Ɛzayi 41 - Ghena ta Shala

Wəndə nya veyi Mahwətə kwa hweŋkwa

¹ Ma ke Shala: «Gheyɛ mbeli nyi cakeɗa cakeɗa, nza mə divə kafa ɗa ŋa ɗa! Gheyɛ hwelefefi, hwepe mə ghə, hende mə geva kase ba'a geze mə ghena. Ngara ɓəmə kadzete ŋkwa kemeha ghwə zlaɓe.

² Shave laka ŋkwa kesame ta veci ne, kwa hweŋkwa kwete wəndə, kahərə ŋkwa ŋkɛ te yayata ŋkwa nya dzete ŋkɛ. Wa nde veyi ŋkɛ kwa hweŋkwa wa? Wa nde fəyi hwelefefi mbe dzeve ta ŋkɛ ba'a nde shifəmte ka meghea kɛfi wa? Kazhɛre hɛ kafayɛa ŋkɛ kakeləwə, kakweshare hɛ yɛ have ta ŋkɛ kala shekwəli va sefə.

³ Kakeka hɛ ŋkɛ ba'a kajive ŋkɛ hwa hɛ lɛŋe lɛŋe kaɗema keŋkeɗeyi seɗa te hɛɗi.

⁴ Wa nde menete wəshia shɛhɛ wa? Wəndə nya kegeze wəsə nya ketemene geva. Gheŋkɛ ya ka'ya, 'ya Mahwətə. 'Ya ya kande ghate ba'a 'ya nde tenza kande keɗaŋe.

⁵ Nahe mbeli nyi cakeɗa cakeɗa kenakɛ wəsə nya kemenete geva, nahe ghazlənə kezhɛte nda ke hɛ. Nahe mbeli nyi te yɛ mendɛkwe ta hɛɗi kebare barenji. Hende yahende geva hɛ kase.

⁶ Kemane yakemane ghəa nci hɛ, ma ke kwete wəndəa ŋkɛ sha kwete: ‹Ntsə geva deŋwa!›

⁷ Kantsə nda berete nde feɗe wəshi ke nde vɛsə mze ba'a nde dɛare wəshi le ndevele ke nde gezla. ‹Ganyɛke›, ke sha geze te wəsə nya ndeɓete ŋkɛ. Kwa sebe ta ŋkɛ ne, kabaŋe shala nya menete ŋkɛ ŋkɛ kezha ɗema ŋkɛ kagaŋkəɗə.

Shala kakemane Israyɛl

⁸ Ama gha gɛ Israyɛl, nde mene slene ta ɗa, gha Zhakob nya ntave 'ya, hwelefe ta Abraham nya kamcɛ ɗa,

⁹ gha nya zeleke 'ya se te mendɛkwe ta hɛɗi, gha nya hekake 'ya se te hɛɗi nyi cakeɗa cakeɗa, gha nya gezete ŋa 'ya: ‹Gha ya kande mene slene ta ɗa, nahe 'ya kentave ŋa, keneghakɛ ŋa 'ya we›, a 'ya ne,

¹⁰ ghazlənəma na ma, kwa nza ŋkɛ ne, le gha 'ya, nzama na keyirə yirə ma, kwa nza ŋkɛ ne, 'ya ya kaShala ta ŋa. 'Ya kave ŋa berete, 'ya kase kakemane ŋa, 'ya kaya ŋa le dzeve kwa zeme ta ɗa nya kehərə ŋkwa.

¹¹ Katenza hawe ba'a yiɗə te pɛtɛa mbeli nyi kehwepete wənə va gha. Ma mbeli nyi keghəpə le gha ne, katenza hɛ gəmə ba'a kateza sebe te hɛ.

¹² Katesepa ka ghema ta ŋa na, ama katezhɛne na kasləyi hɛ we. Ma mbeli nyi kese kampa le gha ne, katenza hɛ gəmə ba'a kateza sebe te hɛ.

¹³ Kwa nza ŋkɛ 'ya ya kaMahwətə Shala ta ŋa, 'ya nde keseve ŋa te dzeve kwa zeme. Ma 'ya gezete ŋa: ‹Ghazlənəma na ma, 'ya kase kakemane ŋa.›»

¹⁴ Ma ke Mahwətə: «Ghazlənəma na, gha Zhakob nya kamenteɗa, gha Israyɛl nya kadewə berete ma. 'Ya kase kakemane ŋa, Ma nde mbeɗe ŋa ne, gheŋkɛ 'ya nya kaShala ta Israyɛl nya keveyi geva tekeleke.

