Mishɛ 6 - Ghena ta Shala

Mahwətə te ghwə le mbelia ŋkɛ

¹ Fa mə ghena nya geze Mahwətə: «Sate te ŋkwa kanegha fete kwa kema ta yɛ ghweme, fa ŋwələa ŋa yɛ wəmbə.»

² Fa mə ve nda fete ta Mahwətə ke mbeli, gheyɛ ghweme ba'a gheyɛ shihə nyi keɗema kagaŋkəɗə yitea hɛɗi: wa nya Mahwətə nya kave nda fete ke mbelia ŋkɛ, ghena ya kwelɛ hɛ le ka Israyɛl.

³ Ma ke sha hɛ: «Mbelia ɗa, wa wəsə nya menete ŋayɛ 'ya wa? Laka nyama wəsə leɓekɛ ŋayɛ 'ya wa? Zhɛnete ɗa mə.

⁴ Va nya fəakave ŋayɛ 'ya shave mbe Ɛzhipte na? Va nya mbeɗeke ŋayɛ 'ya shave mbe mava na? Va nya ghweneke Moyize, Aron ba'a Miriyam 'ya kancɛ ŋayɛ hweŋkwa na?

⁵ Mbelia ɗa, zəzəte mə! Ma kwa ɗe Balak, meghea ka Mowab kamene ŋayɛ wəsə kwa ndiremi ne, zəzəte mə ghena nya zhɛnete nda Balam, wəzege ta Bɛyor. Kwa sebe ta ŋkɛ, pa 'ya fəakave ŋayɛ shave mbe Shitim hwa'a mbe Gilgal. Tsagha teɗepete wəshi ganjia ɗa yɛ, 'ya Mahwətə.»

Wəsə nya neghe Mahwətə va mbelia ŋkɛ

⁶ Wa wəsə gəmə nya hi mə kakele kase kenza mə kase kagwəɗəŋə kwa kema ta Shala Mahwətə tehwə ghweme wa? Levea lɛməa sla nyi keva kwetɛŋe yahi mə kakele kamelɛ kwa tere tere na?

⁷ Kagwəmsə kwele kwele teɗe game lɛmə Mahwətə na? N'yi nya kehwɛ kala ghwa na? Ka tezhɛa kɛfia ɓəmə yahi mə kave nda kezha kelemte fama ghena ta ɓəmə ba'a jaɗafa ta ɓəmə ŋkɛ te wənə na?

⁸ Nahe mbeli ketekete ŋayɛ nza tiɗiɗi nya 'yɛwe Mahwətə va mbeli: deke mene wəsə nya tiɗiɗi, ɗe mene wəsə ganyɛ ba'a dzeghwa megela kwa hweŋkwa ta Shala.

Te ghəa ka mene mbəɗəkwə

⁹ Mahwətə kageze nda ghena ke mbeli nyi mbe meleme. Katembele mbeli nyi kehawe ve ŋkɛ. Ma ke sha hɛ: «Fa mə, gheyɛ mbeli nyi mbe hwelefe ta Zhəwda, gheyɛ pɛtɛ nyi ketsenete geva mbe meleme!

¹⁰ Ma ki ghɛa ka 'yaghwa mehele ne, wəshi nyi kefəke geva le mbəɗəkwə ya shɛ, wəshi kedzeghe wəshi tseŋwə yamene slene hɛ le. Nahe ŋkɛ kenza kawəsə kwa ndiremi. Wərə 'ya kazereghehwe wəsə nya na?

¹¹ Kiləwə tseŋwə yamene slene kweci le, wəshi kedzeghe ɗaŋeɗa ta wəsə tseŋwə ya dzeyi kwa behwea nci. Kaka menetema fete teve hɛ 'ya gɛ na?

¹² Ghə yamene ka mcɛləa kɛfi nyi mbe meleme nya le ka titikwəa kɛfi. Ka tseŋwə kɛfi mbeli nyi mbe, kezha ghwete ŋkwa ghwene mɛ hɛ.

¹³ Vatse ghate 'ya kaɗa ŋayɛ, kaza sebe te gheyɛ va jaɗafa ta ŋayɛ.

¹⁴ Katezeme wəshi kezeme yɛ kaɗema kabehe. Katenza ma te gheyɛ. Katewəfərə wəshi kezeme yɛ, ama katewəmbəyi geva hɛ we. Ma kewəfərəakɛ wəsə yɛ ne, katebeze ŋkɛ 'ya le mpa.

¹⁵ Katetsawe wəshi yɛ, ama katemene yɛ se te wəve we. Katehetəsə bekele yɛ, ama katefi n'yia ŋkɛ yɛ we. Kateŋkeɗe rɛzɛŋe yɛ, ama katesa tɛa ŋkɛ yɛ we.

¹⁶ Dzeghwa kwa ndiremia meghe Omri, ŋa wəzege ta ŋkɛ Akab ba'a ŋa mbeli nyi ki ghɛa ŋkɛ yateke yɛ. Dzeghwa ta nci yazele yɛ. Vatse teŋzla meleme ta ŋayɛ 'ya, ma tsagha, kateŋ'wəshi ŋayɛ kweci mbeli. Shewə tenza yɛ va hawe nya te mbelia ɗa.»