ZOZUWE 8 - Bible en langue guiziga

Zozuwe muzuma walahay Ay

¹ Bumbulvuŋ a ɓa Zozuwe na: «Ko ki zluwun ta, yo ko ki pula vu ɗike da hĩhĩy ta. Slikiɗi, hila mizli ɗik ngi vurumoyo gar, ara gi vurum ati hirwuy Aya. Ani buy madiɗa ngi Aya, mizli naŋhaya waɗ walahay naŋ ati hirwuy naŋ cek gar na, i vula le asi haŋ ɗiki.

² Ki sa gi ti walahay Ay ati buy ngi raˀa, kaɓa ka migi ti walahay Zeriko ati buy ngi raˀa na ya. Amma so na, zlili ati gineweye gar na, kisa hilaka taŋ da kum, kaɓa gwat ngi lum ngir vurum. Pi soje mipi hirihey sek ɗum ti duba walahaya.»

³ Akẽh na, Zozuwe a slikiɗam ati mizli naŋ ngi vurumoyo ɓa ara zlaka kiɗa vu ati walahay Aya. Zozuwe a wini mizli durmuk kukur makir, mizli miwirwir ngi vurumoy, dar a slina taŋ ngi duvuɗu.

⁴ Zozuwe a ɓa taŋ ɗaˀ le ani: «Puraka ɗi, ki ra pam hiri ɗum ti duba walahaya, anja zar wãˀ ta ɓula, yo ndiram ɗeŋ ɗeŋ gar kumo.

⁵ Ya ati mizli ndra misi bummoˀ na so na, ndr'i sa kiraham ng'avi walahaya. Da taŋ misa boko ti ndra le gur, kaɓa misi zleˀe tuwa na, ndr'i sa kilam ti taŋ.

⁶ Taŋ a sa boko, a sa gindilam ndra, hã i sa kiraham ti taŋ kileŋ avu walahaya. Asi taŋ a sa ɓam ti kwacay taŋ na: ‹A ra kilam ti ndra kaɓa mudumbuŋ zleˀe tuwa ma›, yo ndr'i sa kilam na si.

⁷ Akẽh so na, kumo, kisa boko tir li kum mipam hiri tuwa, joˀ kisa tiɓaka walahaya. Asi mike na, Bumbulvuŋ Buymisemuŋ kum, a vula walahaya le asi haŋ kum.

⁸ Da kum misa tiɓaka walahaya le na, kisa ɗuvaka vu div div da hayaya, kisa gaka kaɓa Bumbulvuŋ miɓa na. Hana i ɓi ya muɓukum di ɗaˀ le, ɓa kisa gakaŋ.»

⁹ Zozuwe a slina taŋ, a ram ng'ar li pi hiri tuwa so. A wam vu ɗum ɗum ar wala ngi Betel ati Ay, kini tisi pas ngi Pastaˀ ngi walahay Ay. Ngi duvuɗ nah na, Zozuwe a hin a wuzla mizli.

¹⁰ Ngi miprik, prik prik na, Zozuwe a slikiɗi, a pura mizli keɗ keɗe. A dirba nah, naŋ ati mizli micawwahaya, taŋ sek a mbuŋ mizli, a ram nga gi vurum a Aya so.

¹¹ Mizli ngi vurumoy cek a ram bummoˀ ati naŋ, a ram puɗak hiri ar walahaya, ara pam kini tir vay muŋ ngi walahay Ay vuna, hurjijiŋ ada ɓaˀ ar wala taŋ ati walahay Aya.

¹² Zozuwe tuwa, a hil sojehey gwat ngi durmuk zlum, waɗ a ɓa taŋ ɓa a pam hiri ɗum ar wala ngi Betel ati Aya, kini tisi pas ngi Pastaˀ ngi walahaya.

¹³ Mizli a ɗiyaka li pi sar taŋ madiɗa naŋ wãˀ na, kini tir vay muŋ ngi walahay. Yo soje ngi dirbahaya kwana, taŋ kini tisi pas ngi Pastaˀ naŋ. Ngi duvuɗ nah na, Zozuwe a hin ar sozo.

¹⁴ Buy Aya, naŋ mupura kanah na, naŋ ati mizli naŋhay gar, a slikiɗam kutum, a bam nga kiɗa Israyeleye ar mazlaka jiviɗ migweˀ avu wuzlaɓuh mikirɗa kirɗak. Dambalaka soje Israyeley a pam hiri le ti duba walahaya na, buy Ay a si na ta.

¹⁵ Zozuwe ati Israyeleye gar, a pulaka vu taŋ mbak da mizli Ayay a kiɗaka taŋ, a kilam a mbuŋ taŋ ngir ti wuzlaɓuh mikirɗak kirɗaka.

¹⁶ A tilaka mi da mizli ngir walahay Aya gar, a gidiɗaka taŋ. A sipaka ti Zozuwe tuwa, hã Israyeley a ram ti taŋ kileŋ avu walahaya.

¹⁷ Ar walahay Ay ati Betele, ɓa mbur zil pal mindir, a bi nga sipa Israyeleye ta na, anta. Taŋ mira sipaka Israyeley tuwa na, walahay a ndir njoŋ manja mizli mizilehey.

¹⁸ Bumbulvuŋ a ɓa Zozuwe na: «Ziwit mikaw a haŋ ɗik na, ska sikke ng'ar walahay Aya, asi y'ani i vuluw di asi haŋ ɗiki.» Joˀ Zozuwe a ska ziwit ngi haŋ naŋ tuwa sikke ng'ar walahay Aya.

