Ɛsdras 1 - Ghena ta Shala

Ghena ta Sirəs

¹ Ma te kwa ghate ta va ta Sirəs, meghea ka Pɛrse mbe meghe ne, pa Mahwətə zəzəte kayipə ghena nya gezeke ŋkɛ laka mɛa nde mɛ ŋkwa Zhɛrɛmi kadzawa. Pa ŋkɛ vame zəzə mbe mehele ta Sirəs kezha zlapete ŋkɛ te hɛɗia ŋkɛ ba'a kezha rafete palepa kala nya:

² «Wa nya ghena nya gezete Sirəs, meghea ka Pɛrse nya: Nahe Shala Mahwətə nya pelɛ ghweme keveyi ka meghe nyi te hɛɗi pɛtɛ mbe dzeve ta ɗa. Nahe ŋkɛ kendeke ɗa hweŋkwa kaŋa nda ghɛ mbe Zhɛrəzalɛm, te hɛɗia Zhəwda.

³ Yayata wəndə nya kenza kawəndə ŋkɛ hwa gheyɛ ne, pa Shala ta ŋkɛ nza le, dzeme Zhɛrəzalɛm ŋkɛ te hɛɗia Zhəwda kazhɛne ŋa ghɛa Shala Mahwətə ta ka Israyɛl, gheŋkɛ Shala nya pelɛ Zhɛrəzalɛm.

⁴ Ma te ŋkwa nyi nza kweci ka Israyɛl ne, pa mbeli nyi te ŋkwa shɛ kakemane hɛ le mze kwa tɛawetɛa, mze kwa tere tere, kweci wəshi ba'a wəshi keseɗa. Pa hɛ ɗave nda kweci wəshi gəmə ke hɛ kezha ghɛa Shala nya mbe Zhɛrəzalɛm.»

⁵ Tagha gɛ, cape mbeli nyi te ghəa hwelefe ta Zhəwda le ŋa Bɛnjamɛn, ka dzeghe Shala ba'a ka Lɛvi, geze ta ŋkɛ, pɛtɛa mbeli nyi ndeke nda zəzə Shala ke hɛ kajive kaŋa ghɛa Mahwətə pelɛ Zhɛrəzalɛm zhɛkwa.

⁶ Pɛtɛ ka ghedəkwəa nci kekemanakɛ hɛ le wəshi nyi le mze kwa tɛawetɛa ba'a nyi le mze kwa tere tere, le kweci wəshi ba'a wəshi keseɗa, le mama ta wəshi nyi nza zləvə te, kaɗema mbeli kese kaɓela wəshi nyi tseheke mbeli le ɗe ta nci kezha ghɛa Shala.

⁷ Nahe meghe Sirəs le ghəa ŋkɛ kezhɛneke wəshi nyi nza zləvə te hɛ, nyi fəhwe Nabəkodonozor shave mbe ghɛa Mahwətə pelɛ Zhɛrəzalɛm kezha fəyi ki ghɛa yɛ shala ta ŋkɛ.

⁸ Ma kwa gezete meghe ne, pa Mitrɛdat nya te ghəa mcɛlə dapate nda wəshia shɛhɛ te dzeve ke Shɛshebasar nya kawəndə nya te ghə mbe Zhəwda.

⁹ Wa nyi ɓela ta nci nyi: parantɛ nyi le mze kwa tere tere mahekenemsə, parantɛ nyi le mze kwa tɛawetɛa slibə, hwa bakemsə meslighəmbe,

¹⁰ darawe nyi le mze kwa tere tere mahekenemsə, darawe nyi le mze kwa tɛawetɛa nya ɗema zləvə te ndeɗekə gwəmsə wəfaɗe ba'a meŋe ba'a kweci wəshia shɛhɛ slibə.

¹¹ Ma jikə wəshi nyi le mze kwa tere tere ba'a nyi le mze kwa tɛawetɛa pɛtɛ ne, 5.400 hɛ. Pɛtɛ fəte hɛ Shɛshebasar kwa slə hɛ le kweci mbeli nyi fəghe mbeli shave mbe Babilone kadzeme Zhɛrəzalɛm.