Palepa ta Rət 4 - Ghena ta Shala

Bowoz kanewe ghweme te sebe ta Ɛlimɛlɛk

¹ Pa Bowoz shavenyɛ pelɛke te ŋkwa nya tsene mbeli kahi ghena mbe meleme kantishɛnyɛ tagha. Pɛkwe kwete wəndə nya gezete ghena ta ŋkɛ Bowoz te ghəa zeme ghɛ se dzeyi tagha, ma ke Bowoz shɛ: «Nde ntishɛ ŋa teke wəza yita.» Pa hendave nda geva ntishɛ ŋkɛ.

² Pa Bowoz hekakɛ zhili meŋe hwa mbelia jama nyi mbe meleme, ma ke: «Ntishɛ ŋayɛ mə teke.» Ntishɛ hɛ.

³ Ma ke sha wəndə nya dekwe ma: «Nahe Nowɛmi nya kesame kwa Mowab kevate pa te wəvea menə ɓə Ɛlimɛlɛk.

⁴ Ma 'ya ne, nahe 'ya kezəzəte kageze ŋa ghena shɛ ba'a kageze ŋa kezha pa wəvea shɛ na kwa kema ta mbelia jama le kweci mbeli nyi teke. Ma kenza nde kaɗe na kambeɗe wəvea shɛ ne, mbeɗeve. Ama keɗema na ne, gezete ɗa, kwa nza ŋkɛ va 'ya nza hweŋkwa kembeɗe kwa sebe ta ŋa.» Ma ke wəndəa shɛ: «Kaɗe 'ya kambeɗe wəvea shɛ.»

⁵ Ma ke Bowoz shɛ: «Ma te veci nya tepa wəvea shɛ na va Nowɛmi ne, pa le Rət kele na, wəzha ta ka Mowab male ta wəndəa ɓəmə nya kemte, kezha wəmbete hwelefe ta wəndəa shɛ.»

⁶ Ma ke wəndə kezeme ghɛ: «Ma nda tsetse ŋkɛ ne, kashɛ 'ya pa we, yagha 'ya kamenete wəsə nya ɗema ŋwalea ɗa kazehwe ghɛ yite. Pahwe, ya 'ya nza kawəndə nya dekwe ma, kapesle 'ya yite we.»

⁷ Pa kwete wəndəa nci seɗave nda tsahwa ta ŋkɛ kwetɛŋe ke Bowoz, kwa nza nde tsagha mene ka Israyɛl kawəsə kencɛ nda ke mbeli nahe na kendeke nda hweŋkwa kepa wəsə keɗema kembeɗe wəsə ke wəndə.

⁸ Ma ke wəndəa shɛ sha Bowoz: «Pave nda ke ghəa ŋa.» Pa ŋkɛ ndeke nda tsahwa ta ŋkɛ.

⁹ Ma ke Bowoz sha mbelia jama le mbeli nyi tagha pɛtɛ: «Gheyɛ ka negha fete ɓeshi. Pɛtɛ pahwe wəshia Ɛlimɛlɛk nyi va Nowɛmi le yɛ ŋa Kiliyon ba'a ŋa Malon 'ya.

¹⁰ Nahe 'ya kekelete Rət kamale ta ɗa, male ta Malon kezha wəmbete hwelefe ta wəndə nya kemte 'ya, yagha sləa ŋkɛ kaza hwa ka menəhɛnyɛ mbe meleme nya. Gheyɛ ka negha fete ɓeshi nya.»

¹¹ Ma ke pɛtɛa mbeli nyi tagha le yɛ mbelia jama zhɛnete: «Ghen'yɛ kanza kaka negha fete. Pa Nde Sleke ŋkwa zhɛrete male nya kedzeki ghɛa ŋa nya kala Rashɛl ba'a kala Lɛa nyi shave hwelefe ta ka Israyɛl mbe hɛ, pa na kanza le berete mbe hwelefe ta Ɛfrata, pa sləa ŋa dzemte mbe meleme ta Bɛtelɛhɛm

¹² Ma wəzege nya teve ŋa Nde Sleke ŋkwa hwa male nya ne, pa ŋkɛ zhɛrete ghɛa ŋa kala ŋa Pɛrɛs nya yake Zhəwda hwa Tamar.»

Bowoz kawəme Rət ba'a ya ta Obɛd, shia David

¹³ Tagha gɛ, pa Bowoz kelete Rət kamale ta ŋkɛ, pa Nde Sleke ŋkwa wəpikɛ, njihe Rət le hwə, pa yake wəzege teza.

¹⁴ Ma ke mi sha Nowɛmi: «Tsa nda ɓəmə hana ke Nde Sleke ŋkwa nya kendeke ŋa wəndə nya kenewe ghweme nya te gha, pa zləvəa sləa shia ŋa dzemte mbe Israyɛl.

¹⁵ Nahe ŋkɛ kegweɗakwete ŋa wənəa ŋa, katetawe ŋa ŋkɛ mbe nza ta ŋa kameha, kwa nza ŋkɛ makwa ta ŋa nya keɗehwe ŋa nde yake ŋkɛ, megela ma ŋa Rət ke ŋwale tezhili mberefaŋe.»

¹⁶ Pa Nowɛmi kelete wəzegea shɛ kaveyi kwa seɗa. Pa zhɛre nda kakwa dəkwə ŋkɛ.

¹⁷ Wəzege nya yake Nowɛmi, ke mi nyi te ghedəkwə sha geze, pa hɛ hekate nda slə kaObɛd. Obɛd se sləa yiteyɛa Zhɛsɛ, yiteyɛa David.

Sləa ka shihɛnyɛa David

¹⁸ Wa nyi sləa ka shihɛnyɛa David se mɛa Pɛrɛs nyi: Pɛrɛs ya kayitenyɛa Hɛsron.

¹⁹ Hɛsron ya kayitenyɛa Ram, Ram ya kayitenyɛa Aminadab,

²⁰ Aminadab ya kayitenyɛa Nashon, Nashon ya kayitenyɛa Salma,

²¹ Salma ya kayitenyɛa Bowoz, Bowoz ya kayitenyɛa Obɛd,

²² Obɛd ya kayitenyɛa Zhɛsɛ, Zhɛsɛ ya kayitenyɛa David.