Ɛstɛr 7 - Ghena ta ShalaKele ta zləvə seyi te Haman 1 Pa yɛ meghe le Haman se kezha zeme wəshi kezemea gəsəkə nya takɛ Ɛstɛr, male ta meghe. 2 Ma te kwa bake ta hɛ, te və nya keɗaŋe wəsə kezeme hɛ ne, ma ke meghe 'yɛwakɛ va Ɛstɛr: «Wa wəsə nya mawe na kasəkwə va 'ya wa Ɛstɛr? Ɗeke ɗeke 'ya kezha mene wəsə nya mawe na. Ya bela ta hɛɗi meghea ɗa ŋkɛ ne, kave ŋa 'ya.» 3 Ma ke Ɛstɛr nya kamale ta meghe: «Maze yawe, kenza nde kakemave zlaɓa ta meghe 'ya, kenza ŋkɛ megela sha gha ne, wa nya wəsə nya ɗe 'ya nya: Mbele ta mpia ɗa le ŋa mpia hwelefe ta ɗa ya'yɛwe 'ya. 4 Kwa nza ŋkɛ, nahe mbeli kepamte n'yɛ le mbelia ɗa kezha mpə n'yɛ, kezha sla ghə te ghen'yɛ ba'a kezha za sebe te ghen'yɛ. Ma ya kaka mavashi ba'a kaka kwaterashi pamte n'yɛ mbeli ne, nza ghena shɛ kageze 'ya we. Kwa nza ŋkɛ katsakɛ ɗa nyagha kezha se sha gha kabeze ŋa mehele we.» 5 Tagha gɛ, ma ke meghe Sɛrsɛs 'yɛwete va Ɛstɛr: «Wa wəndə nya kekelete zəzə kala nya wa? Tema wəndəa shɛ wa?» 6 Ma ke Ɛstɛr zhɛnete: «Haman, nde jaga ta n'yɛ, nde ghema ta n'yɛ, wəndə nya ndiremia mehelea shɛ!» Kwetɛ kwetɛŋe mehele ta Haman kwa kema ta yɛ meghe le male ta ŋkɛ. 7 Pelɛhetɛme meghe satenyɛ kənəa wəsə kezeme le wənə le wənə, pa dzawanyɛ kwa ntsa ta ghɛ meghe. Pa Haman hendave nda geva ke Ɛstɛr kampi nda dzeve baŋe mpia ŋkɛ kambele, kwa nza ŋkɛ nahe ŋkɛ keɗepete nahe meghe ketarete kapesle ŋkɛ. 8 Ma nda same meghe kwa ntsa ne, meɓelahe ŋkɛ yitea wəsə keɓelahe nya zhɛne mpia ŋkɛ Ɛstɛr te. Tagha gɛ, ma ke meghe tsate lewela: «Wəndə nya ɗe kaɓelahe le male ta meghe kaberete kwa ntsə ta ɗa ki ghɛa ɗa na?» Tewə meghe kekiɗimte ghena shɛ ne, pa ka mene slene dəpəmte kema ta Haman le zlave. 9 Ma ke Harbona, kwete nde tsewe tsewe ta meghe shɛ: «Kwete sheghwə yaleyi Haman ki ghɛa ŋkɛ gare mɛtre bakemsə mcɛfeghəmbe dzeme yitea ghweme kezha hwepe Mardoshɛ nya kemenete slene ganyɛ yitea mbele mpia ŋa.» Ma ke meghe: «Hwepeyi mə Haman ŋalawe te.» 10 Pa mbeli hwepeyi Haman te sheghwə nya hite ŋkɛ kezha Mardoshɛ. Tagha gɛ, gweɗakwe hwepe ta wənəa meghe. |
La Bible en langue Kapsiki avec les livres deutérocanoniques © Alliance Biblique du Cameroun 2012.
Bible Society of Cameroon