Ɛsdras 6 - Ghena ta Shala

Ghena nya zhɛnete meghe Dariyəs

¹ Pa meghe Dariyəs gezete kezha zelemte mbe cɛ nyi nza palepa ta wəshi nyi kemenete geva vəashi ba'a nyi nza wəshi nyi nza zləvə te mbe Babilone.

² Ama mbe Ɛkbatane, meleme nya dzasle kwa zli mbe sla ta hɛɗia Mɛdi ntsate palepa kwa peɗe peɗe nya rafete geva ŋkɛ te kala nya mbeli: «Wəshi nyi kemenete geva.

³ Ma te kwa ghate ta va ta Sirəs te meghe ne, ma ke gezete ghena: Ma ghɛa Shala nya mbe Zhɛrəzalɛm ne, nda ŋkɛ kaŋate geva zhɛkwa kezha nza ŋkɛ kaŋkwa kedzeghe melɛ. Te shihəa ŋkɛ nya vəashi ŋa mbeli. Mɛtre mahekenemsə tenza dzeme ta ŋkɛ yitea ghweme, mɛtre mahekenemsə ŋa bezlea ŋkɛ.

⁴ Zəɗəa pelɛ kwa tsehe tsehe mahekene tepa mbeli ba'a zəɗəa yɛ za ta sheghwə kwetɛŋe. Mcɛlə nyi ki ghɛa meghe yateŋki slenea shɛ mbeli le.

⁵ Zhɛne ne, katezhɛne wəshi nyi le mze kwa tere tere ba'a nyi le mze kwa ghwə ghwə nyi fəhwe Nabəkodonozor shave mbe ghɛa Shala nya mbe Zhɛrəzalɛm kadzeme Babilone ne, katezhɛne hɛ mbeli kadzembe ghɛa Shala nya mbe Zhɛrəzalɛm. Pɛtɛa wəshia shɛhɛ ne, kadzete ŋkwa nya se hɛ mbe ghɛa Shala nya pelɛ Zhɛrəzalɛm tezhɛne hɛ mbeli.»

⁶ Vatse zhɛnete nda mɛ Dariyəs ke yɛ Tatenay, ŋgwamna nya laka ŋkwa kepəkwə ta veci yitea Efrate, Shetar-Boznay le kweci mbelia nci nyi te ghəa hɛɗia shɛ kala nya: «Dzehwema ghena nyagha yɛ ma.

⁷ Pelakɛ mə ka Zhəwif werete kaŋa ghɛa Shala. Ŋate ŋkɛ ka ŋgwamna ba'a mbelia jama ta ka Zhəwif te ŋkwa nya se ŋkɛ kaghate.

⁸ Wa nya ghena nya geze ŋayɛ 'ya nya: kemanakɛ mə mbelia jama ta ka Zhəwif kezha ŋa ta ghɛa Shala zhɛkwa te yayata və: te ŋkwa shɛ te ŋkwa shɛ ŋki nda wəshi nyi zamte hɛ yɛ le cɛdɛa meghe nyi kese te yɛ jaɓeregwale nyi tsehe mbeli mbe sla ta hɛɗi ke mbelia shɛhɛ.

⁹ Keveci keveci teve nda wəshi nyi kehite geva yɛ ke ka dzeghe Shala nyi mbe Zhɛrəzalɛm kala nya 'yɛwete hɛ: mcɛmcɛli nyi same va, gamea lɛmə ba'a zhɛgwəa lɛmə timɛti kezha yɛ melɛ kwa tere tere ke Shala tehwə ghweme, ha, ghwene, tɛ ba'a n'yi.

¹⁰ Ma tsagha ne, wərə hɛ kadzeghe nda melɛ nyi kezəŋwə zeɗekə ke Shala tehwə ghweme ba'a katesəkwə ghə hɛ kezha mpia yɛ meghe le ŋwalea ŋkɛ.

¹¹ Ma keɗema wəndə kahawe va ghena nyi ne, kave nda hweŋkwa 'ya ke mbeli kezha nteɗeve selə shave ki ghɛa ŋkɛ, kantasate tiɗiɗi te, kwa sebe ta ŋkɛ, pa mbeli zhɛrete ghɛa ŋkɛ kakwəfi.

