Ɛzayi 33 - Ghena ta Shala

Ɗa ya te nde za sebe te wəshi

¹ Ɗa ya te gha nya keza sebe te wəshi, ama kaɗema mbeli kezamte sebe te gha, gha nya kepa ŋkwa, ama kaɗema mbeli kepamte ŋa! Ma vəa ŋkwa nya tekiɗimte za sebe na te wəshi ne, kateza geva sebe te gha. Ma te və nya tenahemte pa ŋkwa na ne, katepamte geva na.

² Mahwətə, zhɛ heli yitea ghen'yɛ, ke gha ndeke ŋa ghəa n'yɛ ghen'yɛ, nza kaberete ta n'yɛ kala kiɗi ta ŋkwa ba'a kande mbele n'yɛ te vəa yaka.

³ Ma vəa ŋkwa nya gaka ŋwələa ŋa ne, katehwɛ hwelefefi. Ma vəa ŋkwa nya sate na te ŋkwa ne, kwetɛ kwetɛŋe tetaze mbeli.

⁴ Tagha gɛ, katetsene wəshia ŋayɛ mbeli kala nya tsene dzale mbeli. Katedzeghəa wəshia shɛhɛ mbeli kala ləmbəa dzale.

⁵ Mahwətə ya kwele, va nya nza ŋkɛ pelɛ ghweme. Kave wəsə tiɗiɗi ba'a nza tiɗiɗi ŋkɛ mbe Siyon.

⁶ Katenza yɛ gwezlayɛ, gheyɛ mbelia Mahwətə. Ntsehwele ba'a ɗepe wəsə ya kamcɛlə nyi kembele ŋkwa, hawe va Mahwətə ya kawəsə nya nza zləvə te.

Katemene slene ta ŋkɛ Mahwətə

⁷ Katsa lewela ka Ariyɛl dzeyi kwa yɛ hweŋkwa, kanehwene ka geze ghena ta kwelɛŋe sərəɓə sərəɓə.

⁸ Shaka shaka nzanji yɛ hweŋkwa, wəndə shɛ kadzeghwa kwa yɛ hweŋkwa we. Nahe nde jikə geva kenehemte geva, nahe ka negha fete keneghamte geva, wəndə shɛ kaɓela mbeli we.

⁹ Helaŋe helaŋe ŋkwa nya te hɛɗi, ghwele yaghwele ŋkɛ. Hawe ya te gamba ta Liban, kwesame yakwesame ŋkɛ. Yipə yipə hɛɗia Saron le ɓerama. Nahe wəfe nyi pelɛ Bashan ba'a Karmɛl kebetemte sleke.

¹⁰ Ma ke Mahwətə: «Tsetsenya gɛ ne, 'ya katemene slene ta ɗa, tsetsenya ne, 'ya katesate te ŋkwa, tsetsenya ne, 'ya katencɛ kwelea ɗa.

¹¹ Zhawa yadzawa hwe yɛ yite, ama mezaɗe yayake yɛ. Sefə nya zhɛne ya kaghwə nya ketetere ŋayɛ.

¹² Hɛmɗɛke tetere mbeli kapəsəɗə kala tigə nyi ketsəhwə tsəhwə nyi tsə ghwə yite tenza hɛ.

¹³ Gheyɛ mbeli nyi cakeɗa cakeɗa, fa mə wəsə nya menete 'ya. Gheyɛ mbeli nyi dekwe dekwe, ɗepete mə berete ta ɗa.»

¹⁴ Nahe ka jaɗafa mbe Siyon keghazlənənji, Nahe ka ndiremia mehele kebare barenji. Ma ke hɛ sha geze: «Wa wəndəa ɓəmə nya ketenza kaghereŋe vare ghwə nya ketse nya wa? Wa wəndəa ɓəmə nya ketenza kaghereŋe vare laɗe nya keɗema nya kamte tɛape wa?»

¹⁵ Deke wəndə nya kedzeghwa tiɗiɗi, nya kegeze kaganda, nya keɗema zhɛme ta mene berete, nya keŋka mbeli nyi kemene mbəɗəkwə, nya kezhiɓə sleme va ghena ta pesle ŋkwa ba'a nya kedəpə ntsə va newe wəsə kwa ndiremi.

¹⁶ Wəndəa shɛ nde tenza pelɛ yɛ wəmbə, katenza zlera nyi berete berete kaŋkwa kewəfərə ta ŋkɛ, kateve nda geva ɗafa, katendaŋe nda geva yɛmə we.

Zhɛrəzalɛm nya kembele mbele

¹⁷ Katenewe nza ta ndeɗea meghe ntsə ta ŋayɛ, katenewe nza ta bezlea hɛɗi yɛ.

¹⁸ Katezəzə wəsə nya kese kave ŋayɛ ghazlənə yɛ, ma pe yɛ te'yɛwe va ghəa ŋayɛ: «Tema mbeli nyi kese nyi katsehe kanewe ghweme te jaɓeregwale gɛ wa? Tema mbeli nyi kese nyi kanewe ghweme te cɛ nyi bebiya bebiya gɛ wa?»

¹⁹ Katezhɛne yɛ kanewe ka ŋkele ntsə nyi, mbeli nyi kegeze ghena nya ɗema mbeli kafave, kwete ghena nya ɗema mbeli kafa slə nya kwa we.

²⁰ Newe mə Siyon, meleme nya mene gəsəkə gheɓəmə mbe, Katenewe Zhɛrəzalɛm, ŋkwa nya gwezlayɛ, cɛ lekwesa nya zhɛnema mbeli kapele, nya zhɛnema mbeli kanteɗe yɛ sheghwəa ŋkɛ, nya zhɛnema mbeli kapele yɛ zewe ta ŋkɛ ntsə ta ŋayɛ.

²¹ Tagha tencɛ ɓəmə ndeɗea ŋkɛ Mahwətə. Katenza hələ nyi jama jama ba'a ŋkwa yɛmə nyi perawete mbeli tagha. Katedzeghwa yɛ kwambelə kempa te hɛ we, katedzeyi kwambelə nyi jama jama te hɛ we.

²² Mahwətə ya kawəndə nya te ghəa ɓəmə, gheŋkɛ nde ncɛ ɓəmə hweŋkwa, Mahwətə ya kameghea ɓəmə, gheŋkɛ nde mbele ɓəmə.

²³ Nahe yɛ zewe ta ghema kelakenji, kazhɛne hɛ kaghereŋeyi seləa kwambelə ba'a kantsəte yɛ zlave we. Tagha gɛ ne, katenehe wəshi nyi fəke mbeli kwele kwele sheke kwamte mpa mbeli. Pa le ka gwadarea kɛfi katefə wəshi.

²⁴ Wəndə nya mbe Zhɛrəzalɛm kategeze: «Shewə 'ya», ke we. Katekelemte geva jaɗafa ta mbeli nyi mbe melemea shɛ te wənə.