Ɛzayi 49 - Ghena ta Shala

Israyɛl ya kawaŋe ta kweci hwelefefi

¹ Mbeli nyi dzeyi te yɛmə, fa mə ŋa ɗa, hwelefefi nyi cakeɗa cakeɗa, fa mə: Nahe Mahwətə kehekakɛ ɗa yama ta ɗa, nahe ŋkɛ kehekɛmete sləa ɗa mba 'ya kwa hwə.

² Nahe ŋkɛ keveyi mɛa ɗa kala kafayɛ nya nɛmenɛ, nahe ŋkɛ kewəfərəakɛ ɗa yitea shenaŋkwe ta dzeve ta ŋkɛ. Nahe ŋkɛ kezhɛrete ghena ta ɗa kahave nya lɛmelɛ ba'a nahe ŋkɛ kewəfərəakɛ ɗa kwa gwecɛa ŋkɛ.

³ Ma ke sha 'ya: «Israyɛl, gha ya kande mene slene ta ɗa, katencɛ zləvəa ɗa 'ya laka gha.»

⁴ Ama 'ya ne, ma 'ya gezete: «Gəmə leɓekɛ ghəa ɗa 'ya, gəmə denemte ghəa ɗa 'ya, kaɗema zhɛme mbe.» Ndagwara kateve ɗa nza tiɗiɗi Mahwətə, kawəmbə ɗa zhɛme Shala ta ɗa.

⁵ Tsetsenya ne, kageze ghena Mahwətə, gheŋkɛ nya kepate ɗa kwa hwəa meyɛ ɗa kezha nza 'ya kande mene slene ta ŋkɛ, yitea zhɛne hwelefe ta Zhakob kase shɛ, yitea nza ka Israyɛl rəkwə yitea hwəa ŋkɛ. Nahe zləvə kenza te 'ya kwa kema ta Mahwətə, kwa nza ŋkɛ Shala ta ɗa ya kaberete ta ɗa.

⁶ Ma ke sha 'ya: «Kawəsə nya ɓɛhwɛ ŋkɛ kezha nza na kande mene slene ta ɗa, kezha kese hwelefefia Zhakob sate te ŋkwa ba'a kezha zhɛne ka Israyɛl nyi ketene teghweme kase. Nahe 'ya keveyi ŋa kawaŋe ta kweci hwelefefi yitea ntsehe mbele ta ɗa hwa'a te mendɛkwe ta hɛɗi.»

Zhɛne geva ta ka Israyɛl nyi fəhwe mbeli kase

⁷ Wa nya ghena nya geze nda Mahwətə, nde mbele mbelia ŋkɛ ba'a Shala nya kaganda ta Israyɛl, ke gha, gha nya ɓelama mbeli, gha nya ɗema ntsə ta ŋa mbeli pɛtɛ ba'a gha nya kamava ta ka ghwərə ghwərəa ntsə nya: «Ma te və nya tenakɛ ŋa ka meghea kɛfi ne, kategwəgwə hɛ sate te ŋkwa kentishɛ ta nci, ma te və nya tenakɛ ŋa mbeli nyi te ghə ne, kategwəɗəŋə hɛ kwa kema ta ŋa.» Katemene geva ŋkɛ tewəmbəreke ganyɛa Mahwətə, tewəmbəreke Shala nya kaganda ta Israyɛl nya kentave ŋa.

⁸ Wa nya ghena nya geze Mahwətə nya: «Ma te və nya ganyɛ ne, nahe 'ya kezhɛnete ŋa səkwə ta ŋa, ma te vəa mbele ne, nahe 'ya kekemanakɛ ŋa. Nahe 'ya kewəmbəyi ŋa, laka gha mene jikə geva 'ya le mbeli kezha kele hɛɗia Israyɛl jive te kema ba'a kezha nehe hɛɗi nya kebeze beze nya.

⁹ Ma 'ya sha ka daŋgayɛ, sha mbeli nyi mbe ŋkwesle: ‹Shave mə, dzete mə waŋe.› Tagha gɛ, katenza hɛ kala wəshi keseɗa nyi kezeme gwəzə dzeyi mɛa yɛ hweŋkwa ba'a nyi keŋ'we gwəzə dzeme vare yɛ wəmbə.

¹⁰ Katezhɛne ma ba'a ndere kazhɛ nda ke hɛ we, katezhɛne ghyana ta ndaleghe ba'a ghwə ta veci kasa nda yaka ke hɛ we. Kwa nza ŋkɛ katebeghe hɛ nde zhɛ heli yitea hɛ katefə hɛ ŋkɛ kadzemɛa ɗasle nyi lɛnɛa lɛnɛa.

¹¹ Katezhɛre pɛtɛa yɛ ghweme 'ya kahweŋkwa, katenza yɛ hweŋkwa ta ɗa kedzəgwəɗəmə dzəgwəɗəmənji.

