ZOZUWE 4 - Bible en langue guiziga

Ɗuguro mingahay kaˀ kaˀ kuruˀ nga cuw ngi wuluk keŋ

¹ Sukwi Israyele, ti taŋ mutuwuɗaka mizaw Zurdeŋ a kiɗ mi le muduba na, Bumbulvuŋ a ɓa Zozuwe:

² «Hilam mizli ziley kuruˀ nga cuw asi Israyeleye. Vur sukwi gar na, mbur zil purla.

³ Yo ɓaka taŋ ɗaˀ le: ‹Hilam ɗuguroy kuruˀ nga cuw a hur mizaw Zurdeŋ aka, ar li ngi sar ngi masayay muɗuvaka taˀ taˀ, ko a wusam was le ta na. Ki sa ram taŋ a haŋ, yo kisa paka taŋ ar li kum masa cicam anga ɓa ki hinam na.›»

⁴ A dirba nah na, Zozuwe a zila mizli naŋ muwuna taŋ zleˀe kuruˀ nga cuw a wuzla Israyeleye, mbur pal vur sukwi gar tuwa.

⁵ Joˀ Zozuwe a ɓa taŋ: «A ram ti mbuŋ akoti ngi jumoˀay ngi Bumbulvuŋ Buymisemuŋ kumo, nga wuzla mizaw. Anja mbur gar a zuɓ ɗugur pal pal a gagalaˀaya, a hirnga sukwi Israyeleye tiɗeˀe.

⁶ Ɗugur tayna a sa tiram avu kum i gwat mabugukum gwat mucuh zleˀe avu kumo. Tumbuŋ, da ziri kumoy a sa cufuɗukum le: ‹Mbiɗeˀvra ngi ɗugur hanayna mbrike?› na,

⁷ kisa mbiɗaka taŋ di: ‹Ti di akoti ngi jumoˀay ngi Bumbulvuŋ macuh a hur mizaw Zurdeŋ na, yam a sli tasl a mbuŋ naŋ. Naŋ kanah ti di akoti matuwuɗa Zurdeŋ na, yam ngi mizaw Zurdeŋ a sli tasl. Vurˀe, anja ɗugur hanayna t'ada, ɓa Israyeley mupuraka taŋ le na, a sa wulkaka ɓi nah keŋ, hã ngi sete.»

⁸ Naŋ kine, mizli Zozuwe muwuna taŋ tuwa na, a gaka gwat Zozuwe muɗuva taŋ ɓi nah tuwaŋ: A hilam ɗuguroy kuruˀ nga cuw a hur mizaw Zurdeŋ, a ram taŋ a haŋ. A gaka le kaɓa Bumbulvuŋ miɓa ɗaˀ le da Zozuwe. A hilam a hirnga sukwi Israyeleye tiɗeˀe, dar a ram taŋ a haŋ, ara paka taŋ ar li taŋ mira hinam anga tuwa.

⁹ Waɗ ma na, Zozuwe a ngi ɗuguroy kuruˀ nga cuw, ar li masayay majijiraka akoti ngi jumoˀay muɗuvaka sar taˀ taˀ ara tuwa. Ɗugur tayna t'ada dana kwaˀ aruŋ.

¹⁰ Masayay majijiraka akoti ngi jumoˀaya, a cicam dedeŋ a wuzla mizaw Zurdeŋ, hã gwat Bumbulvuŋ miɓa ɗaˀ le da Zozuwe ɓa a ɓa da Israyeley tuwa, a gi wãˀ kwaɗay. A gi kasl kasl kaɓa Moyis miɓa ɗaˀ le da Zozuwe tuwa. Joˀ mizli a wusam vu ngi tuwuɗa mizawa kutum kutum.

¹¹ Mizli, ti taŋ mutuwuɗam nga dubazaw vay diga, a kiɗ mi le muduba na, akoti ngi Bumbulvuŋ ati masayaya, a kam ɓaˀ a mbuŋ mizli a muŋ.

¹² Ziri ngi Rubeney, ngi Gatay waɗ reta ngi sukwi ngi Manase, taŋ a cohom dumbuŋ a mbuŋ, vu kaˀ kaˀ, ti sila ti sila, kaɓa Moyis miɓa taŋ di tuwa.

¹³ Mizli misi saray, mujuwam vu le ngi vurumo, gwat ngi sojehey durmuk kukur mufaɗ, a cohom a mbuŋ Bumbulvuŋ, kini ng'ar li micay ngi Zeriko.

¹⁴ Tapasa, Bumbulvuŋ a tiri ti Zozuwe madiɗa avu Israyeley gar. Joˀ mizli gar a zluwunam di ar siifa naŋ gar, kaɓa taŋ muzluwunam ti Moyis zleˀe na ya.

¹⁵ Akẽh na, Bumbulvuŋ a ɓa Zozuwe na:

¹⁶ «Ɓi ɗaˀ, ɓa masayay majijiraka akoti misi ɗerewol ngi jumoˀaya, ɓa a boko ti hur Zurdeŋ ng'avra.»

¹⁷ Joˀ Zozuwe a ɓa masayay tuwa ɗaˀ: «Boko ti hur Zurdeŋ ng'avra.»

¹⁸ Masayay majijiraka akoti ngi jumoˀay ngi Bumbulvuŋ, ara boko ti wuzla mizaw Zurdeŋ tuwa so. Ti taŋ mumuɗoko saraya ceɗ ceɗ tir yama, ɓa a ɗuvaka taŋ nga ruwuy mingbalaŋ ngbalaŋ si na, yam ngi mizaw Zurdeŋ a mo fuyõh ng'ar li naŋ, dar a ɓul vra vra, nga naŋ nga naŋ kaɓa misi zleˀe a muŋ.

¹⁹ Israyeley mutuwuɗaka Zurdeŋ na, naɓa i hin kuruˀ ngi kiya mudumbuŋ naŋ. A pam ti guɗuk taŋhaya a Gilgal, ar maakway ngi Zeriko, tisi pas ngi miprik naŋ.

²⁰ Ɗuguroy mukuruˀ nga cuw mihiloko taŋ a mizaw Zurdeŋ tuwa na, Zozuwe a ɓa mizli, a ng'aka taŋ kaˀ kaˀ a Gilgal.

²¹ A dirba nah, a ɓa Israyeleye na: «Tumbuŋ, da ziri kumoy a sa cufuɗukum le: ‹Mbiɗeˀ vra ngi ɗugur hanayna mbrike› na,

²² kisa mbiɗaka taŋ di na: Israyeley a tuwuɗaka Zurdeŋ hana, ti sar njiraŋ njiraŋ.

²³ Bumbulvuŋ Buymisemuŋ kum, a hisika yam ngi Zurdeŋ hana hisik a mbuŋ kumo, hã ki cohom, kaɓa Bumbulvuŋ, Buymisemuŋ kumo migi ti mubuliy lavaɗ na ya. A hisika yama hisik a mbuŋ ndra, hã i cohom ti sar njiraŋ njiraŋ.

²⁴ A ga kanah na, ɓa mizli ngisi ruwuy gar a sinaka gidaŋ ngi Bumbulvuŋ, yo ɓa hin gar na, ki zluwunam ti Bumbulvuŋ, Buymisemuŋ kumo.»