahe Sefəa Shala kese sha gheyɛ kwa yɛhwe Yɛsə yɛ na?» Ma ke hɛ shɛ: «Kegha ghen'yɛ kafa kenza ŋkɛ Sefəa Shala ya shɛ we.»

³ Ma ke Pol sha hɛ: «Wa sləa batɛme nya menete ŋayɛ mbeli tsagha wa?» Ma ke hɛ: «Batɛmea Zhaŋe.»

⁴ Ma ke Pol sha hɛ: «Ke mbeli nyi keɗe kazhɛre geva kalə sha Shala menete nda batɛme Zhaŋe ba'a nahe ŋkɛ gezete nda ke mbeli kayɛ wəndə nya ketese kwa sebe ta ŋkɛ, geze ta ŋkɛ, Yɛsə.»

⁵ Ma kwa fate ghena shɛhɛ ka Ɛfɛze ne, pa mbeli menete nda batɛme ke hɛ le sləa Nde sleke ŋkwa Yɛsə.

⁶ Pa Pol dapaghe dzeve kənəa hɛ, pa Sefəa Shala se kadzembe hɛ. Ntake hɛ kageze kweci ghena. Kageze ghena kelɛŋəa Shala hɛ.

⁷ Nahe mbelia shɛhɛ hɛ kenza gare meŋe bakeghəmbe pɛtɛa nci.

⁸ Katere mahekene menete Pol kadzembe cɛ kesəkwə ghə keveci keveci. Kageze nda ghena ŋkɛ ke mbeli le hwepe ghə. Ghena ta Meghea Shala yageze nda ŋkɛ ke hɛ ba'a mehele ta nci yakese ŋkɛ.

⁹ Ama ntɛaŋe ntɛaŋe ghəa kweci, kaɗe hɛ kafa we. Kayiɗə hweŋkwa ta Yɛsə hɛ kwa kema ta mbeli. Pa Pol nehemte geva le hɛ, cape ŋkɛ le mbeli nyi ketəkwə təkwə Yɛsə. Keveci keveci geze nda ghena ta Yɛsə ŋkɛ ke hɛ mbe lekweləa Tiranəs.

¹⁰ Bake va ta ŋkɛ kamene kala nyagha ne, pa mbeli nyi te hɛɗia Azi fate ghena ta Nde sleke ŋkwa, ka Zhəwif ba'a kweci hwelefefi.

Ŋwale tezhilia Sɛva

¹¹ Kamene wəshi meŋele nyi dzawe dzawe Shala laka Pol.

¹² Pa le lekwesa ta Pol ba'a wəsə kesehwe hwələa ŋkɛ nyi kekwaɗakɛ geva ta ŋkɛ kele mbeli kakwaɗe ka zereghwe le. Nahe hɛ kenza pələsə va zereghwe ta nci ba'a nahe yɛ 'yi'yɛghwə keslənji shave mbe hɛ perə.

¹³ Pa kweci ka Zhəwif nyi kedzeghwa dzeyi teke dzeyi teke dzeghakɛ le ŋa nci kaŋka 'yi'yɛghwə te sləa Nde sleke ŋkwa Yɛsə perə. Ma ke hɛ sha geze nda ke yɛ 'yi'yɛghwə: «Kageze ŋayɛ 'ya te sləa Yɛsə nya geze Pol kezha shave ŋayɛ yɛ.»

¹⁴ Ma mbeli nyi kemene kala nya ne, ŋwale tezhilia wəndə kwelea ka dzeghe Shala ta ka Zhəwif nya nza sləa ŋkɛ kaSɛva mberefaŋe.

¹⁵ Ama ma ke 'yi'yɛghwə sha hɛ: «Nahe 'ya keɗepe Yɛsə, nahe 'ya keɗepe wəndə nya kaPol, ama gheyɛ ne, ka wa yɛ wa?»

¹⁶ Zhibədikə nde 'yi'yɛghwəa shɛ kənəa hɛ. Pa ŋkɛ ɗate hɛ kwele kwele ba'a berete ma ŋkɛ ke hɛ. Tagha gɛ, pa hɛ hwɛnji shave ki ghɛa wəndəa shɛ mederelaŋe mederelaŋe ba'a bətə mbe zhi.

¹⁷ Pɛtɛa ka Ɛfɛze, ka Zhəwif ba'a kweci hwelefefi kefave wəsə nya kemenete geva shɛ. Kwele kwele zhɛte nda ghazlənə ke hɛ pɛtɛ, yayata wəndə katsahe sləa Nde sleke ŋkwa Yɛsə.

¹⁸ Kwele kwele nyi kezhɛrenji kaka Kriste ba'a nyi kese kampi nda dzeve ke Shala le berete va wəsə kwa ndiremi nya menete hɛ.

¹⁹ Pa kweci mbeli kwele kwele nyi kese kamene ghwɛ fəke yɛ palepa ta nci ba'a teremte hɛ le ghwə kwa kema ta mbeli. Ma kwa ɓelate səkəmə nya te palepa shɛhɛ mbeli ne, nahe mbeli kekemave gare miliyeŋə bakemsə mcɛfe.

²⁰ Wa nya tsetse pesleyi geva ba'a ncɛte geva ghena ta Nde sleke ŋkwa hwa mbeli laka berete ta ŋkɛ.

Gaŋkəɗə geva nya mbe Ɛfɛze

²¹ Ma kwetere wəmbəa ghena nya ne, pa Pol zəzəte kadzeme Zhɛrəzalɛm dzeme laka yɛ Masɛdowane le Akay. Ma ke: «Ma kwa sebe ta ŋkɛ ne, katedzeme 'ya kanewe Rome perə.»

