Ɛzayi 23 - Ghena ta Shala

Te ghəa yɛ Tir le Sidon

¹ Ghena te ghəa Tir. Nehwene mə, gheyɛ kwambeləa ka Tarsis, kwa nza ŋkɛ rayɛ sebe te ŋkwa keghereŋe kwambelə, ketene yɛ ghɛ we.» Se te hɛɗia Shipre fake ghena shɛ hɛ.

² Nza mə tikə tikə, gheyɛ mbeli nyi mɛa ndərə, gheyɛ ka zhɛre dzeve nyi mbe Sidon nyi keghwene ka ghwene ta ŋayɛ

³ jive te tepe ta ndərə. Ma wəshi nyi tsawete mbeli dzeyi mɛa Nil ne, Sidon nde mene hɛ se te wəve. Kaŋa ŋkɛ nza zhɛme ta kweci hwelefefi.

⁴ Sidon, nza shewə va hawe, gha nya kaŋkwa kewəfərə nya mɛa ndərə. Kwa nza ŋkɛ ne, ma ke sha geze: «Kese 'ya kaheha we, kese 'ya kaya ŋwale we, kese 'ya kadəkwə mempɛhwetɛti keɗema kakele deghelɛshi we.»

⁵ Ma vəa ŋkwa nya tefa ghena shɛ Ɛzhipte ne, katebare bare ŋkɛ kala nya vəa ŋkwa nya tefate wəsə nya kemenete nda geva ke Tir ŋkɛ.

⁶ Jive mə te ndərə hwa'a mbe Tarsis, Nehwene mə, gheyɛ mbeli nyi dzeyi mɛa ndərə.

⁷ Nya ya kameleme ta ŋayɛ nya nza nya gəsəkə mbe na? Se vəashi ghate geva ŋkɛ, kalə cakeɗake ghwene mbeli ŋkɛ kezha zhɛre dzeve.

⁸ Yɛ derə meghe yase meleme ta ka Tir kanehe, kambeli nyi te ghə se ka zhɛre dzeve ta ŋkɛ, kambeli nyi nza zləvə te hɛ se ka fəlia ŋkɛ te hɛɗi lema. Wa nde tarete kaŋzla Tir wa?

⁹ Mahwətə nde berete nde tarete kamene tsagha kezha dzakwe kele ghə ta mbeli nyi nza zləvə te, kezha shifə mbeli nyi jama jama te hɛɗi lema.

¹⁰ Tir, wəza hɛɗia ŋa kala hɛɗi nya mɛa Nil, va nya nza ŋkɛ mba ŋkwa keghereŋe ta kwambeləa ŋa we.

¹¹ Nahe Mahwətə keɗate ndərə, nahe ŋkɛ kegaŋkəɗəte yɛ hɛɗia meghe, nahe ŋkɛ kegezete kezha ŋzla te yɛ ŋkwa kewəfərə ta ka Kanan.

¹² Ma ke gezete: «Ka Sidon, katezhɛne yɛ kamene gəsəkə we, yipə yipə yɛ le deghelɛshi nyi ɓelahehwe ɓelahe mbeli le hɛ kaberete. Ya gheyɛ slə ba'a jive hwa'a pelɛ hɛɗia Shipre ne, katekemave zhɛne mpi yɛ pelɛagha we.

¹³ Newema mə hɛɗia ka Babilone: ketene sebe te mbelia shɛhɛ we. Nahe Asiri kezhɛrete ŋkɛ kahɛɗia wəshi keseɗa nyi hwa gamba. Nahe ka Asiri keŋate cɛ nyi bebiya bebiya kezha ha nda mpa. Nahe hɛ keŋzlamte ghɛ ganjia ŋkɛ, nahe hɛ kezhɛrete ŋkɛ kakwəfi.

¹⁴ Kwambeləa ka Tarsis, nehwene mə, va nya nza ŋkɛ rayɛ sebe te ŋkwa kewəfərə ta ŋayɛ.»

¹⁵ Tagha gɛ, katezaghəyite geva Tir kava mberefaŋemsə, kala temə ta meghe teghweme. Ma kwa sebe ta va nyi mberefaŋemsə nyighɛ ne, katemene nda geva ghena nya mbe ciməa male mefətekwə nya ke Tir:

¹⁶ Kelete ŋgwəleŋəa ŋa, dzaslete meleme, male mefətekwə nya zaghəyite mbeli. Mbeɗete ŋgwəleŋə megela, gha yɛ cimə kwele kwele, yitea zhɛne mbeli kazəzə ŋa.

¹⁷ Ma kwa sebe ta va nyi mberefaŋemsə nyi ne, kateve ntsə Mahwətə te Tir. Katezhɛne Tir kaŋ'we yɛ zhɛme ta ŋkɛ. Katemene mefətekwə ŋkɛ le pɛtɛa hɛɗi nyi te hɛɗi lema.

¹⁸ Ama yɛ zhɛme ta ŋkɛ ba'a yɛ meleɓe ta ŋkɛ ne, kateve nda geva hɛ tekeleke ke Mahwətə. Katetsene hɛ ba'a katewəmbə hɛ mbeli we. Ama katenza kawəshi kezeme ba'a kawəshi kebehe mbeli kenza kwa kema ta Mahwətə ba'a kawəshi kepa lekwesa nyi ganji ganji ke hɛ.