ZOZUWE 5 - Bible en langue guiziga

¹ Buy madiɗa ngi Amorihey misi ti dubazaw Zurdeŋ, kini tisi pas ngi pastaˀ naŋ, yo buy madiɗa ngi Kanaˀanay misek duba cakay ati mubuliy Mediterane, a cinaka le, Bumbulvuŋ a hisika yam ngi mizaw Zurdeŋ le hisik a mbuŋ ndra, hã i cohom. Taŋ micinaka cin kanah na, a huluɓa taŋ hilaɓ hilaɓ, yo ko a musuwunam fẽh a mbuŋ Israyele gu mata.

Israyeley micam mizaw a Gilgal

² Ti di nah, Bumbulvuŋ a ɓa Zozuwe na: «Ɗiyi sliwiɗ ngi ɗuguroy, Israyel migwene hanayna, ɓa ki ca taŋ a mizaw.»

³ Akẽh na, Zozuwe a ɗiyi sliwiɗ ngi ɗuguroy, a ca Israyeley a mizawa, ar li mazilaka miɗingir ngi Cimizaw.

⁴ Gwat Zozuwe mica taŋ a mizaw hĩˀĩ vurˀe na, ani: Mizli gar muboko ti Ezipte, mizilehey mindilaka gi vurum le gar na, a micam le pay a jiviɗ ngi wuzlaɓuh mikirɗak kirɗak, a dirba bo taŋ ti Ezipte.

⁵ Na so na, mizli muboko ti Ezipte gar na, a cam le a mizawa zleˀe. Amma mizli miyaka taŋ a jiviɗ ngi wuzlaɓuh gar, a dirba bo taŋ ti Ezipte na, a cam a mizawa t'aruŋ.

⁶ Asi mike na, Israyeley a gam a wuzlaɓuh mikirɗa kirɗaka, vi kukur mufaɗ ar li ru. Hã mizli muboko ti Ezipte, mindilaka vi ngi gi vurum le gar na, a micam cek, asi taŋ micinaka mi da Bumbulvuŋ ta. Mbak hã Bumbulvuŋ a hudum. Hirwuy maɓul ɗuwa ati mam, naŋ miɓa ti hudum da dideˀ taŋhay, ɓa a sa vula ndra di na, ko a pula taŋ ɓa a zãˀãka ta.

⁷ Bumbulvuŋ, a ci ar deɗe taŋ ng'asi ruwuyo i ziri taŋhay. Zozuwe mici a mizaw na i taŋ. Taŋ a micam a mizawa ta na, asi a caka taŋ a jiviɗe zleˀe ta.

⁸ Ti taŋ micaka mizli cek a mizawa na, mizli a ndiram ar walahay guɗuko, hã waˀa taŋhay a kufam kwaɗay.

⁹ A dirba nah na, Bumbulvuŋ a ɓa Zozuwe tuwa: «Dana, yi ɓula mesem kum musoko di baɗ ti Ezipte na le kileŋ avu kumo.» Vurˀe, a zilaka li nah Gilgal, hã dana aruŋ.

Israyeley mizlaka gi muguzlum Pak micikiɗeffe a Kanaˀan

¹⁰ Israyeley a pam a Gilgala, a gaka muguzlum Paka angi hin mukuruˀ nga mufaɗ ngi kiya nah vuna, ngi pastaˀ naŋ, a Zeriko.

¹¹ Put ngi miprik ngi muguzlum Pak vuna si na, mizli a zlaka zuma gwat ngisi ruwuyo ɗaf manja ˀis ara ati daw mufuko ti fuku.

¹² Taŋ mizlaka zuma gwat ngisi ruwuyo kuɗaˀ si na, put ngi miprik naŋ na, man a kiɗ mi le. Israyeley mira zumam gwat ngisi ruwuy Kanaˀan ar vi nah na, ko a lumam mana mata.

Zozuwe miji hirnga ti madiɗa ngi soje ngi Bumbulvuŋhoy

¹³ Ngi pas numuŋ ada na, Zozuwe a ro gweˀ avu Zeriko. A zuɓa hiri nga muŋ paɗɗa, keɗ na, mbur deŋ, hiri pulaˀ ng'ar naŋ, maslalam kaw a haŋ. Akẽh na, Zozuwe a kirih ng'avaŋ, a ɓaŋ: «Ki mbur ngisi ndra kwa malla ngi mizli mazliram ti ndra ta na kwa mbrike?»

¹⁴ Mbur tuwa, a mbiɗaŋ di: «Kay! kanah ta, yi madiɗa ngi soje ngi Bumbulvuŋhoy. Yi ndilo wureˀ ani.» Ar nah na, Zozuwe a pula vu nga ruwuy, a huruk huruk, a ɓaŋ: «Ani ki ɓiy ya gawla ɗike na mbri ska, Buy ɗu?»

¹⁵ Madiɗa ngi soje ngi Bumbulvuŋhoy tuwa, a mbiɗa da Zozuwe: «Cuko mapiyapiya ɗik avra, asi li ka mideŋ ara na, naŋ pal.» Dar Zozuwe a ga kanah so.