Ɛzɛkiyɛl 1 - Ghena ta Shala

Mahwətə kancɛ nda ghəa ŋkɛ ke Ɛzɛkiyɛl

¹ Ma mbe va kwa mahekenemsə, mbe tere kwa wəfaɗe, te hɛ kwa mcɛfe, vəa ŋkwa nya nza 'ya te tepe ta mbeli nyi fəhwe mbeli kaka mavashi mɛa hələa Kɛbar ne, pa ŋkwa kedzeme ghweme ghwenemte geva, pa Shala ncɛte ɗa geva.

² Va shɛ ya kakwa mcɛfe ta va ghala kwa kesehwe meghe Zhowakim mbeli.

³ Pa Mahwətə gezete ɗa ghena, 'ya Ɛzɛkiyɛl, wəzege ta nde dzeghe Shala Bəwzi, mɛa hələa Kɛbar, te hɛɗia ka Babilone. Tagha ne, pa berete ta Mahwətə dzeghənyɛ kənəa 'ya.

⁴ Ma newe 'ya sha ŋkwa ne, dəkwə 'ya te sefə nya wəba nya kesawa laka bela kwa gwela le ləmbə nya wəba nya tse ghwə hwe. Dzasle ləmbəa shɛ kwa waŋe. Kala lɛ nya keta ta kwa ghwə ɓele ŋkwa nya te tepe ta ŋkɛ.

⁵ Ma te tepe ta ŋkɛ ne, wəfaɗe kweci wəshi kala wəshi nyi nza mpi hwe. Kala pa ta wəndə ŋelɛ pa ta nci.

⁶ Ma te yayata wəndəa nci ne, wəfaɗe kema ba'a wəfaɗe bidzə.

⁷ Tiɗiɗia tiɗiɗia jajɛghwa ta nci, kala yɛ cɛpea leve ta sla seɗa ta nci, kaɓayɛ ɓayɛ kala mze kwa ghwə ghwə nya shɛanɛa.

⁸ Dzeve ta wəndə ŋelɛ ya mbeyitere yayata bidzəa nci. Jive laka bela nyi wəfaɗe zhɛreghe geva dzevea shɛhɛ kala yɛ kema ta nci ba'a yɛ bidzəa nci.

⁹ Kakwaɗe kwaɗe ghəa nci mɛa bidzəa nci. Tiɗiɗi dzeghwa yayata wəndəa nci te kema kaɗema kazhɛre geva te sebe.

¹⁰ Kema ya wəfaɗe te yayata wəsə nya nza shɛ mpi hwe: kema ta wəndə ŋelɛ ya kwa kema, kema ta nivɛrə ya laka bela kwa zeme, kema ta mca ya laka bela kwa gwela ba'a kema ta zele ya kwetere wəmbə.

¹¹ Kweci bake hwa bidzəa nci ne, kepele pele dzeme yitea ghweme, kakwekwaɗe geva hɛ, geva ta nci yadəpə kweci nyi bake.

¹² Yayata wəndəa nci kadzeghwa tiɗiɗi te kema ta ŋkɛ. Te ŋkwa nya ɗe hɛ lə hɛ kaɗema kazhɛre geva.

¹³ Ma kwelɛ wəshi nyi nza shɛ mpi hwe ne, kanewe kwete wəsə wəndə kala laɗe ta ghwə, kala wəvəzə nyi kegegaŋkəɗə hɛ. Kawaŋe ŋkwa ghwəa shɛ ba'a kaperaslɛaslɛa ŋkɛ.

¹⁴ Kalə ba'a kase wəshi nyi nza shɛ mpi hwe kahe kahe kala slesla ta va.

¹⁵ Ma mba 'ya kanewe wəshi nyi nza nyi mpi hwe ne, dəkwə 'ya te kwete wəsə kala seɗa ta wəmata hwa hɛɗi vare yayata wəsə nya nza nya mpi hwe.

