Slene 10 - Ghena ta Shala

Piyɛre ki ghɛa Kornɛy

¹ Kwete wəndə ya shɛ kwa Sɛzarɛ nya nza sləa ŋkɛ kaKornɛy. Nahe ŋkɛ kenza kawəndə nya te ghəa sewajɛa ka Rome gwəmsə nya heka mbelia kawəvəsəa sewajɛa ka Itali.

² Kande zele Shala wəndəa shɛ, kwele kwele hawe ŋkɛ ve, tsagha mbeli nyi ki ghɛa ŋkɛ pɛtɛ. Kwele kwele kemane ka titikwəa kɛfi nyi hwa ka Zhəwif ŋkɛ, te ŋkwa shɛ te ŋkwa shɛ səkwə ghə ŋkɛ.

³ Ma te kwete hɛ, kwa mtsa veci ne, pa ŋkɛ nakɛ nde ghwene ta Shala. Ma kwa dzeki nde ghwenea shɛ shɛ ne, ma ke hekakɛ ŋkɛ: «Kornɛy.»

⁴ Walaŋe ke le ghazlənə, ma ke: «Wa wəsəa shɛ wa, Nde sleke ŋkwa.» Ma ke nde ghwene ta Shala shɛ: «Kezaghəyite səkwə ghə ta ŋa ba'a kemane ta ŋa laka titikwə Shala we, mbe zəzə ŋa ŋkɛ.

⁵ Ma tsetsenya gɛ, ghwene mbeli kadzawa Zhopɛ yitea heka kwete wəndə nya nza sləa ŋkɛ kaSimon, nya hekate nda slə mbeli ɓiyitsa kaPiyɛre.

⁶ Ki ghɛa Simon nde keɓe hweta nya nza ghɛa ŋkɛ mɛa ndərə ŋkɛ.»

⁷ Ma kwa dzeghwanyɛ nde ghwene ta Shala nya kese kageze nda ghena ne, pa Kornɛy hekakɛ mbelia ŋkɛ bake ba'a kwete sewajɛ nya nza ŋkɛ le ghalanza, nya kehawe va Shala kwele kwele.

⁸ Pa ŋkɛ gezete nda wəsə nya kemenete nda geva ke hɛ ba'a ghweneghe hɛ kadzawa Zhopɛ.

⁹ Ma te hendɛ ta ŋkwa kwa hweŋkwa hɛ kalə ba'a kwa nza hɛ takwa takwa yitea Zhopɛ ne, tarame Piyɛre pelɛ dɛɓere nya kənəa ghɛ kezha səkwə ghə, kala wəsə kwa ghə veci.

¹⁰ Pa ma zhɛte nda, kaɗe ŋkɛ kazeme wəsə kezeme. Ma mbe mene nda wəsə kezeme mbeli ne, pa ŋkɛ nakɛ kwete wəsə laka kelɛŋə.

¹¹ Pa ŋkɛ nakɛ ŋkwa kedzeme ghweme kepele pele: kasawa kwete wəsə kala gwada nya wəba nya keseve mbeli te sleme wəfaɗe kadzete hɛɗi.

¹² Ma te gwada shɛ ne, pɛtɛa mama ta wəshi, wəshi nyi kentsehe geva dzate te hɛɗi ba'a 'yɛ nyi kezlə yitea ghweme ya shɛ.

¹³ Ma ke ŋwələ shɛ: «Piyɛre, sate te ŋkwa, henekɛ ba'a zehwe.»

¹⁴ Ma ke Piyɛre zhɛnete: «Ewə, Nde sleke ŋkwa we! Kegha 'ya kazehwe wəsə kezeme nya kefɛake geva keɗema nya wale wale we.»

¹⁵ Ma ke ŋwələ shɛ zhɛkwa: «Ma wəsə nya zhɛrete Shala wɛŋe ne, gezema na kawəsə nya wale wale ŋkɛ ma.»

¹⁶ Mahekene zhigə menete geva ŋkɛ, kwetere wəmbəa ŋkɛ te ŋkwa shɛnyɛ ne, pa wəsəa shɛ keleghe geva kadzeme ghweme.

