Matiye 10 - Ghena ta Shala

Mbeli nyi ketəkwə təkwə Yɛsə meŋe bakeghəmbe

¹ Pa Yɛsə hekakɛ mbeli nyi ketəkwə təkwə meŋe bakeghəmbe, pa ŋkɛ ndeke nda berete ke hɛ kezha ŋka yɛ 'yi'yɛghwə, kezha mbe pɛtɛa ka zereghwe ba'a pɛtɛa mbeli nyi nza beze te hɛ.

² Wa nyi sləa ka ghwene ta Yɛsə Kriste nyi meŋe bakeghəmbe nyi: nde ghate ne, Simon nya heka mbeli kaPiyɛre ba'a wəza meghekɛ Andrɛ, Zhake ba'a wəza meghekɛ Zhaŋe, ŋwalea Zɛbɛdɛ.

³ Filipe ba'a Bartɛlemi, Tomas ba'a Matiye, nde tsehe jaɓeregwale, Zhake, wəzege ta Alfɛ ba'a Tadɛ,

⁴ Simon, nde mpa yitea hɛɗia ŋkɛ le Zhəwdas Iskariyote, wəndə nya ketepamte Yɛsə.

Yɛsə ka ghwene ka təkwə təkwə meŋe bakeghəmbe

⁵ Pa Yɛsə ghwenakɛ mbeli nyi meŋe bakeghəmbe, ma ke gezete ke hɛ: «Mba yɛ kedzembe hɛɗia kweci hwelefefi, mba yɛ kedzembe meleme ta ka Samari.

⁶ Ama megela ma lə yɛ laka timɛti nyi kezanji hwa ka Israyɛl.

⁷ Ma kwa hweŋkwa ne ma pe yɛ sha zlape nda ke mbeli: Takwa takwa Meghe nya pelɛ ghweme yitea gheyɛ.

⁸ Mbe mə mbeli nyi shewə, ve nda mə mpi ke mbeli nyi kempə mpə. Mbe mə ka derena, ŋka mə yɛ 'yi'yɛghwə. Gəmə kemave yɛ, ve nda mə ke mbeli gəmə perə.

⁹ Mba yɛ kekele mze kwa tere tere, mze kwa tɛawetɛa, ya cɛdɛ mze kwa gheme kwa slibəa ŋayɛ,

¹⁰ mba yɛ kekele slibə dɛafea ŋayɛ, mba yɛ kekele lekwesa bake, mba yɛ kekele tsahwa keɗema geta. Kaganda ne, nahe nde mene slene kehi kakemave wəsə kezeme te slene ta ŋkɛ.

¹¹ Ma kelə yɛ kadzembe meleme nya wəba keɗema nya ɓɛhwɛ ne, zele mə wəndə nya ɗeke ɗeke kezha kakemaneve ŋayɛ. Nza mə ki ghɛa ŋkɛ vaŋe te veci nya teslə yɛ te ŋkwa shɛ.

¹² Ma kedzeki ghɛ yɛ ne, ma pe yɛ sha geze: Kwelɛŋe pe yɛ.

¹³ Ma kekemaneve ŋayɛ mbeli ki ghɛa shɛ ne, nza kwelɛŋe nya mawe yɛ kənəa hɛ. Ama keɗema hɛ kekemaneve ŋayɛ, kwiɗi mə, zhɛnehwe mə kwelɛŋea ŋayɛ.

¹⁴ Ma keɗema mbeli nyi ki ghɛ ba'a nyi mbe meleme kekemaneve ŋayɛ ba'a kefate ghena ta ŋayɛ ne, slə ŋayɛ mə te ŋkwa shɛ, bekwemte mə keləwə nya te seɗa ta ŋayɛ.

¹⁵ Kaganda ne, ma 'ya sha gheyɛ: ma vəa ŋkwa nya temeha ghwə Shala te mbeli ne, megela ma tenza ɗa nya te Sodome ba'a Gomore ke ŋa melemea shɛ.

Mɛ nyi teghweze mbeli hwa gheyɛ te kwete veci

¹⁶ Fa mə, 'ya kaghwene ŋayɛ kala timɛti kadzehwa yɛ makwagwele. Nza mə ɗɛŋe ɗɛŋe kala shishi, kagwedə kala gheɗepe.

¹⁷ Ya mə ghəa ŋayɛ va mbeli, katekese ŋayɛ hɛ kakele ŋayɛ kadzete ghwə, kateɗa ŋayɛ hɛ le ghweɗa mbe cɛ kesəkwə ghə ta nci.

¹⁸ Katekele ŋayɛ mbeli kadzawa kema ta ka ŋgwamna le yɛ ka meghea kɛfi tewəmbəreke 'ya, kezha negha fete yɛ yitea 'ya kwa kema ta nci ba'a kwa kema ta kweci hwelefefi.

¹⁹ Ma kefəghe ŋayɛ mbeli kalə kadzete ghwə ne, yirəma yɛ yitea ghena nya tesla yɛ ya nya tegeze yɛ ma. Te ŋkwa shɛnyɛ tedzembe ghəa ŋayɛ ghena nyi hi yɛ kageze.

²⁰ Va gheyɛ tese ghena nya tegeze yɛ we. Sefəa Shala nya kayiteyɛa ŋayɛ nde tegeze ghena mbe gheyɛ.

²¹ Katekese nda wəza meghekɛ heli heli wəndə ke mbeli kezha pesle ŋkɛ mbeli, tsagha temene yita le wəzege ta ŋkɛ perə. Tsagha tezhɛne nda ghə ŋwale ke mbeli nyi keyake hɛ kezha mpə hɛ mbeli.

