Daniyɛl 3 - Ghena ta Shala

Pa ta wəndə nya le mze kwa tere tere

¹ Pa meghe Nabəkodonozor vɛsəte pa ta wəndə le mze kwa tere tere: mɛtre mahekenemsə dzeme ta ŋkɛ yitea ghweme ba'a mɛtre mahekene bezlea ŋkɛ. Pa ŋkɛ sleteyi ŋkɛ te ŋwela ta Dəwra, mbe sla ta hɛɗia Babilone.

² Ma kwa sebe ta ŋkɛ, pa ghwenakɛ mbeli kaheka mbeli nyi te ghə, mbelia jama, ka ŋgwamna, ka ncɛ ntsehwele, ka kese slibə, ka meha ghwə, ka ɗepe wəshi mahalegə ba'a pɛtɛa ka mene slene nyi dzeyi te ghəa sla ta hɛɗi, yitea se hɛ kamene gəsəkəa pa ta wəndə nya sleteyi nya meghe Nabəkodonozor.

³ Tagha gɛ, pa pɛtɛa ka mene slene nyi jama jama shɛhɛ tsenete geva ba'a ghereŋenji kwa kema ta pa ta wəndəa shɛ kezha gəsəkə.

⁴ Ma ke wəndə nya te ghəa gəsəkə zlapete ghena: «Gheyɛ pɛtɛa hwelefefi nyi kese te pɛtɛa hɛɗi ba'a nyi kegeze pɛtɛa ghena, fa mə ghena nya:

⁵ Ma vəa ŋkwa nya tefa gaka ta tereme, shela, getsepele, gagera, ŋgwəleŋə, ghɛaɗɛa ghɛaɗɛa ba'a mama ta wəshi ketsa yɛ ne, kategwəɗəŋə yɛ ba'a katehawe yɛ va pa ta wəndə nya le mze kwa tere tere nya sleteyi nya meghe Nabəkodonozor.

⁶ Ma yayata wəndə nya ketegwəɗəŋəma kezha hawe ve ne, katenegha ŋkɛ mbeli kwa ŋkwa nya tse ghwə nya wəba.»

⁷ Tsagha gɛ, ma fatema ta pɛtɛa hwelefefi nyi kese te pɛtɛa hɛɗi ba'a nyi kegeze pɛtɛa ghena ke gaka ta tereme, shela, getsepele, gagera, ŋgwəleŋə, ghɛaɗɛa ghɛaɗɛa ba'a mama ta wəshi ketsa ne, kagwəɗəŋə hɛ ba'a kahawe hɛ va pa ta wəndə nya le mze kwa tere tere nya sleteyi meghe Nabəkodonozor.

Ka mcɛhɛnyɛa Daniyɛl kaɗema hawe va pa ta wəndə

⁸ Tewə ketemə kwetere wəmbəa ŋkɛ ne, pa kweci ka Babilone se ba'a ndeke nda fete ke ka Zhəwif.

⁹ Ma ke hɛ sha meghe Nabəkodonozor: «Meghe yawe, hɛyi ŋa Shala teghweme!

¹⁰ Meghe yawe, ma pa na gezete, gha ghəa ŋa: ‹Yayata wəndə kategwəɗəŋə ba'a katehawe va pa ta wəndə nya le mze kwa tere tere kefate gaka ta tereme, shela, getsepele, gagera, ŋgwəleŋə, ghɛaɗɛa ghɛaɗɛa ba'a mama ta wəshi ketsa.

¹¹ Ma keɗema wəndə kagwəɗəŋə ba'a kahawe va pa ta wəndəa shɛ ne, katenegha ŋkɛ mbeli taghanyɛ kwa ŋkwa nya tse ghwə nya wəba.›

¹² Yawa, meghe yawe, nahe Shadrak, Mɛshak, Abɛd-Nɛgo nyi kaka Zhəwif, nyi ndeke nda slene na ke hɛ mbe sla ta hɛɗia Babilone, keɗema ɓela ghena nya gezete na. Nahe hɛ keɗema mene nda slene ke yɛ shala ta ŋa ba'a keɗema hawe va pa ta wəndə nya le mze kwa tere tere nya sleteyi na.»

