Cimə nya zeɗe ma 7 - Ghena ta Shala

Mi ba'a deghelɛshi

¹ Zhɛne geva kase, zhɛne geva kase gha wəzha ta Səlam! Zhɛne geva kase, zhɛne geva kase kezha newe ŋa ghen'yɛ gi! Yitea wa newe wəzha ta Səlam nya kwa wəvəsəa wetse bake yɛ wa?

Mempɛhweta

² Wəzha ta meghe, nahe yɛ seɗa ta ŋa kenza kendeɗe ndeɗenji mbe yɛ tsahwa ta ŋa. Nahe ŋkwa nya dzeyi yitea dəŋəa ŋa kenza kala zhɛɗa nya hate nde ha zhɛɗa.

³ Nahe wədəa ŋa kenza kala zlerekwe nya kenehema le tɛ ganyɛ. Nahe hwəa ŋa kenza kala təɗəmə ta ha nya dzasle ghwə ta wəfe nyi ganji ganji.

⁴ Nahe yɛ ŋ'wa ta ŋa nyi kenza kala zhɛgwəa lɛməa kwi bake, kala nehwelɛməa kɛme.

⁵ Nahe welɛa ŋa kenza kala cɛ nya biya nya le slene ta cewe. Nahe yɛ ntsə ta ŋa kenza kala ndərə nyi mbe Hɛshebon, nyi mɛa ŋkwa keshave mbe meleme nya wəba shɛ. Nahe ŋshia ŋa kenza kala cɛ nya biya mbe Liban, nya kaŋkwa keya ŋkwa mbe kema ta Damas.

⁶ Nahe ghəa ŋa kenza ntare kala ghweme ta Karmɛl. Nahe shintia ghəa ŋa nyi bebiya bebiya kenza kala wəsə kwa gheme, nahe meghe kehwepate geva te ndere ta nci.

⁷ Kendeɗe ŋa ba'a keganyɛ ŋa na, gha nya ɗe 'ya, wəzha ganyɛa ɗa.

⁸ Nahe biya ta ŋa kenza kala peha, nahe yɛ ŋ'wa ta ŋa kenza kala yɛ ya ta ŋkɛ.

⁹ Ma 'ya gezete: «'Ya katedzeme peha, 'ya katenda yɛ ya ta ŋkɛ.» Nza yɛ ŋ'wa ta ŋa sha 'ya kala ghwedzekwe ta rɛzɛŋe. Nza zəŋwəa sefəa ŋa kala zəŋwəa yɛ ya ta wəfe.

¹⁰ Nza mɛa ŋa zeɗekə kala tɛ ganyɛ. Kaganda ne, kala tɛ ganyɛ nya kewəmbəyi geva kaŋa wəndə nya ɗe 'ya ba'a nya kedzawa mɛa ɓə vəa ŋkwa nya nza gheɓə yitea hɛ.

Degheli

¹¹ Nahe 'ya kenza kaŋa wəndə nya ɗe 'ya, 'ya yaɗe ŋkɛ.

Zeɗe nza ta wəndə nya ɗe mbeli Degheli

¹² Gha nya ɗe 'ya, nde, ngara ɓə kadzemte, ngara ɓə kalə kahɛ mbe meleme.

¹³ Katelə mə kadzehwa yɛ rɛzɛŋe masheke masheke, katenewe mə kenza nde ɗa yaɗa hɛ, kenza nde ghwə yabete hɛ ba'a kenza nde ghwə yamene yɛ kwakweme. Tagha gɛ ne, katencɛ ŋa ɗe ta ɗa 'ya.

¹⁴ Kazəŋwə yɛ ya ta wəfe ta ɗe kizə kizə. Nahe pɛtɛa mama ta yɛ ya ta wəfe ganji kenza dzeyi mɛ gelembe ta ɓə, nyi kamɛnɛfɛ ba'a nyi kameghweme. Wəndə nya ɗe 'ya, nahe 'ya kewəmbəyi hɛ kaŋa ŋa.