Ɛstɛr 6 - Ghena ta Shala

Haman kahawe va Mardoshɛ le ɗema ta ŋkɛ

¹ Te viɗia shɛ ne, shaŋe hɛ va kele meghe. Pa ghwenakɛ ŋkwa kezha kele nda palepa ta wəshi nyi mene ka meghe kase, pa mbeli jaŋgate nda.

² Pa mbeli ntsate ŋkwa nya nza ghena ta ntsehwele nya menete yɛ Bigtan le Tɛrɛsh, ka tsewe tsewe bake nyi keya mɛ degha ba'a nyi keɗe kapesle meghe Sɛrsɛs nda ncɛte Mardoshɛ.

³ Tagha gɛ, ma ke meghe 'yɛwete: «Wa wəsə nya ɗave nda mbeli te ke Mardoshɛ wa? Wa kwele nya ndeke nda mbeli wa?» Ma ke ka mene nda slene shɛ: «Wəsə shɛ we.»

⁴ Tagha gɛ, ma ke meghe: «Wa wəndə nya mɛa degha wa?» Ma Haman gɛ, nahe ŋkɛ kedzeki ka'yɛwe hweŋkwa kehwepe Mardoshɛ kadzete sheghwə nya hite ŋkɛ, va meghe.

⁵ Ma ke mbelia ŋkɛ sha meghe: «Haman ya meslete mɛa degha.» Ma ke meghe: «Səaki ŋkɛ.»

⁶ Pa Haman dzeki, ma ke meghe shɛ: «Wa yamene nda mbeli ke wəndə nya ɗe meghe kave nda zləvə wa?» Ma ke Haman mbe ghəa ŋkɛ: «Wa wəndə nya ɗe nya meghe kave nda zləvə wa? Wa wəndəa shɛ keɗema 'ya le ghəa ɗa wa!» Ma ke zhɛnete:

⁷ «Ma keɗe meghe kave nda zləvə ke wəndə ne,

⁸ Pa mbeli seɗaghe nda karalame meghe, kaveyi pelɛ gədəwəa meghe le derə meghe mbe ghəa wəndəa shɛ

⁹ Pa kwete wəndəa mbelia meghe nyi te ghə ne, seɗaghe nda lekwesa ke wəndəa shɛ ba'a veyi pelɛ gədəwəa shɛ. Pa mbeli kabeghe ŋkɛ le gədəwə kalə kadzete ŋkwa kebeke nya mbe meleme, ma ke mbeli sha zlape te kema ta ŋkɛ: Wa nya tsetse mene nda meghe mbeli ke wəndə nya ɗe meghe kave nda zləvə!»

¹⁰ Ma ke meghe sha Haman: «Yana kahe kahe, kelete lekwesa le gədəwə kala nya gezete na, menete nda tsagha ke Mardoshɛ, nde Zhəwif nya kemene slene ki ghɛa meghe. Mba na kezaghə kwete hwa wəshi nyi gezete na pɛtɛ.»

¹¹ Pa Haman kelete karalame ba'a gədəwə. Pa seɗaghe nda karalamea shɛ ke Mardoshɛ, pa veyi pelɛ gədəwə ba'a keleghe kadzete ŋkwa kebeke nya mbe meleme, ma ke sha zlape te kema ta ŋkɛ: «Wa nya tsetse mene nda meghe ke wəndə nya ɗe ŋkɛ kave nda zləvə!»

¹² Ma kwetere wəmbəa ŋkɛ, zhɛne Mardoshɛ kadzeki ghɛa meghe. Ntəŋə Haman kalə kahe kahe sha ghɛa ŋkɛ, tehwepe wənə ve, pa dəpəyi wəsə kənəa kema ta ŋkɛ va hawe.

¹³ Pa gezete nda wəsə nya kemenete nda geva ke Zɛrɛsh, male ta ŋkɛ le ka mcɛhɛnyɛ. Ma ke mbelia ŋkɛ nyi kencɛ nda ntsehwele shɛ: «Ma kenza nde, nde Zhəwif Mardoshɛ, nya ghate nya na kashifə ghəa ŋa mbe kema ta ŋkɛ ne, wəsə shɛ kamenete nda na we, gha nde teteɗe kwa kema ta ŋkɛ, ghəpə yite we.»

¹⁴ Ma mba hɛ mbe geze ghena shɛ ne, nahe wəndə nya ghweneke meghe kese kaheka Haman kalə yitea wəsə kezeme nya menete Ɛstɛr.