2 Timotɛ 1 - Ghena ta Shala

Pol kanjiŋwe ŋkwa

¹ Se va Pol, wəndə nya ghwenakɛ Yɛsə Kriste laka ɗe ta Shala, nya kezlape nda ghena ta mpi nya kemeɗeyi ɓəmə geva mbe Yɛsə Kriste ke mbeli.

² Ke Timotɛ, wəzege ta ɗa nya kakwajiwənia ɗa: pa Shala Yita ba'a Yɛsə Kriste Nde sleke ɓəmə ndeke ŋa zlaɓa, zhɛ heli ba'a kwelɛŋe.

Tsa hana

³ Ŋ'wese 'ya sha Shala nya mene nda slene 'ya le wənə nya wɛŋe kala nya menete ka shihɛ ɗa. Mbe zəzə ŋa 'ya kwa səkwə ghə 'ya viɗi le veci kaɗema kafɛa yite.

⁴ Kazəzə nehwene ta ŋa 'ya, kaɗe 'ya kalə kanewe ŋa kezha nza wənəa ɗa viɗi va zlama.

⁵ Mbe zəzə yɛ ta ŋa nya kaganda 'ya, kala yɛ nya kese va Loyis, shia ŋa ba'a ŋa meyɛ ŋa Enise nya yɛte hɛ vəashi. Nahe 'ya keɗepe fate fate kayɛ ghena ta Shala na kala hɛ perə.

⁶ Vatse zəzə ŋa 'ya kafeɗeghe wəsə nya kese va Sefəa Shala, nya kemave na vəa ŋkwa nya vaghe dzeve 'ya kənəa gha.

⁷ Kwa nza ŋkɛ ma Sefəa ŋkɛ nya ndeke ɓəmə Shala ne, kenza kezha ve ɓəmə ghazlənə we, ama berete, ɗe ba'a tsefe ghə yave ɓəmə ŋkɛ.

⁸ Vatse gɛ, zhɛma ŋa hawe va negha fete yitea Nde sleke ɓəmə ma, zhɛma ŋa hawe va 'ya, 'ya nya kwa daŋgayɛ tewəmbəreke gheŋkɛ ma. Ama yɛte kasa yaka kala 'ya kezha Ghena kwatenca nya ganyɛ, laka ve ghə te berete nya ve ŋa Shala.

⁹ Gheŋkɛ nde mbelete ɓəmə ba'a nde hekakɛ ɓəmə kezha nza kambeli nyi keveyi geva kaŋa ŋkɛ, kenza tewəmbəreke slene nya menete nda gheɓəmə we, ama tewəmbəreke zəzə ta ŋkɛ ba'a zlaɓa ta ŋkɛ nya kendeke ɓəmə geva laka Yɛsə Kriste tewə pɛtɛa yɛ və kenaka.

¹⁰ Ama tsetsenya ne, nahe zlaɓa shɛ kencɛte ɓəmə geva laka nca ta Nde mbele ɓəmə Yɛsə Kriste. Kwa nza ŋkɛ Yɛsə nde zamte sebe te mte ba'a nde ncɛte mpi nya keɗema kakiɗi laka Ghena kwatenca nya ganyɛ.

¹¹ Kwa ghəa ɗa veyi Ghena kwatenca nya ganyɛa shɛ Shala kezha geze nda ke mbeli laka nza ta ɗa kande ghwene ta Yɛsə Kriste ba'a kande teke nda wəshi ke mbeli.

¹² Tewəmbəreke gheŋkɛ sa yaka nya 'ya. Ama kazhɛ ɗa hawe ve we. Kwa nza ŋkɛ nahe 'ya keɗepe wəndə nya yɛte ghena ta ŋkɛ 'ya ba'a keɗepe berete yave gare ya wəsə nya dapave ɗa ŋkɛ ɗa hwa'a te vecia meha ghwə.

¹³ Veyi ghena nyi gezete ŋa nyi 'ya kaghena nyi kaganda, mbe yɛ ba'a ɗe nya va gheɓəmə laka jikə ta ɓəmə le Yɛsə Kriste.

¹⁴ Yate ghena ganji nyi kedapave ŋa geva, laka kemane ta Sefəa Shala nya mbe gheɓəmə.

¹⁵ Kala nya ɗepe nya na ne, pɛtɛ mbeli nyi te hɛɗia Azi kesərəakɛ ɗa, pa le Fizhɛle ba'a Hɛrmozhɛne.

¹⁶ Pa Nde sleke ŋkwa zhɛakɛ heli yitea ghɛa Onɛzifore, kwa nza ŋkɛ kwele kwele kemanakɛ ɗa ŋkɛ mbe yaka, kese hawe kazhɛ nda va zewe lɛ ta ɗa we.

¹⁷ Ama ntsehema ta ŋkɛ mbe Rome ne, nahe ŋkɛ kese kasepa ɗa le ɗe kwele kwele ba'a nahe ŋkɛ kentsate ɗa.

¹⁸ Pa Nde sleke ŋkwa zhɛakɛ heli yite, yitea kemave ndeɗe ŋkɛ vare Shala te vecia meha ghwə. Nahe na keɗepe slene nya menete ɗa ŋkɛ mbe Ɛfɛze megela.