Ɛzayi 25 - Ghena ta Shala

Mahwətə ya kaŋkwa kewəfərə ta nde dewə ŋeli

¹ Mahwətə, gha ya kaShala ta ɗa, katsahe ŋa 'ya ba'a kave zləvə 'ya te sləa ŋa, kwa nza ŋkɛ nahe na kemenete wəshi ganji. Se vəashi pate geva hɛ keberete beretenji ba'a kaɗema kazhɛre pa.

² Nahe na kezhɛrete meleme kakwəfi, nahe na meleme nya beretea shɛ keŋzla. Mba meleme nya berete ta ka se se kameleme we, katezhɛne mbeli kaŋa ŋkɛ tɛape we.

³ Vatse ve zləvə hwelefe nya berete te gha, hawe yɛ meleme ta mbeli nyi kemene berete va gha.

⁴ Kwa nza ŋkɛ gha ya kaŋkwa kewəfərə ta nde dewə ŋeli, kaŋkwa kewəfərə ta nde titikwə nya kesa yaka, kaŋkwa kewəfərə va va nya wəba, kashenaŋkwe va ghwə ta veci. Kwa nza ŋkɛ ma hwepe wənə ta mbeli nyi kemene berete ne, kala va nya kegisə geva kadzete dewe

⁵ kala ghwə ta veci te hɛɗi keghwele ghwele. Nahe na kefɛake gaka ta ka se se. Kala nya gweɗakwe ghwə ta veci shenaŋkwe ta ləmbə ne, tsagha gweɗakwe geza ta mbeli nyi kemene berete na.

Mahwətə kata nda gajamendə ke mbeli pɛtɛ

⁶ Pelɛ ghweme ta Siyon ne, kateta gajamendə Mahwətə nde berete ke mbeli pɛtɛ, gajamendə le sli nyi nza merege te ba'a ghəa tɛ, ta sli nyi kweɗe kwa kweɗe kwa nyi nza merege te ba'a ghəa tɛ ganyɛ.

⁷ Pelɛagha tekwefaŋe zlave ŋkɛ kənəa mbeli pɛtɛ, ghamca nya kənəa pɛtɛa hwelefefi ŋkɛ.

⁸ Kateza sebe ŋkɛ te mte kaghala ghala. Katesehwe yɛ nehwene Shala Mahwətə kwa pɛtɛa yɛ kema. Katekele hawe ŋkɛ seyi te mbelia ŋkɛ te yayata hɛɗi. Nya ya kaghena nya gezete Mahwətə.

Hawe nya te Mowab

⁹ Ma te vecia shɛ ne, ma ke mbeli sha tegeze: «Gheŋkɛ ya kaShala ta ɓəmə. Nahe gheɓəmə kendeke nda ghəa ɓəmə, tagha gɛ, pa mbelete ɓəmə. Kaganda ne, ke Mahwətə ndeke nda ghəa ɓəmə gheɓəmə. Zlama ɓəmə, nza ɓəmə fare fare va nya mbelete ɓəmə ŋkɛ!

¹⁰ Ya yaya ghwemea shɛ dzeve ta Mahwətə.» Ama te ŋkwa shɛnyɛ ŋkeɗemte geva Mowab kala nya ŋkeɗe meha mezaɗe seɗa te kəsə.

¹¹ Tagha katepele dzeve ŋkɛ kala wəndə nya ketsa bamba. Ama kateshifəmte geva kele ghə ta ŋkɛ ya tsema tsemanyɛ mene ŋkɛ.

¹² Ma zlia ŋa nya berete, nya shɛma nya mbeli dzeme gɛ ne Mowab ne, kateŋzlamte ŋkɛ Mahwətə, katempə ŋkɛ kadzete hɛɗi.