¹³ Tagha gɛ, pa Nabəkodonozor gezete le wənə le wənə kezha fəke nda Shadrak, Mɛshak ba'a Abɛd-Nɛgo mbeli. Pa mbeli fəke hɛ kase kadzawa kema ta meghe.

¹⁴ Ma ke meghe 'yɛwete va hɛ: «Shadrak, Mɛshak ba'a Abɛd-Nɛgo, kaganda ɗema yɛ mene nda slene ke yɛ shala ta ɗa ba'a ɗema yɛ hawe va pa ta wəndə nya le mze kwa tere tere nya sleteyi nya 'ya na?

¹⁵ Katezhɛne yɛ kafa gaka ta tereme, shela, getsepele, gagera, ŋgwəleŋə, ghɛaɗɛa ghɛaɗɛa ba'a mama ta wəshi ketsa. Ɗeke ɗeke yɛ tsetsenya kezha gwəɗəŋə ba'a kezha hawe va pa ta wəndə nya sleteyi nya 'ya tse gɛ na? Ma kehawema yɛ ve ne, taghanyɛ tebete ŋayɛ mbeli kwa ŋkwa nya tse ghwə nya wəba. Nyama shala nya kenza kazləgwəke ŋayɛ shave mbe dzeve ta ɗa wa?»

¹⁶ Ma ke Shadrak, Mɛshak ba'a Abɛd-Nɛgo zhɛnete nda ke meghe: «Meghe yawe, ghena va ghen'yɛ kezha zhɛne ŋa te ghena nya we.

¹⁷ Wərə Shala ta n'yɛ, Shala nya mene nda slene ghen'yɛ kambeleke n'yɛ. Kaganda ne, katembele n'yɛ ŋkɛ va ŋkwa nya tse ghwə nya wəba kwa ba'a va berete ta ŋa, meghe yawe.

¹⁸ Ya gheŋkɛ ɗema kemenete ne, ɗepete megela kaɗema ghen'yɛ katemene nda slene ke yɛ shala ta ŋa ba'a katehawe va pa ta wəndə nya le mze kwa tere tere nya sleteyi nya na meghe yawe.»

¹⁹ Tagha gɛ, pa Nabəkodonozor hwepete wənə kwele kwele. Pa ŋkɛ heɗete nda kema ke Shadrak, Mɛshak ba'a Abɛd-Nɛgo. Pa ŋkɛ gezete kezha mehate ghwə mbeli mberefaŋe zhigə za ma ke nya ghalanza kwa ŋkwa shɛ.

²⁰ Kwa sebe ta ŋkɛ ne, pa gezete nda ke mbeli nyi berete berete ma hwa ka sewajɛa ŋkɛ kezha hwepete Shadrak, Mɛshak ba'a Abɛd-Nɛgo, yitea negha hɛ kadzawa ŋkwa nya tse ghwə nya wəba.

²¹ Taghanyɛ ne, pa mbeli hwepete mbeli nyi mahekene shɛhɛ le karalamea nci, serela ta nci, tɛagwarea nci ba'a derəa nci kənəa geva. Pa mbeli beteyi hɛ kwa ŋkwa nya tse ghwə nya wəba.

²² Kala ghena nya dzawe nya gezete meghe ne, nahe mbeli kenefekɛ ŋkwa nya tse ghwə kwa kwele kwele. Tagha gɛ, pa ghwə tsemte ka sewajɛ nyi kese kabete Shadrak, Mɛshak ba'a Abɛd-Nɛgo kwa ghwə.

²³ Ma kaŋa mbeli nyi mahekene shɛhɛ, Shadrak, Mɛshak ba'a Abɛd-Nɛgo ne, kehwepe hwepe beteyi geva hɛ te tepe ta ŋkwa nya tse ghwə nya wəba kwa.

