Amos 7 - Ghena ta Shala

Kwa ghate ta wəsə nya nakɛ Amos: yɛ dzale

¹ Wa nya wəsə nya ncɛte ɗa Shala Mahwətə nya: pa yate dzale helembəŋə kala ləmbə te və nya gha gwəɓə gwəzə, kwa sebe ta nya ghate mbeli kaslahwe nda ke meghe.

² Ma kwa zehwe gwəzə nyi te hɛɗi dzale pɛtɛ ne, ma 'ya: «Təhwə təhwə ŋa 'ya Shala Mahwətə, kelemte mbelia ŋa te wənə. Ma keɗema ŋkɛ tsagha ne, tsema tenza hɛ, ghenci nyi ɓɛhwɛ nyi wa?»

³ Pa Mahwətə zhɛremte zəzə ta ŋkɛ. Ma ke Mahwətə: «Mba katemene geva we.»

Kwa bake ta wəsə nya nakɛ ŋkɛ: ghwə

⁴ Wa nya kwete wəsə nya ncɛte ɗa Shala Mahwətə nya: pa keleke ghwə kezha meha ghwə ta ŋkɛ. Pa ghyana ta ghwə nyagha hasemte yɛmə mbe hɛɗi ba'a teremte hɛɗia Israyɛl.

⁵ Tagha gɛ, ma 'ya: «Shala Mahwətə yawe, fɛake təhwə təhwə ŋa 'ya. Ma keɗema ŋkɛ tsagha ne, tsema tenza mbelia ŋa nyi ɓɛhwɛ nyi wa?»

⁶ Pa Mahwətə zhɛremte zəzə ta ŋkɛ. Ma ke Shala Mahwətə: «Mba katemene geva perə we.»

Kwa maheke ta wəsə nya nakɛ ŋkɛ: zewe kedzeghe tiɗiɗia dewe dzemedze

⁷ Wa nya wəsə nya ncɛte ɗa Mahwətə nya ɓiyitsa: meslete ŋkɛ le ghəa ŋkɛ te zli, zewe kedzeghe tiɗiɗia dewe dzemedze ya yitea dzeve ve.

⁸ Ma ke Mahwətə 'yɛwakɛ va 'ya: «Amos, wa yanewe na wa?» Ma 'ya zhɛnete: «Zewe kedzeghe tiɗiɗia dewe dzemedze.» Ma ke Mahwətə ɓiyitsa: «'Ya kanewe kenza nde tiɗiɗi ka Israyɛl, mbelia ɗa dzemedze kala dewe, kwa nza ŋkɛ katezhɛne 'ya kakele jaɗafa ta nci te wənə we.

⁹ Kateza sebe 'ya te yɛ kələŋəa hwelefe ta Izak, kateŋzla ŋkwa Israyɛl nyi keveyi geva tekeleke 'ya, kateha nda mpa 'ya ke hwelefe ta Zhɛrobowam.»

Amasiya kaŋka Amos shave mbe Bɛtɛl

¹⁰ Ma ke Amasiya, nde dzeghe Shala nya mbe Bɛtɛl ghweneghe nda mɛ ke Zhɛrobowam, meghea ka Israyɛl: «Amos kazele kelemte ŋa te meghe mbe Israyɛl. Mba mbeli nyi te hɛɗi nya kazereghete ghena ta ŋkɛ we.

¹¹ Kwa nza ŋkɛ ne, wa nya ghena nya geze Amos nya: ‹Va kafayɛ temte Zhɛrobowam ba'a katefəmte geva ka Israyɛl cakeɗake le hɛɗia nci.›»

¹² Ma kwa sebe ta ŋkɛ ne, ma ke Amasiya sha Amos: «Slə teke nde kelɛŋə, mbele ghəa ŋa kadzawa Zhəwda. Kwagha ne, wərə na kakemave wəsə kedzawa mɛa ŋa laka nza kande mɛ ŋkwa.

¹³ Ama teke mbe Bɛtɛl ne, sərəakɛ nza kande mɛ ŋkwa, kwa nza ŋkɛ kaŋkwa nya keveyi geva tekeleke kaŋa meghe, kaghɛa meghe.»

¹⁴ Ma ke Amos zhɛnete nda ke Amasiya: «Kese 'ya kande mɛ ŋkwa we, kese 'ya kawəzege ta nde mɛ ŋkwa we. Ya wəshi ba'a newe ghweme te yɛ mekweɗa se slene ta ɗa.

¹⁵ Ama pa Mahwətə kelemte ɗa seyi yitea wəshi, ma ke sha 'ya: ‹Kwiɗi geze nda ghena ta ɗa ke ka Israyɛl, mbelia ɗa.›

¹⁶ Gha gɛ Amasiya, fa ghena nya geze Mahwətə tsetsenya, gha nya kefɛa ɗa kegeze nda ghena ta Shala ke ka Israyɛl, ketseha nda mɛ ke hwelefe ta Izak.

¹⁷ Yawa, wa nya ghena nya geze Mahwətə nya gɛ: ‹Katemene mefətekwə male ta ŋa dzeyi mbe meleme. Kateza sebe kafayɛ te ŋwale tezhili le ŋwalea kwɛa ŋa. Katenehe nda wəvea ŋa mbeli ke kweci mbeli le zewe. Ma gha le ghəa ŋa ne, te hɛɗi nya wale wale temte na ba'a katefə geva pɛtɛa ka Israyɛl cakeɗake le hɛɗia nci.›»