¹⁶ Kala kwacaregesla ɓele wəshi nyi kala seɗa ta wəmata shɛhɛ. Kanya kwetɛŋe nza ta nci ba'a kala wəsə nya nza kwete wəsə nya kala seɗa ta wəmata shɛ kwa kwete hɛ.

¹⁷ Wərə hɛ kalə laka bela nyi wəfaɗe nyi kaɗema hɛ kazhɛrete geva te ghəa nci.

¹⁸ Kazhɛ ŋkwa ghazlənə va biya ta nci kadzeme yitea ghweme ba'a dzasle ntsə nyi keslesla dzeyi te hɛ.

¹⁹ Ma kadzeghwa wəshi nyi nza shɛhɛ mpia shɛ hwe ne, kadzeghwa wəshi nyi kala seɗa ta wəmata shɛhɛ vare bela ta nci. Ma kazlə hɛ kadzeme yitea ghweme ne, kazlə wəshi nyi kala seɗa ta wəmata shɛhɛ perə.

²⁰ Ma kalə hɛ te ŋkwa nya ɗe hɛ ne, kalə wəshi nyi kala seɗa ta wəmata shɛhɛ zlaɓe le hɛ, kwa nza ŋkɛ ɗe ta ghəa wəshi nyi nza nyi mpi hwe nde dzeghwa le wəshi nyi kala seɗa ta wəmata nyi.

²¹ Ma kadzeghwa hɛ ne, kadzeghwa wəshi nyi kala seɗa ta wəmata shɛhɛ, ma kaghereŋe hɛ, kaghereŋe wəshia shɛhɛ, ma kazlə hɛ sate te hɛɗi, kazlə wəshia shɛhɛ perə, kwa nza ŋkɛ, ɗe ta ghəa wəshi nyi nza shɛhɛ mpi hwe nde dzeghwa le wəshia shɛhɛ.

²² Ma kənəa ghəa wəshi nyi nza shɛ mpi hwe ne, kwete wəsə ya shɛ kala lemba, kala kwacaregesla slesla ŋkɛ.

²³ Ma mbeyitere wəsə nya kala lemba shɛ ne, pepelake bidzəa yayata wəsə nya nza nya mpi hwe kakwaɗe kwaɗe ghəa nci. Geva ta nci yadəpə kweci bidzə nyi bake.

²⁴ Ma fa gaka ta bidzəa nci 'ya kwa nza hɛ kazlə ne, kala mewədzərə ta ghwa, kala berazlɛ ta va, kala gaka ta Shala nde berete ba'a kala gaka ta wəvəsəa ka sewajɛ. Ma keghereŋe hɛ ne, pa hɛ ŋzlete bidzəa nci.

²⁵ Ma kənəa lemba nya kənəa ghəa wəshi nyi nza nyi mpi hwe ne, kagaka kwete wəsə perə.

²⁶ Ma pelɛagha ne, kanewe kwete mbe wəsə kala pelɛ kwa lɛa lɛa ghweme nya nza pa ta ŋkɛ kala pasla ta meghe. Ma pelɛ ghəa wəsə nya kala pasla shɛ ne, kwete wəsə nya nza pa ta ŋkɛ kala wəndə ŋelɛ ya shɛ.

²⁷ Ma newe 'ya sha ŋkwa ne, kaslesla wəsəa shɛ kala mze nya keɓayɛ ɓayɛ, kala wəsə nya nza ŋkɛ dzasle kwa ghwə. Ma slə mɛa dəŋəa ŋkɛ kadzeme dzemedze ba'a kasawa sawase ne, dəkwə 'ya te kwete wəsə kala ghwə nya kewaŋe ŋkɛ laka yayata bela.

²⁸ Ma waŋe nya kedzaslete ŋkɛ ne, yipə yipə ŋkɛ le maɓelɛaŋe nya kewaŋe ŋkwa dzate te ləmbəa kwa nza va katese. Gheŋkɛ ya kawaŋea zləvəa Mahwətə. Ma kwa nakɛ 'ya ne, tehwepərə 'ya njifə kema mbe hɛɗi. Tagha gɛ, ma fa 'ya ne, kageze ɗa ghena kwete wəndə.