²² Katezlɛ mbeli pɛtɛ va gheyɛ tewəmbəreke 'ya, ama wəndə nya kehwepete ghə pa te keɗaŋe ta və ne, pələsə tenza ŋkɛ.

²³ Ma kenza mbeli kaghweze mɛ hwa gheyɛ mbe kwete meleme ne, hwɛ ŋayɛ mə kadzembe kwete. Kaganda ne, ma 'ya sha gheyɛ: katedzeghwamte pɛtɛa meleme nyi mbe Israyɛl yɛ nda tese Wəzege ta za we.

²⁴ Wəndə nya ketəkwə təkwə shɛ kwele ma ke Nde sleke ŋkɛ we. Mava shɛ kanza kwele ma ke wəndə nya kesleke ŋkɛ we.

²⁵ Ɗa ma ta wəndə nya ketəkwə təkwə kenza kala Nde sleke ŋkɛ, tsagha mava le wəndə nya kesleke. Ma nahe mbeli kehekate nda sləa Bɛlzɛbəl ke yitenyɛa ghɛ ne, za ma teheka nda slə kwa ndiremi mbeli ke mbeli nyi ki ghɛa ŋkɛ.

Wəndə nya hi mbeli kaghazlənə ve

²⁶ Ghazlənəma yɛ va mbeli ma. Pɛtɛ tencɛ geva wəshi nyi tewəfərə, pɛtɛ tencɛ geva zeweve ta ghena nya ɗema mbeli kancɛ.

²⁷ Ma ghena nyi gezete ŋayɛ 'ya mbe ŋkwesle, ncɛte nda mə pɛtɛ ke mbeli heveci. Ma ghena nya fate yɛ tewəfərə ne, dzeme mə pelɛ dɛɓere nya kənəa cɛ kazlape.

²⁸ Ghazlənəma yɛ va mbeli nyi kempə ŋkwa ma, kapesle hɛ yitea pesle mpi nya mbe gheyɛ we. Ghazlənə mə va Shala ɓetəkə, gheŋkɛ nya kenza kazamte sebe te geva ba'a mpi mbe ghwə nya keɗema kakiɗi.

²⁹ Ashɛ bake nta zaghwala mbeli te dala wəka? Ndagwara kwete wəndəa nci shɛ kateɗe te hɛɗi keɗema Shala keɗete we.

³⁰ Ma gheyɛ le ŋa ŋayɛ ne, pa le pɛtɛa shintia ghəa ŋayɛ keɓelate geva.

³¹ Ghazlənəma yɛ gɛ ma, za ma yɛ ke zaghwala nyi kwele kwele.

Negha fete yitea Yɛsə

³² Ma yayata wəndə nya kegeze nahe ŋkɛ kenza kande təkwə təkwə ɗa kwa kema ta mbeli ne, kateɗepe kwa kema ta Yiteyɛ ɗa nya pelɛ ghweme nahe ŋkɛ kenza kawəndəa ɗa.

³³ Ama yayata wəndə nya keɗepema ɗa kwa kema ta mbeli ne, kateɗepema ŋkɛ 'ya kwa kema ta Yiteyɛ ɗa nya pelɛ ghweme perə.

Yɛhwe mte te ghena ta Yɛsə

³⁴ Zəzəma yɛ kwelɛŋe yakeleke 'ya kadzete hɛɗi ma, kwelɛŋe yakeleke 'ya we, ama mpa.

³⁵ Kwa nza ŋkɛ nahe 'ya kese kezha ve ghema kwelɛ yɛ yita le wəzege, yɛ ma le wəzha ta nta, yɛ meghekɛa za le makwa ta nta perə.

³⁶ Kaka ghema ta wəndə ke ghɛ tenza mbeli nyi ki ghɛa ŋkɛ.

³⁷ Ma wəndə nya keɗe yitenyɛ keɗema meghekɛ za ma ke 'ya ne, kehi ŋkɛ kanza kawəndəa ɗa we. Ma wəndə nya keɗe wəzege ta ŋkɛ keɗema wəzha ta ŋkɛ za ma ke 'ya ne, kehi ŋkɛ kanza kawəndəa ɗa we.

³⁸ Ma wəndə nya keɗema kakele sheghwə kwa zleŋkwa ta ŋkɛ kezha zele ɗa ne, kehi ŋkɛ kanza kawəndəa ɗa we.

³⁹ Ma wəndə nya keɗe kambele mpia ŋkɛ ne, kateza ŋkɛ, ama wəndə nya kezamte mpia ŋkɛ tewəmbəreke 'ya ne, katekemave mpi ŋkɛ.

'Ya yakemaneve wəndə nya kekemaneve ŋayɛ

⁴⁰ Ma wəndə nya kekemaneve ŋayɛ, 'ya yakemaneve ŋkɛ. Ma wəndə nya kekemaneve ɗa ne, nahe ŋkɛ kekemaneve wəndə nya keghweneke ɗa perə.

⁴¹ Ma wəndə nya kekemaneve nde mɛ ŋkwa ta Shala va nya nza ŋkɛ kande mɛ ŋkwa ne, zhɛme ta nde mɛ ŋkwa ta ŋkɛ yatekemave ŋkɛ. Ma wəndə nya kekemaneve wəndə nya tiɗiɗi, zhɛme ta wəndə nya tiɗiɗi yatekemave ŋkɛ.

⁴² Kaganda ne, ma 'ya sha gheyɛ: ma wəndə nya kesame nda yɛmə nya lɛnɛa ke kwete wəndəa ŋwale nyi va nya nza ŋkɛ kande təkwə təkwə ɗa ne, katekemave zhɛme ta ŋkɛ ŋkɛ.»