Cimə 46 - Ghena ta Shala

Hwa gheɓəmə Mahwətə nde berete

¹ Se va wəndə nya te ghəa cimə. Ciməa ŋwalea Korɛ. Yitea wəsə ketsa.

² Shala ya kaŋkwa kewəfərə ta ɓəmə ba'a kaberete ta ɓəmə, ɗeke ɗeke ŋkɛ kevə kevə kezha kemane ɓəmə va ndiremi.

³ Vatse ɗema gheɓəmə kaghazlənə ya hɛɗi nza kagaŋkəɗə, ya yɛ ghweme nza kaŋzleŋzla kadzawa zeweve ta yɛ ndərə,

⁴ ya yɛməa nci nza kagaka ba'a kamene hwɛfɛ, kagegaŋkeɓe ba'a gegaŋkəɗə yɛ ghweme. Zhɛne mpi.

⁵ Gheŋkɛ ya kahələ nya ve nda zlama yɛ dzeve ta ŋkɛ ke meleme ta Shala, kaghɛ nya keveyi geva tekeleke ma hwa ghɛa Shala tehwə ghweme.

⁶ Shala ya mbe melemea shɛ, kateŋzla nde we. Kiɗima ta ŋkwa ne, kakemane ŋkɛ Shala.

⁷ Kaghwəghwə hwelefefi, kagaŋkəɗə yɛ hɛɗia ka meghe. Va ŋgezle ta Shala ne, karɛɗɛ hɛɗi.

⁸ Hwa gheɓəmə Mahwətə nde berete, Shala ta Zhakob ya kaŋkwa kewəfərə ta ɓəmə. Zhɛne mpi.

⁹ Se mə kanewe wəshi nyi menete Mahwətə, wəshi nyi bezemte ŋkɛ te hɛɗi lema.

¹⁰ Kafɛfɛa yɛ mpa ŋkɛ pa te mendɛkwe ta hɛɗi, kahwehweshi yɛ rəgi ŋkɛ, kaɓeɓele yɛ megha ŋkɛ, kandəndə ghwə ŋkɛ yitea yɛ wəmata kempa.

¹¹ Ma ke zlapete: «Bete mə wəshi kempa, ɗepete mə 'ya ya kaShala. 'Ya nde sleke hwelefefi, 'ya nde sleke hɛɗi lema.»

¹² Hwa gheɓəmə Mahwətə nde berete, Shala ta Zhakob ya kaŋkwa kewəfərə ta ɓəmə. Zhɛne mpi.