¹⁷ Keyirə yirə Piyɛre va ghena shɛ, ma ke: «Wa yaɗe wəsə nya nakɛ nya 'ya kancɛ ɗa tse wa?» Ma mbeli nyi ghweneke nyi Kornɛy, pelɛ hɛ kwa degha ka'yɛwe ghɛa Simon vəa ŋkwa shɛ.

¹⁸ Pa hɛ hekakɛ ŋkwa, ma ke hɛ 'yɛwete: «Teke Simon nya heka mbeli kaPiyɛre na?»

¹⁹ Mba Piyɛre kazəzə ghena ta wəsə nya nakɛ nya ŋkɛ laka kelɛŋə shanda, nda gezete ghena nda Sefəa Shala, ma ke shɛ: «Wa nyi mbeli nyi mahekene teke kazele ŋa.

²⁰ Sate ba'a dzawa sha hɛ, kwiɗi le hɛ, mba na kezhɛne ghə, kwa nza ŋkɛ 'ya nde ghweneke hɛ.»

²¹ Pa Piyɛre sawa sha mbelia shɛhɛ, ma ke: «'Ya ya kawəndə nya zele yɛ. Yitea wa se yɛ wa?»

²² Ma ke hɛ shɛ: «Kornɛy, wəndə nya te ghəa ka sewajɛ nde ghweneke n'yɛ. Wəndə nya tiɗiɗi ŋkɛ, kahawe ŋkɛ va Shala. Pɛtɛa ka Zhəwif kaɗe ŋkɛ. Nahe nde ghwene ta Shala kegezete nda kezha heka ŋa yitea fa ghena nya tegeze nda na.»

²³ Pa Piyɛre fəghe hɛ kadzeki ghɛ ba'a ndeke nda ŋkwa kehɛ ke hɛ. Ma masheke ne, cape ŋkɛ le hɛ, pa kweci ka kesaka ma nyi mbe Zhopɛ begheghe ŋkɛ kalə.

²⁴ Ma te kwa bake ta hɛ ne, hwa'a hɛ mbe Sɛzarɛ. Neghe yaneghe hɛ Kornɛy le mbelia ŋkɛ ba'a ka mcɛhɛnyɛ ganji nyi hekakɛ ŋkɛ.

²⁵ Ma vəa ŋkwa nya dzeki Piyɛre ne, kashave Kornɛy kezha begeme le. Pa ŋkɛ gwəɗəŋə kwa kema ta ŋkɛ kezha hawe ve.

²⁶ Pa Piyɛre kesakate ŋkɛ, ma ke shɛ: «Sate, wəndə ŋelɛ 'ya kala gha perə.»

²⁷ Ntake ŋkɛ kageze ghena le Kornɛy, shilimə ŋkɛ ki ghɛ hwa mbeli kwele kwele nyi ketsenete geva.

²⁸ Ma ke sha hɛ: «Nahe yɛ keɗepe mahalegə ŋkɛ sha ka Zhəwif kejikə geva le nde mtake, mahalegə ŋkɛ sha hɛ kedzeki ghɛa ŋkɛ perə. Ama nahe Shala kencɛte ɗa kezha ɗema 'ya kenewe kwete wəndə kala wəndə wale wale keɗema kala wəndə nya kehitema geva.

²⁹ Vatse se 'ya kwa hekakɛ ɗa yɛ, kese 'ya kaghəpə we. Kaɗe 'ya kaɗepe wəsə nya hekakɛ ɗa yɛ yite tsetsenya.»

³⁰ Ma ke Kornɛy: «Hɛ mahekene ɓeshi, kasəkwə ghə 'ya ki ghɛa ɗa kwa mtsa veci ŋkwa. Vəkə kwete wəndə kwa kema ta ɗa le lekwesa nya keslesla.

³¹ Ma ke sha 'ya: Kornɛy, nahe Shala kefate səkwə ghə ta ŋa, kezaghəyite kemane nya kemane ka titikwəa kɛfi na ŋkɛ we.

³² Ghwenakɛ mbeli kadzawa Zhopɛ kaheka Simon nya heka mbeli kaPiyɛre. Ki ghɛa Simon, nde keɓe hweta nya nza ghɛa ŋkɛ mɛa ndərə ŋkɛ.

³³ Te ŋkwa shɛnyɛ ghweneghe mbeli 'ya kaheka ŋa, megela kwa yɛhwe na kase. Tsetsenya teke ghen'yɛ pɛtɛ kwa kema ta Shala kezha fa ghena nyi ghweneke ŋa Nde sleke ŋkwa kageze.»