¹² Nyi hɛ nyi kase, cakeɗake se hɛ, laka bela kwa gwela se kweci, laka ŋkwa kepəkwə ta veci se kweci, same kwa Ɛzhipte kweci.»

¹³ Ghweme, mpi dzeve gɛ! Hɛɗi, nza fare fare gɛ! Yɛ ghweme, tsa gaghwe gɛ! Kwa nza ŋkɛ berete yantsə nda Mahwətə ke mbelia ŋkɛ, zhɛ helia ŋkɛ yancɛ nda ŋkɛ ke ka dewə berete.

Mahwətə ya kande mbele mbelia ŋkɛ

¹⁴ Ma ke Siyon sha se kageze: «Nahe Mahwətə kewəfəyite ɗa, nahe Shala ta ɗa kezaghəyite ɗa.»

¹⁵ Ama ma ke Mahwətə zhɛnete: «Kazaghə velɛnjɛa nta male na? Kaɗema wəzege nya yake nde nde na? Ya ghenta nza kazaghəyite ne, katezaghə ŋa 'ya we.

¹⁶ Nahe 'ya kerafeyi sləa ŋa te hwə dzeve ta ɗa, kevə kevə zəzə zlia ŋa nya berete.

¹⁷ Wa nyi ka ŋa ŋa nyi kahwɛ kase, ma ka ŋzlamte ŋa ba'a ka tazemte ŋa ne, kateslənji hɛ cakeɗake yitea gha.

¹⁸ Kafete ghə ba'a newakɛ ŋkwa nya yitea gha: pɛtɛa ŋwalea ŋa katsene geva, se yase hɛ sha gha. Ma 'ya, 'ya Mahwətə nya teghweme: katenza hɛ pɛtɛ sha gha kala wəsə kepesa geva, kala zhɛɗa nya sləyi mbeli kwa wəzha makwa.

¹⁹ Hwa kwəfi na, mbe ghedəkwə nyi keŋzla ŋzla, kaɓerama hɛɗia ŋa. Ama temə vireɗi ne, keɓɛhwɛ tenza ŋkɛ kaŋa mbeli nyi mbe, te və nya teslənji ka ŋzlamte ŋa cakeɗake yitea gha.

²⁰ Kala male jɛŋa se na, ama te kwete hɛ, ma ke ŋwalea ŋa sha tegeze ŋa: Dewə ɗa ŋkwa, hendakɛ geva ɓɛhwɛ kezha nza 'ya ghwəɗə ghwəɗə.

²¹ Tagha gɛ, ma pa na sha tegeze mbe ghəa ŋa: Wa nde yake ɗa ŋwale nyi wa? Kese ŋwale va 'ya we, kajɛŋa se 'ya, nahe mbeli kekesehwe ɗa ba'a keŋkamte ɗa. Wa nde kelete ŋwale nyi wa? Ma te və nya se 'ya kwetɛŋe ɗa ne, tema nzanji ŋwalea shɛhɛ wa?»

²² Wa nya ghena nya geze Shala Mahwətə nya: «'Ya katekafe dzeve laka kweci hwelefefi, 'ya katemɓe drape kezha kweci mbeli. Katefə ŋwale tezhilia ŋa hɛ kase mɛa dzeve ta nci ba'a ŋwalea kwɛa ŋa te paslɛ paslɛa ta nci.

²³ Katekele ŋa ŋwalea ŋa ka meghe, katedəkwə hɛ mia meghe. Kategwəɗəŋə hɛ ntiŋə ghə mbe hɛɗi kwa kema ta ŋa, katenini keləwə nya te seɗa ta ŋa hɛ. Tsagha gɛ, kateɗepete ɗa na 'ya ya kaMahwətə, katenza hawe te mbeli nyi keve ghə te 'ya we.»

²⁴ Kazləgwəhwe wəshi nyi fəke katsala kempa mbeli na? Kambeleke nde daŋgayɛ mbeli va nde ghwərə ghwərəa ntsə na?

²⁵ Ma ke Mahwətə zhɛnete: «Kaganda ne, katefəhwe wəshi nyi fəke katsala kempa mbeli, katembeleke wəndə nya kesehwe nde ghwərə ghwərəa ntsə mbeli. Katempa 'ya le nde mpa le gha ba'a katembele ŋwalea ŋa 'ya.

²⁶ Katezeme nda slia geva ta nci 'ya ke ka sa ŋa yaka, katenza hɛ keghwəyi ghwəyi va mimia nci kala nya ghwəyi mbeli va tɛ nya 'yaghwa. Tagha gɛ, kateɗepe pɛtɛa wəshi nyi nza mpi hwe 'ya ya kaMahwətə nya kembele ŋa, kaShala nde berete ta Zhakob nya kembeɗe ŋa.»