ZOZUWE 23 - Bible en langue guiziga

Zozuwe mimbiɗa mi wãˀ da Israyeley

¹ Israyeleye, Bumbulvuŋ a ga, a cifam le zuy zuy ati mesene taŋhay mugun hirnga taŋ na, hã a zikam haɗi. Akẽh na, Zozuwe a gi gal le haɗa.

² Dar Zozuwe a zila Israyeleye cek cek ng'avaŋ. Mizli micawwahay, buyoy ati migi kiitahay waɗ mizli madiɗa taŋhaya gar, a ɓa taŋ na: «Ani yi midigila, i gi gal le haɗa.

³ Bumbulvuŋ, Buymisemuŋ kumo, gwat naŋ miga da sukwi ngi mizli hanayna gar, asi kum na, ki puraka le ti hiri kumo. Asi mike na, Bumbulvuŋ, Buymisemuŋ kumo, a kiɗ vu le asi kumo.

⁴ Kum puraka ayɗi, sukwi ngi mizli, ya mipa taŋ hirnga na, yi wuɗuka hirwuy taŋ le ti ceregezleŋ da sukwi kumoyo. Sukwi ngi mizli mekelemey a ndiram le, i pa taŋ hirnga t'aruŋ. I sukwi muzlo zle a mizaw Zurdeŋ tisi pas ngi miprik naŋ, hã sesẽŋ a mubuliy Meditarane, kini tisi pas ngi pastaˀa.

⁵ Bumbulvuŋ, Buymisemuŋ kumo, masa ɓula sukwi tayna kileŋ ti mbuŋ kumo, i naŋ vuna ti haŋ naŋ. A sa ga ɓa a kilam a mbuŋ kumo, hã kisa pam angi hirwuy taŋ, kaɓa Bumbulvuŋ, Buymisemuŋ kumo miɓa ɓi nah ɗaˀ le zleˀe tuwa.

⁶ Na so na, ɓi mutoho misi angi ɓimujuwa ngi Moyis gar na, kam slimiɗ kuy kuy angaŋ, cicam gidaŋ gidaŋ. Ko ki ra gam ngaˀa sloh ngir ti ka, sloh ngir ti ka ta.

⁷ Sukwi ngi mizli tayna mindiram a wuzla kumo aruŋ na, ko ki jumom ati taŋ ta. Ko ki zilaka slimiɗ ngi kuli taŋhay na avu mi kumo ta. Ki hudumom ti kuli taŋ tayna ta. Ki gaka taŋ mezegwel ta, yo ki hurkom a mbuŋ taŋ ta ma kini.

⁸ Amma kumo, kum jumom ng'avu Bumbulvuŋ, Buymisemuŋ kumo tewle, kaɓa kum mugoko di hã a ndilo ani dana na.

⁹ Naɓa sukwi madiɗa madiɗa, migidaŋhay na, Bumbulvuŋ a sa ɓula taŋ a mbuŋ kumo. Na zle ko mbur purla micici zlak ɗaˀ a mbuŋ kum anta, hã dana.

¹⁰ Mbur purla a wuzla kumo, a gidiɗ mizli durmuku. Hana gar na, asi makiɗ vu asi kum i Bumbulvuŋ, Buymisemuŋ kum, kaɓa naŋ miɓa ɗaˀ le zleˀe tuwa.

¹¹ Sey ki jam lesl kuy kuy vur hirnga kumo so, wuɗaka Bumbulvuŋ Buymisemuŋ kumo.

¹² Sukwi mekelemey mindiram a wuzla kum na, da ki mbiɗam duba le avu Bumbulvuŋ, ɓa ki jumom ng'avu taŋ, ki ra zuɓam vu ar wala kumo, ki ra ram ngi hay taŋ, taŋ kwana, ara soko ngi hay kumoyo ya na,

¹³ sinaka sin le so tuwaŋ, Bumbulvuŋ, Buymisemuŋ kumo, anta sa ɓula sukwi tayna caˀa a mbuŋ kumo ta. Naɓa sukwi tayna a sa tiram avu kumo, kaɓa zuva ngi ji kum, kaɓa mazaɓ, yo kaɓa laway ngi sliɗ kum a virzi, waɗ kaɓa hadaw muzlulungoˀ zlulungoˀ a hiri. Sey da kum mingizlam le kuɗup angi hirwuy mezle, Bumbulvuŋ, Buymisemuŋ kumo muvulukum di hana.

¹⁴ Ani ya, yi sa cuh le dana, kaɓa gwat ngi ruwuy gar macuh na so. Mingiɓi ngi Bumbulvuŋ Buymisemuŋ, ɓi ngi gwat mezlehey naŋ miɓi a sa gukum di gar na, ɓa hana a gi ta na, anta ko pal ta. Anja sey ki sinaka sin le a mevel kumo kuy kuy wãˀ, yo ar dumvu kumo wãˀ ma. Gwat tayna, a gam le gar vur kumo muduba, ko mindir loŋ asi taŋ manja a gi na, anta.

¹⁵ Naŋ kine so, ɓi ngi gwat mezlehey, Bumbulvuŋ, Buymisemuŋ kumo muɓukum di na, a gam le tiɗeˀe. Naŋ kanah ya, ɓi malambaˀhay, Bumbulvuŋ, Buymisemuŋ kumo miɓa vur kum na kwana, a sa ga taŋ tiɗeˀe ya. Sey da naŋ mingizlukum le kuɗup wãˀ angi hirwuy mezle, Bumbulvuŋ, Buymisemuŋ kumo vuna muvulukum di hana.

¹⁶ Jumoˀay ngi Bumbulvuŋ, Buymisemuŋ kumo, jumoˀay naŋ, naŋ mawuɗo, da ki ra ngilaka ɓi nah, yo da ki ra gam mezegwel da kulihey, ki ra hurkom a mbuŋ taŋ na, naɓa Bumbulvuŋ a sa zuɓ himaˀ kuyta wãˀ ar kumo, yo a sa ngizlukum leɗeɗ kutum angi hirwuy mezle naŋ muvulukum di na.»