¹⁵ Katezhɛre ŋa 'ya kamɛnɛfɛa wəsə kemene slene, kawəsə kempə təsə nya njaŋa ŋa. Kateghazle yɛ ghweme na, katehə hɛ na, katezhɛre yɛ wəmbə na kala shekwəli.

¹⁶ Katemehe hɛ na ba'a katefə hɛ sefə, katetaze hɛ va masefafele. Ama gha ne, katetsa gaghwe na tewəmbəreke Mahwətə, katezlama na tewəmbəreke Shala ta Israyɛl nya keveyi geva tekeleke.

¹⁷ Kazele yɛmə ka dewə ŋeli ba'a ka titikwəa kɛfi, ama kasləyi yɛmə hɛ we. Kahase ŋwələ ndere te hɛ. Ama 'ya nya kaMahwətə ne, katezhɛne nda 'ya ke hɛ, 'ya nya kaShala ta Israyɛl ne, katewəfə hɛ 'ya we.

¹⁸ Katentsa yɛ hələ 'ya dzeyi te wəmbə nyi dɛrɛŋe rɛŋe, katentsa yɛ yɛmə 'ya dzeyi kwelɛ yɛ zlərə. Katezhɛre ɓerama 'ya kandərə ba'a katezhɛre hɛɗi nya keghwele ghwele 'ya kaɗasle.

¹⁹ Katemɓe yɛ lekeleke, yɛ gwevɛre, yɛ sewahe ba'a yɛ bekele 'ya te ɓerama. Ma te hɛɗi nya ɗema yɛmə ne, kateve mama ta yɛ wəfe 'ya zlaɓe.

²⁰ Tsagha gɛ, katenakɛ ba'a kateɗepe mbeli, kateneweve ba'a katefave mbeli dzeve ta Mahwətə nde menete wəshia shɛhɛ, Shala ta Israyɛl nde pate hɛ.»

Gəmə yɛ shala tseŋwə

²¹ Ma ke Mahwətə, meghea hwelefe ta Zhakob: «Gheyɛ shala ta kweci hwelefefi, se mə le ghena ta ŋayɛ, ncɛ mə kaganda nya va gheyɛ.

²² Hendeke mə geva ba'a geze n'yɛ mə wəsə nya ketemene geva tse ga! Wa wəshi nyi keghate kamenete geva wa? Geze n'yɛ hɛ kezha kele zəzə n'yɛ te hɛ. Keɗema ne, geze n'yɛ mə və nya ketese yitea ɗepe wəsə nya ketemene geva n'yɛ.

²³ Geze n'yɛ mə wəshi nyi ketemene geva. Tagha gɛ, kateɗepe ŋayɛ n'yɛ kashala. Menete mə wəsə nya ganyɛ keɗema nya ndiremi kezha pele geva ntsə ta n'yɛ ba'a kezha newe wəsəa shɛ n'yɛ kanya kwetɛŋe.

²⁴ Ama za ma wəshia kwadanji ke gheyɛ, zləvə te wəsə nya mene yɛ we. Ma wəndə nya keve ŋayɛ kashala ne, kala gheyɛ ndiremia ŋkɛ.

²⁵ Sawa laka bela kwa gwela ne, nahe 'ya keveyi wəndə kwa hweŋkwa, sawa yasawa ŋkɛ. Same laka ŋkwa nya kesame ta veci ne, kaheka ŋkɛ 'ya le sləa ŋkɛ. Kateŋkeɗe ka ŋgwamna ŋkɛ kala rekɛ, kala nya ŋkeɗe rekɛ ghene kwa ŋa ghene.

²⁶ Wa nde gezete wəsəa shɛ se kaghate kezha ɗepete ghen'yɛ wa? Wa nde gezete se vəashi kezha geze n'yɛ kakaganda ŋkɛ wa? Wəndə shɛ kegezete wəsəa shɛ we, wəndə shɛ kehekɛmete we, wəndə shɛ kefate ghena ta ŋayɛ we.

²⁷ Ma 'ya nya kande ghate ne, ma 'ya gezete nda ke Siyon: ‹Wa nyi hɛ nyi.› Ma ke Zhɛrəzalɛm ne, nahe 'ya keghweneghe nda nde zlape ghena mɛnɛfɛ nya ganyɛ.

²⁸ Nahe 'ya kese kanewe ŋkwa, ama wəndə shɛ kenakɛ 'ya we. Ma hwa mbelia shɛhɛ ne, kwete shɛ kancɛte nda ntsehwele ke wəndə we, kwete shɛ kafate ghena mbeli ve we, kwete shɛ kazhɛnete ɗa ghena we.

²⁹ Wəshia kwadanji hɛ, wəsə shɛ kamenete hɛ we. Gəmə ba'a sefə pa ta wəshia nci.»