Piyɛre kageze ghena ta Shala ki ghɛa Kornɛy

³⁴ Tagha gɛ, ntake Piyɛre kageze ghena, ma ke: «Nahe 'ya keɗepe tsetsenya kaɗema Shala kanta ghala kwa mbeli.

³⁵ Nahe yayata wəndə nya mbe yayata hwelefe nya kehawe ve ba'a nya tiɗiɗi kenza zeɗehwe nda.

³⁶ Nahe Shala keghweneke ghena ta ŋkɛ laka ka Israyɛl, gheŋkɛ Ghena kwatenca nya ganyɛ ta ŋkɛ ta kwelɛŋe, nya kese laka Yɛsə Kriste Nde sleke pɛtɛa mbeli nyi te hɛɗi.

³⁷ Nahe yɛ keɗepe wəsə nya kemenete geva te hɛɗia Zhəwdɛ. Nahe ŋkɛ keghate geva te hɛɗia Galilɛ, kwa sebe ta batɛme nya zlapete nda Zhaŋe ke mbeli.

³⁸ Nahe Shala kevaghe berete ta Sefəa ŋkɛ kənəa Yɛsə nde Nazarɛt. Nahe yɛ keɗepe dzeghwa nya dzeghwate Yɛsə te yayata ŋkwa laka mene ganyɛ ba'a laka mbe mbeli nyi mbe dzeve ta gətəli, kwa nza ŋkɛ nahe Shala kenza le Yɛsə.

³⁹ Ghen'yɛ ya kaka negha fete yitea wəshi nyi menete ŋkɛ te hɛɗia ka Zhəwif ba'a mbe Zhɛrəzalɛm. Nahe ka Zhəwif kepeslekɛ ŋkɛ laka baŋe ŋkɛ te sheghwə.

⁴⁰ Gheŋkɛ yakelakame Shala same kwa kwele le mpi te kwa maheke ta hɛ. Pa ŋkɛ ndeke nda berete kencɛ nda ghə ke mbeli.

⁴¹ Ke mbeli pɛtɛ ncɛte nda ghəa ŋkɛ Yɛsə we, ama ke ghen'yɛ nyi kaka negha fete nyi tsehave Shala vəashi, nahe n'yɛ kezehwe ɗafa ba'a kesahwe wəsə kesa le kwetere wəmbəa same ta ŋkɛ kwa kwele.

⁴² Nahe Shala keghwenakɛ n'yɛ kezha zlape nda ke mbeli pɛtɛ ba'a kezha gheŋkɛ ya kawəndə nya veyi Shala kezha meha ghwə te mbeli nyi teghweme ba'a nyi kempə mpə.

⁴³ Nahe pɛtɛa ka mɛ ŋkwa kegezete ghena te ghəa ŋkɛ. Ma ke hɛ: Ma yayata wəndə nya keyɛte ŋkɛ ne, katekelemte geva jaɗafa ta ŋkɛ te wənə.»

Kweci hwelefefi kakemave Sefəa Shala

⁴⁴ Ma vəa ŋkwa nya geze ghena shɛ Piyɛre ne, pa Sefəa Shala sawa kadzeghəa pɛtɛa mbeli nyi kefa ghena shɛ.

⁴⁵ Heheɓake ka Kriste nyi kaka Zhəwif nyi kebeghakɛ Piyɛre, va nya peslaghe geva Sefəa Shala kənəa kweci hwelefefi.

⁴⁶ Nahe hɛ kefa kageze kweci ghena ba'a katsahe kwelea Shala hɛ. Tagha gɛ, ma ke Piyɛre:

⁴⁷ «Wa nde tefɛa ɓəmə kemene nda batɛme ke mbelia shɛhɛ le yɛmə kwa nza ŋkɛ nahe hɛ kemave Sefəa Shala kala gheɓəmə wa?»

⁴⁸ Pa ŋkɛ gezete nda ke mbeli kamene nda batɛme ke hɛ le sləa Yɛsə Kriste. Tagha gɛ, pa hɛ səkwəve Piyɛre kezha hɛakɛ hɛ ŋkɛ le hɛ ɓɛhwɛ.