Zhɛne Ghwelə yitea Wəshi Mahalegə 29 - Ghena ta Shala

Wəshi nyi menete nda Shala ke ka Israyɛl

¹ Pa Moyize tsenete pɛtɛa ka Israyɛl, ma ke sha hɛ: Ma vəa ŋkwa nya se yɛ kwa Ɛzhipte ne, nahe yɛ kenakɛ pɛtɛa wəshi nyi menete nda Mahwətə ke Farawon, ke ka mene slene ta ŋkɛ ba'a ke hɛɗia ŋkɛ pɛtɛ le ntsə ta ŋayɛ.

² Nahe ntsə ta ŋayɛ kenakɛ yaka nyi jama jama nyi vate ŋkɛ te hɛ ba'a yɛ wəshi nyi dzawe dzawe le wəshi meŋele nyi menete ŋkɛ.

³ Ama pa ɓeshi ne, kendeke ŋayɛ mehele Mahwətə kezha ɗepe wəsə nya kemenete geva we, kendeke ŋayɛ ntsə ŋkɛ kezha newe ŋkwa we, ya sleme kezha fa ghena we.

⁴ Kava wəfaɗemsə ne, nahe kendeke ŋayɛ dzeghwa te ɓerama. Kehalenji yɛ lekwesa ta ŋayɛ, ya yɛ tsahwa ta ŋayɛ we.

⁵ Kese yɛ kazeme ɗafa ba'a kasa tɛ, ya kweci wəshi kesa nyi kemesle mesle, yitea ɗepe yɛ gheŋkɛ ya kaMahwətə Shala ta ŋayɛ we.

⁶ Ma kwa ntsehe yɛ teke ne, pa Sihon, meghe nya mbe Hɛshebon ba'a Og, meghe nya mbe Bashan se kezha ha ɓəmə mpa, ama pa gheɓəmə ɗate hɛ.

⁷ Pa gheɓəmə kelehwe hɛɗia nci ba'a ndeke nda ke hwelefefia Rəbɛn, Gad ba'a ke kwete bela ta hwelefefia Manasɛ.

⁸ Kateya ghena nyi mbe jikə geva nya yɛ ba'a katemene slene yɛ le hɛ. Ma tsagha ne, katejive yɛ mbe kema mbe wəshi nyi temene yɛ pɛtɛ.

Ya ta jikə geva le Shala megela

⁹ Ka Israyɛl, wa nyi gheyɛ nyi meghereŋe kwa kema ta Shala Mahwətə ta ŋayɛ ɓeshi. Teke yɛ pɛtɛ: mbeli nyi te ghəa ŋayɛ, mbeli nyi te ghəa hwelefefia ŋayɛ, mbelia jama ta ŋayɛ, ka rafe wəshia ŋayɛ, pɛtɛa zhilia ka Israyɛl,

¹⁰ ŋwalea ŋayɛ, mia ŋayɛ ba'a ka se se nyi hwa gheyɛ dzeyi mbe ghedəkwə kezha tsasle ŋayɛ sheghwə ba'a kezha gə ŋayɛ yɛmə.

¹¹ Shala Mahwətə ta ŋayɛ kamene jikə geva le gheyɛ tsetsenya. Shala Mahwətə ta ŋayɛ kaheka ŋayɛ kayɛ jikə geva shɛ laka zeme fela.

¹² Ma tsagha ne, katenza yɛ kambelia ŋkɛ ba'a katenza ŋkɛ kaShala ta ŋayɛ, kala nya meɗeyi ŋayɛ ŋkɛ ba'a kala nya zemete nda ŋkɛ kafela ke ka shihɛ ŋayɛ Abraham, Izak ba'a Zhakob.

¹³ Ma jikə geva nya geze ŋayɛ nya 'ya ba'a nya heka ŋayɛ nya 'ya kayɛ laka zeme fela ne, deke kaŋa ŋayɛ nza ŋkɛ we,

¹⁴ ama kaŋa yayata wəndə nya meslete teke kwa kema ta Shala Mahwətə ta ɓəmə ɓeshi, tsagha kaŋa pɛtɛa mbeli nyi keɗema teke hwa gheɓəmə ɓeshi.

¹⁵ Gheyɛ le ghəa ŋayɛ ne, nahe yɛ keɗepe tsema tsema teməhwe temə gheɓəmə kwa Ɛzhipte ba'a tsema tsema jive ɓəmə gheɓəmə mbe hɛɗi nyi jive ŋayɛ nyi yɛ mbe.

