Biblia Todo Logo
Bìoball air-loidhne

- Sanasan -

Ɛzayi 44 - Ghena ta Shala

1 Ma ke Shala: «Ma tsetsenya ne, fa tiɗiɗi, gha hwelefe ta Zhakob, nde mene slene ta ɗa, gha Israyɛl nya ntave 'ya.

2 Wa nya ghena nya geze 'ya Mahwətə nya kepate ŋa, nya kepeyi ŋa kwa hwəa meyɛ ŋa ba'a nya kekemane ŋa nya: Ghazlənəma na ma hwelefe ta Zhakob, nya kande mene slene ta ɗa, gha nya kaIsrayɛl nya ntave 'ya ma.

3 Kwa nza ŋkɛ ne, 'ya kateɓasle yɛmə te hɛɗi nya ɗema yɛmə, ba'a 'ya katehwɛ yɛ hələ te hɛɗi nya keghwele ghwele. Katevɛ Sefəa ɗa 'ya kadzeghəa ŋwalea ŋa ba'a katewəpi hwelefefia ŋa 'ya.

4 Katekele hɛ kala ghwəvərə nyi mɛa yɛmə, kala wəfə nyi dzeyi mɛa hələ.

5 Ma ke kwete sha tegeze: ‹Ŋa Mahwətə 'ya.› Kateheka nda sləa Zhakob kwete ke ghəa ŋkɛ. Ma ke kwete sha terafe te dzeve ta ŋkɛ: ‹Va Mahwətə 'ya.› Kateve nda sləa Israyɛl ŋkɛ ke ghəa ŋkɛ.»


Kwete shala shɛ keɗema Mahwətə we

6 Wa nya ghena nya geze Mahwətə, meghe ba'a nde mbeɗe Israyɛl, Mahwətə nde berete nya: «'Ya ya kande ghate ba'a 'ya ya kande keɗaŋe, kwete shala shɛ keɗema 'ya we.

7 Wa ya yipə yipə le 'ya wa? Zlapete ŋkɛ, gezete ŋkɛ ba'a ncɛte zeweve ta wəsə nya kemenete geva ŋkɛ ghala pate kwa ghate ta hwelefe 'ya, gezete wəsə nya ketemene geva ŋkɛ.

8 Mbelia ɗa, ghazlənəma yɛ ma, bare barema yɛ ma. Kefave ŋayɛ ba'a kegezete ŋayɛ ghena shɛ 'ya vəashi wəka? Kenza yɛ kaka negha fete ta ɗa wəka? Kwete shala ya shɛ keɗema 'ya na? Kwete gela shɛ na? Keɗepe 'ya we.»


Ka mene yɛ shala tseŋwə

9 Gəmə pɛtɛa ka mene wəshi nyi zhɛre nyi mbeli kashala, wəsə shɛ kanakɛ ka negha fete ta nci we, wəsə shɛ kaketekɛ wəshi nyi mene nyi hɛ we, wəsə shɛ keɗepe hɛ we, hawe yatepəli nda hɛ ke hɛ.

10 Mene kwete shala keɗema pa ta kwete wəsə nya keɗema kaketekɛ ŋkwa ne, wəsə gezhi ŋkɛ.

11 Shewə tenza pɛtɛa mbeli nyi keve nda ghə ke wəsə nya zhɛrete mbeli kashala va hawe, deke mbeli mbeli nyi kemenete hɛ. Tsenete geva hɛ pɛtɛ, ncɛte ghəa nci hɛ. Katezhɛ nda ghazlənə ke hɛ ba'a shewə tenza hɛ va hawe.

12 Mbe ghwə ta gezla gezla tseyɛ reghɛ, le ndevele gezla ŋkɛ, le berete ta dzeve ta ŋkɛ mene ŋkɛ. Kwa sebe ta ŋkɛ kazhɛ nda ma ba'a kakiɗi berete ta ŋkɛ. Ma keɗema ŋkɛ kesakɛ yɛmə ne, kedene dene nza ŋkɛ.

13 Ma nde feɗe sheghwə ne, kadzeghe sheghwə nya ɗe ŋkɛ le zewe. Kaɗahe pa ta shala tseŋwə ŋkɛ le teɓehwe. Katsehe sheghwə ŋkɛ le hwa ba'a kahele ŋkɛ le wəsə kala mpiɗi. Pa ta wəndə ŋelɛ yafeɗe ŋkɛ kadzete, pa ta kema ta wəndə nya ndeɗe. Te ŋkwa nya keveyi geva tekeleke teve geva wəsə nya kashala shɛ.

14 Kawəmbə vɛ nya tetsasle mbeli mbeli, kanta cɛana keɗema hwemeke mbeli. Kasərə ŋkɛ mbeli kakele mbe ghɛa wəfe. Keɗema ne, katsawe ya ta wəfe mbeli, ama yitea va tekele ŋkɛ.

15 Ma sheghwəa shɛ ne, kezha meha ghwə mbeli le. Kapa ŋkɛ mbeli kezha beghezle geva keɗema kezha ta ɗafa. Keɗema kafeɗe shala hɛ yitea kezha hawe ve. Kafeɗe shala tseŋwə hɛ kezha gwəɗəŋə kwa kema ta ŋkɛ.