Shala kambele ka mcɛhɛnyɛa Daniyɛl va ghwə

²⁴ Pa meghe Nabəkodonozor fate kagha cimə hɛ. Heɓake ŋkɛ nzanyɛ ba'a pelɛhetɛme ŋkɛ sate te ŋkwa kahe kahe. Ma ke 'yɛwete va ka ncɛ ntsehwele ta ŋkɛ: «Ashɛ mbeli mahekene kehwepe hwepe yabeteyi gheɓəmə kwa ghwə wəka?» Ma ke hɛ zhɛnete nda: «Tsagha shɛ, Meghe yawe!»

²⁵ Ma ke meghe gezete zhɛkwa: «Wa raberə newe mbeli 'ya wəfaɗe kaɗema kehwepe hwepe kadzeghwa mbe ta ghwə kandəkɛma hɛ ŋkɛ wa? Kala pa ta wəzege ta yɛ shala pa ta nde wəfaɗe ta nci.»

²⁶ Pa Nabəkodonozor hendave nda geva ke ŋkwa kedzawa ŋkwa nya tse ghwə nya wəba kwa. Ma ke zlapete: «Shadrak, Mɛshak ba'a Abɛd-Nɛgo, gheyɛ ka mene slene ta Shala tehwə ghweme, same ŋayɛ mə ba'a nde mə!» Tagha gɛ, pa Shadrak, Mɛshak ba'a Abɛd-Nɛgo samenji mahekene nci kwa ghwə.

²⁷ Pa mbeli nyi te ghə, mbelia jama, ka ŋgwamna ba'a ka ncɛ nda ntsehwele ke meghe tsenete geva. Pa hɛ nakɛ mbelia shɛhɛ: kekwaɗakɛ geva ta nci ghwə we, keghamakɛ geva shintia ghəa nci we, kenza yɛ lekwesa ta nci ketere tere we, kazəŋwə hɛ kan'yia ghwə we.

²⁸ Ma ke Nabəkodonozor gezete: «Tsa nda ɓəmə hana ke Shala ta Shadrak, Mɛshak ba'a Abɛd-Nɛgo, gheŋkɛ nya keghweneke nde ghwene ta ŋkɛ ba'a nya kembelete ka mene slene ta ŋkɛ, kwa nza ŋkɛ nahe hɛ kendeke nda ghəa nci. Nahe hɛ kedzawanji wəmbəa ghena nya gezete meghe, kesahwe nda yaka ke ghəa nci kenya mene nda slene hɛ keɗema nya hawe hɛ va shala nya keɗema kaShala ta nci.

²⁹ Tsetsenya ne, wa nya ghena nya geze 'ya nya: Ma yayata wəndə nya mbe yayata hwelefe, yayata hɛɗi ba'a nya kegeze yayata ghena, nya ketegeze ghena ŋkele ntsə te Shala ta Shadrak, Mɛshak ba'a Abɛd-Nɛgo ne, katencɛhwe ŋkɛ mbeli ba'a katezhɛre ghɛa ŋkɛ kakəsə. Kwa nza ŋkɛ ne, kwete Shala shɛ kambelete ŋkwa kala nya we.»

³⁰ Kwa sebe ta ŋkɛ ne, pa meghe ndeke nda slene ganji ke Shadrak, Mɛshak ba'a Abɛd-Nɛgo mbe sla ta hɛɗia Babilone.

Kwa bake ta shiwəa meghe: wəfe nya wəba

³¹ Ma ke meghe Nabəkodonozor ghwenakɛ nda mɛ ke pɛtɛa hwelefefi, pɛtɛa hɛɗi ba'a pɛtɛa ghena nyi te hɛɗi lema: «Kanjiŋwe ŋayɛ 'ya.

³² Ma wəshi kencɛ wəshi ba'a wəshi meŋele nyi menete ɗa Shala tehwə ghweme ne, nahe 'ya keɗehwe kezha geze hɛ.

³³ Nahe yɛ slene ta ŋkɛ kenza kejama jamanji, nahe wəshi meŋelea ŋkɛ kenza keberete beretenji. Nahe meghea ŋkɛ kenza kameghe nya kaghala ghala, nahe berete ta ŋkɛ kenza keshi keshi.