Ɛzayi 11 - Ghena ta Shala

Hwelefe ta David

¹ Kateshave kwete wəzege teza mbe hwelefe ta Zhɛsɛ, kala nya ɗəkwə wəfe te dəŋwə. Katepese kwete dzeve te yɛ zlərəa ŋkɛ.

² Kənə tenza Sefəa Mahwətə: sefəa ntsehwele ba'a ŋa ɗepe meha ghwə, sefəa nta ghena ba'a ŋa hwepe ghə, sefəa ɗepe wəsə ba'a ŋa hawe va Mahwətə.

³ Kateteke nda hawe va Mahwətə ŋkɛ. Katemeha ghwə ŋkɛ kala nya newe ntsə ta ŋkɛ we, katetare geze ghena ŋkɛ kala nya fa mbeli ŋkɛ kageze we.

⁴ Katemeha ghwə ta ka dewə ŋeli ŋkɛ le kaganda, tiɗiɗi tenza ŋkɛ kezha ka titikwəa kɛfi nyi te hɛɗi. Kateɗa mbeli nyi mbe meleme ghena ta ŋkɛ kala geta. Katempə ka 'yaghwa mehele ghena nyi ketesawa te mɛa ŋkɛ.

⁵ Nza tiɗiɗi ba'a nza dɛŋe dɛŋe ka tenza kahətə nya hwa hwə ve.

⁶ Katenza yɛ makwagwele le zhɛgwəa təmə te ŋkwa nya kwetɛŋe, kateɓelahe deghwavaŋwe vare zhɛgwəa kwe. Katezeme wəsə yɛ leve ta sla le wəzege ta nivɛrə jikə, wəzege teza keɓɛhwɛnyɛ nde teya hɛ.

⁷ Te ŋkwa kezeme gwəzə nya kwetɛŋe tezeme gwəzə yɛ sla le mtsekwele, te ŋkwa nya kwetɛŋe tebeke ŋwalea nci. Katezeme gwəzə mtsekwele kala sla.

⁸ Kateraberə velɛnjɛ mɛa ghɛa mbele, kateha dzeve wəzege kadzembe ghɛa mentsape.

⁹ Katezhɛne wəsə kwa ndiremi keɗema berete kamene geva pelɛ pɛtɛa ghweme ta ɗa nya keveyi geva tekeleke we. Kwa nza ŋkɛ viɗi tenza hɛɗi va ɗepe wəsə ta Mahwətə, kala nya viɗi ndərə yɛmə.

¹⁰ Ma te vecia shɛ ne, katenza wəzege ta Zhɛsɛ meslete yitea ghweme kala drape sha mbeli nyi te hɛɗi lema. Katese hwelefefi ka'yɛwe ghena ve ba'a kateɓele zləvəa Shala te ŋkwa nya tenza ŋkɛ.

Zhɛne geva ta mbeli nyi kefəhwe geva

¹¹ Ma te vecia shɛ ne, katekafe dzeve Mahwətə kakwa bake zhigə kezha mbeɗe mbelia ŋkɛ nyi ketene, nyi ketetene teghweme mbe Asiri, Ɛzhipte, Patros, Kəwsh, Ɛlam, Shinɛyar, Hamat ba'a te hɛɗi nyi te ndərə.

¹² Katembe drape ŋkɛ kezha hwelefefi, katetsene ka Israyɛl nyi kefəhwe geva ŋkɛ, katerəkwə ka Zhəwda nyi ketazemte geva dzeyi te yayata bela ta hɛɗi lema.

¹³ Ma tsagha katefɛa zlɛa Ɛfrayim ba'a katezamte geva sebe te ka jaga ta ka Zhəwda. Katezhɛne Ɛfrayim kazlɛ va Zhəwda ba'a katezhɛne Zhəwda kanza ka ghema ta Ɛfrayim we.

¹⁴ Kateme hɛ bake nci kənəa ka Filisti se laka ŋkwa kepəkwə ta veci, Katefə wəshi hɛ yitea mbeli nyi laka ŋkwa kesame ta veci: Katemene berete hɛ te ka Ɛdom ba'a te ka Mowab, mbe dzeve ta nci tenza ka Amon.

¹⁵ Katehase yɛməa ndərəa Ɛzhipte Mahwətə. Katewedazle hələa Efrate ŋkɛ le dzeve. Laka sefə nya le berete ne, katenehe hələa shɛ ŋkɛ mberefaŋe mbe, wərə wəndə kajivenyɛ te le seɗa.

¹⁶ Katenza hweŋkwa shɛ kaŋa mbelia ŋkɛ nyi ketene, kaŋa mbeli nyi ketenza teghweme mbe Asiri, kala nya kemenete nda geva vəashi ke ka shihɛ nci te veci nya shavenji hɛ mbe Ɛzhipte.