16 Kakele kwete bela ta sheghwə hɛ kameha ghwə le, kapesa sli hɛ te kezha zeme behe behe. Kabeghezle geva hɛ yite perə, ma ke hɛ sha gegeze: «Yawa beghezlekɛ geva ta ɗa 'ya, zeɗekə ghwə nya deŋwa!»

17 Ma nya ketene bela ta sheghwə ne, kafeɗe shala hɛ yite, kamene shala tseŋwə hɛ, kagwəɗəŋə hɛ mbe kema ta ŋkɛ ba'a ma ke hɛ sha sesəkwə ŋkɛ: «Mbele ɗa, kwa nza ŋkɛ gha ya kashala ta ɗa.»

18 Wəsə shɛ keɗepe hɛ we, wəsə shɛ kefave hɛ we. Ma va nya nza ntsə ta nci teŋzle ne, wəsə shɛ kaneheve hɛ we, tsagha mehele ta nci perə, kaɗema hɛ kafave wəsə.

19 Wəndə shɛ nya kezəzə ghena we, wəndə shɛ nya nza mehele ganyɛ ve we, ya ɗepe wəsə kezha geze: «Nahe 'ya kemehahwe ghwə le kwete bela ta sheghwə nya, nahe 'ya ketakɛ ɗafa te yɛ laɗe ba'a nahe 'ya kepesakɛ sli nya zeme nya 'ya. Kwete shala yatemene 'ya yitea bela ta sheghwə nya ketene. Mbe kema ta bela ta sheghwə tese 'ya kagwəɗəŋə gɛ!», ke we.

20 Deke ke wəsə nya kapəsəɗə ndeke nda ghə zəzə ta nci nyi ketazenji ka zamte hɛ. Kambele hɛ shala ta nci we, kegeze hɛ le ghəa nci: «Wəsə nya mɛa dzeve ta ɗa nya ne, shala tseŋwə ŋkɛ kaganda», ke we.


Mahwətə nde pate ba'a nde mbeleke Israyɛl

21 Ma ke Shala gezete: «Israyɛl hwelefe ta Zhakob, zəzəte ghena nya: Gha ya kande mene slene ta ɗa. 'Ya nde pate ŋa kezha mene ɗa slene. Israyɛl, kazaghə ŋa 'ya we.

22 Nahe 'ya ketsalemte yɛ jaɗafa ta ŋa kala ləmbə, nahe 'ya keŋkamte yɛ fete ta ŋa kala meləkwə ləkwə. Zhɛne geva kase sha 'ya, 'ya ya kande mbele ŋa.»

23 Ghweme, tsa gaghwe, kwa nza ŋkɛ slene yamene Mahwətə. Ŋkwa nya kwa zeweve ta hɛɗi, tsa yɛyi, yɛ ghweme, tsa mə gaghwe, tsagha yɛ ghɛa wəfe ba'a yɛ pɛtɛa wəfe nyi mbe. Kwa nza ŋkɛ ne, nahe Mahwətə kembeɗeke Zhakob ba'a kencɛte zləvəa ŋkɛ mbe Israyɛl.


Nde pate hɛɗi lema nde sleke ghena heca

24 Wa nya ghena nya geze Mahwətə nya kembeɗe ŋa, nya kepate ŋa kwa hwə va meyɛ ŋa nya: «'Ya ya kaMahwətə nya kemene wəshi pɛtɛ, 'ya kwetɛŋe ɗa nde pelakeyi ghweme, 'ya nde peleyi hɛɗi kaɗema kemane ta wəndə shɛ.

25 'Ya katezhɛre ghena ta ka kelɛŋə kawəsə gəmə, 'ya katetazemte nda mehele ke mbeli nyi kencɛ wəsə nya ketemene geva, katezhɛne ka ntsehwele ntsehwele 'ya dzeyi te sebe ba'a katencɛ ɗepe mene wəsəa nci ka gezhia kɛfi.

26 Kateyipə ghena ta nde mene slene ta ɗa 'ya kadzawa, katemene wəsə nya gezete ka ghwene ta ɗa 'ya. Ma 'ya sha geze nda ke Zhɛrəzalɛm: ‹Katezhɛne mbeli kanza mbe gha.› Ma 'ya sha geze nda ke meleme nyi mbe Zhəwda: ‹Katezhɛne mbeli kaŋa ŋayɛ›, katezhɛne mbeli kaŋa ŋkwa nyi keŋzlanji.

27 Ma 'ya sha ndərə nya lɛame: ‹Ghwele ŋa, 'ya katehase yɛ hələa ŋa.›

28 Ma 'ya sha Sirəs: ‹Nde ya wəshia ɗa na.› Katemene yayata wəsə nya ɗe 'ya ŋkɛ. Ma ke sha tegeze nda ke Zhɛrəzalɛm: ‹Katezhɛne mbeli kaŋa ŋa› ba'a ke ghɛa Shala: ‹Katezhɛne na kaŋa geva.›»

La Bible en langue Kapsiki avec les livres deutérocanoniques © Alliance Biblique du Cameroun 2012. 

Bible Society of Cameroon
Lean sinn:



Sanasan