Nahəwm 1 - Ghena ta Shala

¹ Ghena te ghəa Ninive. Palepa ta wəsə nya nakɛ Nahəwm, nde Ɛlkosh, laka kelɛŋə.

Mahwətə ya kaShala nya dzawe ba'a nya ganyɛ

² Nahe Mahwətə kenza kaShala nya kezlɛ ba'a nya kewa ghena. Nahe Mahwətə kenza kande wa ghena, nahe hwepe wənəa ŋkɛ kenza dzawe. Kawa ghena Mahwətə te ka ghema ta ŋkɛ, kahwepe nda wənə ŋkɛ ke ka jaga ta ŋkɛ.

³ Nahe Mahwətə kenza kande səwə ghena, nahe berete ta ŋkɛ kenza wəbake, ama kave nda ma fete Mahwətə ke nde beze ghena we. Ma vəa ŋkwa nya dzeghwa ŋkɛ ne, kavɛ sefə nya wəba berekə berekə. Nahe yɛ ləmbə kenza kakeləwə nya tələ seɗa ta ŋkɛ.

⁴ Kaŋele ndərə ŋkɛ ba'a kahase ŋkɛ, kashifə pɛtɛa yɛ hələ ŋkɛ. Tagha gɛ, kaghwele gwəzə nyi mbe Bashan ba'a nyi dzeme hwa ghweme ta Karmɛl, katiwɛɗi ghwə ta wəfe nyi mbe Liban.

⁵ Kagaŋkəɗə yɛ ghweme kwa kema ta ŋkɛ, kadase yɛ wəmbə. Kagaŋkəɗə hɛɗi kwa kema ta ŋkɛ, hɛɗi lema ba'a pɛtɛa wəshi nyi te.

⁶ Wa nde nza kasəwəte hwepe wənəa ŋkɛ wa? Wa nde nza kaghereŋe yitea ghweme vəa ŋkwa nya tse hwepe wənəa ŋkɛ wa? Kala tse ta ghwə nya wəba pesle geva ŋkɛ, kapeperawe yɛ gela kwa kema ta ŋkɛ.

⁷ Nahe Mahwətə kenza ganyɛke, nahe ŋkɛ kenza kaŋkwa kewəfərə te vecia ndiremi. Kanewe ghweme ŋkɛ te mbeli nyi nza ŋkɛ kaŋkwa kewəfərə ta nci,

⁸ vəa ŋkwa nya se ndiremi kala ghwa. Ama kaza sebe ŋkɛ te ka ghema ta ŋkɛ ba'a kakeka hɛ ŋkɛ kadzembe ŋkwesle.

Yɛ ghena ke Zhəwda ba'a ke Ninive Ke mbeli nyi te ghə mbe Zhəwda

⁹ Kande wa zhɛrete Mahwətə yɛ wa? Gheŋkɛ ne, kaza sebe ŋkɛ te ka ghema ta ŋayɛ, katezhɛne hɛ kasa ŋayɛ yaka we.

¹⁰ Nahe hɛ kenza kala gezlere nyi tendɛaŋe tendɛaŋe, ghenci nyi kesa wəshi kesa kala ka ghwəyi ghwəyi. Kateteremte geva hɛ hɛmɗɛke ɗɛke kala vegheme nyi keghwele ghwele.

Ke Ninive

¹¹ Ninive, mbe gha shave wəndə nya kezəzə wəsə kwa ndiremi te Mahwətə, wəndə nya kezəzə wəshi nyi ndiremi ndiremi kashasha.

Ke ka Zhəwda

¹² Wa nya ghena nya geze nda Mahwətə ke ka Zhəwda nya: «Ya ka jaga ta ŋayɛ nza kwele kwele ba'a kaka berete berete ne, katempə hɛ ba'a kateza sebe te hɛ. Ma nda kelemte zləvə 'ya te gheyɛ ne, kezha zhɛnema 'ya kakele zləvə te gheyɛ.

¹³ Ma tsetsenya ne, 'ya kaŋsle berete nya kesa ŋayɛ yaka ba'a kapele yɛ zewe lɛa ŋayɛ.»

Ke ka Ninive

¹⁴ Wa nya wəsə nya tarete Mahwətə te ghəa ŋayɛ, gheyɛ ka Ninive nya: «Katezhɛne ŋwale nyi ketekele sləa ŋayɛ kanza va gheyɛ we. Ma mbe ghɛa yɛ shala ta ŋayɛ ne, kateza sebe 'ya te shala nyi menete yɛ yitea sheghwə ba'a yitea mze. 'Ya kahi kwele ta ŋayɛ, kwa nza ŋkɛ zləvə te gheyɛ kwa ntsə ta ɗa we.»