¹⁹ Zozuwe misika haŋ sikke si na, soje mipi hirihey tuwa, a boko ɓuyoh tir li ɗum taŋhaya. A kilam, a cam ng'ar walahaya, dar a tiɓaka walahaya. A dirba nah, a ɗuvaka vu div div da hayaya kutum si.

²⁰ Mizli Ayay tuwa, a mbiɗam hiri pulaˀ murdirba, keɗ na, cunju tirslik nga muŋ, walahay taŋ ara wur. A sinaka ɓa a kilam ngir ti ka kini mata. Mizli Israyeley makilam kini ngir ti jiviɗ ngi wuzlaɓuh zleˀe tuwa, a mbuɗoko hiri jinak ng'ar mizli masipaka taŋ tuwa a muŋ.

²¹ Zozuwe ati Israyeley gar mupuraka cunju ngi walahay mawur tuwa na, a sinaka le, sojehey mipam hiri tuwa, a tiɓaka walahaya le. Joˀ a moko vãh, a zlaka kiɗa mizli Ayaya.

²² Israyel mekelemey a boko tir walahaya nga ji ti taŋ hirnga. Mizli ngi Ayaya a puraka na, ti ka i Israyeley ti ka i Israyeley, taŋ guc a wuzla. Joˀ Israyeley a kiɗaka taŋ biniˀ biniˀ, mbak ko a pulam mbur purla le ti siifa ta, yo ko mbur milih pal tekeɗe anta ma kini.

²³ Amma buy Ay vuna, a jakaŋ kaw titiri kine, a ram di da Zozuwe.

²⁴ Mizli Israyeley mingizlaka mizli Ayay pay wãˀ a duba gala, a wuzlaɓuh mikirɗak kirɗak, ar li taŋ misipaka taŋ tuwa na, mizli Ay mekelemey mindilam le asi haŋ taŋ gar na, a kiɗaka taŋ ti maslalam, hã a ngizlaka taŋ le pay wãˀ. A dirba nah, Israyeley gar a moko nga Ay a muŋ, a kiɗaka mi ngi mizli mindirama wãˀ ti maslaam.

²⁵ Mizli mikiɗahay tapasa, taŋ jom gar na, ziley ati ngwasaya, a gam le durmuk kuruˀ nga cuw. Taŋ cek i mizli Ayay.

²⁶ Zozuwe misika ziwit naŋ sik ng'ar walahay Ay tuwa, a ko di ɓaˀ le nga ruwuyo ta, hã a ngizlaka mizli Ayaya cek kwaɗay.

²⁷ Israyeleye, gwat taŋ mihilam, kaɓa gwat muluma ar vurumo na, sey ginewey ati gwat mekelemey, kaɓa Bumbulvuŋ miɓa ɗaˀ le da Zozuwe tuwa.

²⁸ Zozuwe a wura walahay Aya, a tiri di diŋ, a tiri di ɓuh mikirɗak kirɗak. N'ada kanah, hã dana aruŋ.

²⁹ Amma buy Ay vuna so na, Zozuwe a luwa law ar widis, hã pastaˀ a gi di. Pas madiɗ so na, joˀ Zozuwe a pula jiviɗ da mizli, ɓa a poko sar ti vagay naŋ tir widise. Mizli a zuɓaka, ara hizigaka a mizlingre ng'ar walahay waɗ a kusom ɗugur kos kos zit a hirnga naŋ. N'ada kanah, hã dana aruŋ.

Slufa ɓimujuwa a muwã Ebal

³⁰ Zozuwe a ndir li gi mikuli da Bumbulvuŋ, Buymisemuŋ ngi Israyel a muwã Ebal.

³¹ A ndira li gi mikuli na, kaɓa Moyis, gawla ngi Bumbulvuŋ muɗuva ɓi nah da Israyeley, kaɓa mutohoko ɓi naŋ angi ɓimujuwa ngi Moyis: li gi mikuli ti ɗugur miɓaˀ kine, mubuslaka ɗaˀ ti ɓiri ta. Dar a gam mikuli mizlam zlam wãˀ anga da Bumbulvuŋ, waɗ mikuli ngi ngiɓiˀay ma.

³² Ɓimujuwa, Moyis mutoho zleˀe da Israyeley na, Zozuwe a toho toh toh angi ɗuguroy tuwa.

³³ Israyeley cek ati mizli micawwa taŋhaya, buyɓi ngi wuzla mizli taŋhay waɗ migi kiita taŋhaya, t'ada deŋ deŋ puyõˀ a ciki akoti, ti ka ti ka gar, a mbuŋ masayay majijiraka akoti ngi jumoˀay ngi Bumbulvuŋ. Moholoyoy ati mizli ngi hayaya, t'ada: reta ngi mizli, taŋ a mbuŋ muwã Garizim, yo reta numuŋ kwana, a mbuŋ muwã Ebal, kaɓa Moyis, gawla ngi Bumbulvuŋ miɓa ɗaˀ le tuwa, ɓa a ɗuwulaka mi dumbuŋ dumbuŋ da mizli Israyeley kwaɗay.

³⁴ A dirba nah na, Zozuwe a slufa ɓimujuwa gar, ɓi ngi ɗuwula mihey ati ɓi ngi nisey, kaɓa mutohoko ɓi nah cek ar ɗerewol ngi ɓimujuwa.

³⁵ Gwat Moyis miɓa ɗaˀ le na, Zozuwe a slufa prek prek a mbuŋ jum ngi Israyeley gar, taŋ jom ati ngwasay, ziri waɗ moholoyoy misi a wuzla taŋ.