²² Pa ŋkɛ ghweneghe mbeli nyi kekemane ŋkɛ bake kadzeme Masɛdowane, yɛ Timotɛ le Ɛraste, ama mba ŋkɛ te hɛɗia Azi kaba.

²³ Vəa ŋkwa shɛ menete geva gaŋkəɗə geva nya wəba tewəmbəreke hweŋkwa ta Yɛsə.

²⁴ Pa kwete vɛsə mze nya nza sləa ŋkɛ kaDɛmɛtriyəs vɛsəte pa ta yɛ ghɛa Artɛmis, shala nya kamale yitea mze kwa tɛawetɛa. Kwele kwele meleɓe nya ve nda ŋkɛ ke ka mene slenea shɛ.

²⁵ Pa Dɛmɛtriyəs tsenete mbeli nyi kemene slenea shɛ ba'a kweci mbeli nyi kevɛsə mze, ma ke sha hɛ: «Mbelia ɗa yawe, nahe yɛ keɗepe te slene ta ɓəmə se ŋkɛ nda nza wəshi kwele kwele va gheɓəmə tsetsenya.

²⁶ Ama nahe Pol kegezete tsema tsema nza shala nyi vɛsəte mbeli kaɗema kashala. Nahe ŋkɛ kekesehwe mehele ta mbeli kwele kwele, kenza deke teke mbe Ɛfɛze we, ama mbe pɛtɛa sla ta hɛɗia Azi.

²⁷ Deke slene ta ɓəmə nde teza we, ama pa ghɛa Artɛmis, male nya kashala ta ɓəmə nya wəba katekelemte geva zləvə te. Mba mbeli katehawe ve zhɛkwa we, gheŋkɛ nya gwəɗəŋə ka Azi ba'a mbeli nyi te hɛɗi lema mbe kema ta ŋkɛ.»

²⁸ Ma kwa fate ghena shɛ mbeli ne, kazhɛ nda wənəa nci ke hɛ kwele kwele, ma ke hɛ tsate lewela: «Artɛmis nya mbe Ɛfɛze ya kwele!»

²⁹ Pɛtɛ gaŋkəɗə geva shɛ pesleyi geva mbe pɛtɛa meleme, pa hɛ keseve yɛ Gayəs le Aristarke, ka Masɛdowane nyi kebegheghe Pol kwamte dzeghwa ta ŋkɛ. Cape hɛ le hwɛ kalə kadzete ŋkwa kebeke le hɛ.

³⁰ Kaɗe Pol kalə kadzawa kema ta mbeli, pa mbeli nyi ketəkwə təkwə Yɛsə fɛake ŋkɛ.

³¹ Pa kweci ka mene slene nyi jama jama nyi kaka mcɛhɛnyɛa Pol ghweneke nda mɛ kezha fɛa ŋkɛ kelə kadzete ŋkwa kebeke.

³² Ma mbeli nyi ketsenete geva ne, tahe geze ghena hɛ: kwete wəsə yazlape kweci, kwete yazlape kweci. Keɗepe wəsə nya ketsenete hɛ wəba ta nci we.

³³ Pa kweci mbelia nci gezete nda ghena shɛ ke Alɛgezandre nya veyi ka Zhəwif te kema ta nci. Tagha gɛ, pa ŋkɛ gweɗakwete ŋkwa le dzeve kwa ɗe ŋkɛ kageze ghena.

³⁴ Ama kwa ɗepe hɛ kande Zhəwif ŋkɛ ne, ma ke tsate lewela kalerə gare bake: «Artɛmis nya mbe Ɛfɛze ya kwele!»

³⁵ Tekwazhizhi gweɗakwete hɛ kwete wəndə nya kerafe ŋkwa mbe meleme. Ma ke sha hɛ: «Ka Ɛfɛze, nahe pɛtɛa mbeli keɗepe meleme ta ka Ɛfɛze ya kameleme ta Artɛmis nya wəba ba'a pa ta ŋkɛ nya kesawa pelɛ ghweme.

³⁶ Wəndə shɛ kaɗepema ghena shɛ we. Nahe ŋkɛ kehi kanza yɛ gweɗakwe ba'a kazəzə ghena nda temene wəsə yɛ.

³⁷ Pa yɛ fəke mbeli nyi, kese hɛ kabeze ghena sha shala ta ɓəmə we, kese hɛ kaŋele ŋkɛ we.

³⁸ Ma keɗe Dɛmɛtriyəs le mbeli nyi mene slene ŋkɛ le hɛ kakele wəndə kadzete ghwə ne, yɛ ŋkwa kemeha ghwə le ka meha ghwə ya shɛ. Tagha hi hɛ kalə le ghena ta nci.

³⁹ Ma kenza nde kwete ghena ya shɛ nya ɗe yɛ ka'yɛwe ne, mbeli nyi ketsene geva keveci keveci yitea ghena nyi kala nyi ya shɛ. Ghenci ka tefa ghena ta ŋayɛ.

⁴⁰ Ama wəshi nyi menete nyi gheɓəmə ɓeshi, kefate ka meghe ne, kənəa ghəa ɓəmə tenza ghena shɛ, kaka beze ghena tenewe ɓəmə mbeli, wa ke gheɓəmə sha zhɛne wa? Kwa nza ŋkɛ ne, kenakɛ ghena nya ketseneke ɓəmə gheɓəmə teke we.» Ma kwa gezemte ghena shɛ ŋkɛ ne, pa ŋkɛ gezete nda ke mbeli kaslə.