Cimə 4 - Ghena ta Shala

Deke gha nde ve ɗa kwelɛŋe Mahwətə

¹ Se va wəndə nya te ghəa cimə. Yitea wəshi ketsa nyi nza zewe te hɛ. Ciməa David.

² Zhɛnete, vəa ŋkwa nya tsa ŋa lewela, Shala yawe, gha nde ve ɗa nza tiɗiɗi. Ma vəa ŋkwa nya se 'ya kasa yaka ne, nahe na keyakɛ ɗa. Təhwə təhwə, fate səkwə ghə ta ɗa.

³ Gheyɛ mbeli, hwa'a tema tezhigə yɛ mbe ɓelama zləvəa ɗa wa? Hwa'a te nyama və teɗe wəsə kwadanyɛ ba'a tezele tseŋwə yɛ tse wa? Zhɛne mpi

⁴ Ɗepete mə, te ŋa ŋkɛ ŋkwa ve wəndə nya dɛŋe dɛŋe te ghena ta ŋkɛ Mahwətə. Ma vəa ŋkwa nya səkwə Mahwətə 'ya ne, kafa ɗa ŋa ɗa ŋkɛ.

⁵ Ma kebezenyɛ wənəa ŋayɛ ne, menema jaɗafa yɛ ma. Zəzə mə ghena te gezle ta ŋayɛ ba'a nza mə divə. Zhɛne mpi

⁶ Dzeghe mə melɛ nyi kehi ba'a ve nda mə ghə ke Mahwətə.

⁷ Ma ke mbeli kwele kwele sha geze: «Wa nde tencɛ ɓəmə zeɗe nza wa? Mahwətə, ɓelete waŋea kema ta ŋa kənəa ghen'yɛ!»

⁸ Nahe na keveyi zlama kwa wənəa ɗa za ma ke nya te və nya kemave ha ba'a tɛ hɛ kwele kwele.

⁹ Ɓelahema ta ɗa ne, kadzete hɛ 'ya le kwelɛŋe, kwa nza ŋkɛ deke gha Mahwətə nde ve ɗa nza gwezlayɛ.