¹² Pa Shala nya kencɛte sləa ŋkɛ mbe Zhɛrəzalɛm kelemte yayata meghe te meghea ŋkɛ ba'a pa vate ɗa te yayata hwelefe nya kedzeghe kaŋzla ghɛa Shala shɛ. 'Ya Dariyəs nde gezete ghena nyi: yipəyi hɛ mbeli kwa tiɗiɗi!»

¹³ Tagha gɛ, pa yɛ Tatenay, ŋgwamna ta hɛɗi nya laka ŋkwa kepəkwə ta veci yitea Efrate, Shetar-Boznay le kweci mbelia nci yipəyi ghena nyi gezeke meghe Dariyəs kwa megela.

Gəsəkəa ghɛa Shala nya zhɛne mbeli kaŋate

¹⁴ Ntake mbelia jama ta ka Zhəwif kajive mbe kema mbe kema le ŋa ta ghɛa shɛ kala nya gezete yɛ Azhɛ le Zakari, wəzege ta Ido nyi kaka mɛ ŋkwa. Pa hɛ keɗaŋemte kala ghena nya gezeke Shala ta ka Israyɛl ba'a ghena nyi rafete yɛ Sirəs, Dariyəs le Artasɛrsɛs, ka meghea ka Pɛrse.

¹⁵ Te kwa mahekene ta hɛ mbe terea Adar te kwa ŋkwaŋe ta va ta Dariyəs te meghe keɗaŋemte ŋa ta ghɛa Shala mbeli.

¹⁶ Ntake Israyɛl, ka dzeghe Shala, ka Lɛvi le kweci mbeli nyi kezhɛneke geva se mbe mava kamene gəsəkəa keghwene ghɛa Shala le zlama.

¹⁷ Ma vəa ŋkwa shɛ ne, pa hɛ dzeghekɛ melɛ le mcɛmcɛli gwəmsə, gamea lɛmə gwəmsə bake, zhɛgwəa lɛməa timɛti gwəmsə wəfaɗe ba'a zhɛfa lɛmə meŋe bakeghəmbe keyita keyita kezha kelemte jaɗafa ta pɛtɛa ka Israyɛl Shala te wənə.

¹⁸ Pa hɛ nehemte ka dzeghe Shala le ka Lɛvi kewəvəsə kewəvəsə kala nza ta slene nyi mene nda hɛ ke Shala mbe Zhɛrəzalɛm, kala ghena nya kerafete geva mbe palepa ta Moyize.

Ka Zhəwif kamene gəsəkə Pake

¹⁹ Pɛtɛ mbeli nyi kezhɛneke geva nyi menete gəsəkə Pake te kwa meŋe wəfaɗeghəmbe ta hɛa tere kwa ghate mbe va nya kedzeghə.

²⁰ Nahe ka dzeghe Shala le ka Lɛvi keyaɓemte ghəa nci wɛŋe wɛŋe zlaɓe, pɛtɛ hɛ wɛŋe wɛŋe. Pa ka Lɛvi hehenekɛ zhɛgwəa lɛmə yitea Pake kezha mbeli pɛtɛ, kezha ka menəhɛnyɛ hɛ nyi kaka dzeghe Shala ba'a kezha ghəa nci.

²¹ Pɛtɛ ka Israyɛl nyi kezhɛneke geva zehwe wəshi kezeme nyi hwa Pake zlaɓe le mbeli nyi kesərəakɛ nza wale wale ta ka ɗepema Shala nyi te hɛɗia shɛ kezha zele Shala Mahwətə ta ka Israyɛl.

²² Kwa sebe ta ŋkɛ, pa hɛ menete gəsəkəa ɗafa kwalekwala le zlama kahɛ mberefaŋe, kwa nza ŋkɛ nahe Mahwətə keviɗikɛ wənəa nci le zlama kwa zhɛrete wənəa meghea ka Asiri ŋkɛ, nya kemtsehete nda berete ke hɛ kezha ŋa ghɛa Shala ta ka Israyɛl.