¹⁶ Nahe yɛ kenakɛ wəshi nyi ndiremi ndiremi kashasha ba'a wəshi nyi zhɛrete mbelia shɛhɛ kashala: wəshi nyi menete mbeli yitea sheghwə, pelɛ, mze kwa tɛawetɛa ba'a mze kwa tere tere.

¹⁷ Yagha za keɗema male, hwelefe keɗema pelə tezhɛre nda wəmbə ke Shala Mahwətə ta ŋayɛ ɓeshi kezha mene nda slene ke shala nyi te hɛɗia shɛhɛ. Yagha kwete wəndəa ŋayɛ kanza kaslərəa wəfe nya mte mbeli ve keɗema nya ndɛalɛa.

¹⁸ Ya kwete ma kwa fate ghena fela nyi kwete wəndəa ŋayɛ ne, katetsahe ghəa ŋkɛ ŋkɛ, ma ke: «Megela tenza 'ya, ya 'ya nza kamene wəsə nya ɗe 'ya. Kwa nza ŋkɛ ne, kaganda ɗema hɛɗi nya keɓasle ɓasle kaɗe yɛmə.»

¹⁹ Katekelemte Mahwətə te wənə we. Katezereghete Mahwətə kahawe wəndəa shɛ va kweci shala we. Kateme hwepe wənəa ŋkɛ kənəa wəndəa shɛ. Kateve pɛtɛa bezla nyi kerafete geva mbe palepa nya ŋkɛ kənə ba'a kateza sləa ŋkɛ ŋkɛ te hɛɗi lema.

²⁰ Katekelemte Mahwətə shave hwa hwelefefia Israyɛl kezha ve ndiremi kadzeghə, kala bezla nyi mbe jikə geva nya kerafete geva mbe palepa ta wəsə mahalegə nya.

Katemene wəshi nyi gezete Mahwətə ŋkɛ

²¹ Ma vəa ŋkwa nya tenakɛ zereghwe ba'a ndiremi nyi vate Mahwətə te hɛɗia ŋayɛ mbeli nyi keteya kwa sebe ta ŋayɛ, geze ta ŋkɛ, ŋwalea ŋayɛ, tsagha ka mentiɓəa sli nyi ketese te hɛɗi nyi cakeɗa cakeɗa ne, ma tegeze hɛ:

²² «Pɛtɛ hɛɗia nci ka laɗe ta ghwə, kaghwene hwetɛ ba'a kaghwə. Wəsə shɛ kanza mbeli katsawete keɗema kamɓete te we. Gwəzə shɛ kapese te we. Ma ɗa nya te ne, yipə yipə le ɗa nya kese te Sodome ba'a Gomore, te Adma ba'a Seboyim, meleme nyi zamte sebe Mahwətə te hɛ va ghwə ta hwepe wənəa ŋkɛ.»

²³ Ma tagha gɛ, ma ke pɛtɛa kweci hwelefefi sha te'yɛwe: «Va wa menete nda Mahwətə ke hɛɗi nya kala nya wa? Va wa hwepenyɛ wənəa ŋkɛ kwele kwele wa?»

²⁴ Ma ke mbeli sha tezhɛne: «Va nya wəfəyite jikə geva ta Shala Mahwətə ta ka shihɛ nci, nya menete ŋkɛ le hɛ vəa ŋkwa nya fəakave hɛ ŋkɛ mbe Ɛzhipte hɛ.

²⁵ Ntəŋə hɛ lənji yitea mene nda slene ke kweci shala ba'a yitea gwəɗəŋə mbe kema ta nci, shala nyi ɗepema hɛ ba'a nyi ɗema Mahwətə kendeke nda kaŋa nci ke hɛ.

²⁶ Vatse hwepete wənə Mahwətə kwele kwele va hɛɗi nya ba'a keleke pɛtɛa bezla nyi kerafete geva mbe palepa nya ŋkɛ kadzete.

²⁷ Pa Mahwətə nteɗemte hɛ te hɛɗia nci va ghwə ta hwepe wənəa ŋkɛ. Pa ŋkɛ ŋkamte hɛ kadzete kwete hɛɗi nya nza nya hɛ mba te ɓeshi.»

²⁸ Ŋa Shala Mahwətə ta ɓəmə veyi geva wəshi nyi tewəfərə. Ama wəshi nyi kencɛte geva ne, ŋa ɓəmə hɛ, gheɓəmə ba'a ŋwalea ɓəmə kaghala ghala, yitea mene slene gheɓəmə le pɛtɛa ghena nyi mbe wəsə mahalegə nya.