ZOZUWE 22 - Bible en langue guiziga

Sukwi ngisi pas ngi miprik ngi mizaw Zurdeŋ

¹ Akẽh na, Zozuwe a zila sukwi ngi Ruben ati ngi Gat waɗ reta ngi sukwi ngi Manase.

² A ɓa taŋ na: «Moyis, gawla ngi Bumbulvuŋ, gwat naŋ miɓa ɗaˀ le gar na, ki jaka le a hirnga. Yo ma na, gwat ya muɓukum ɗaˀ le gar na, ki cinikiy di le.

³ Ki zikoko le vi mbeˀ mbeˀ hã dana, ko ki pulaka sukum kumoyo ta. Bumbulvuŋ, Buymisemuŋ kumo, ɓi naŋ muɗuva na, ki jaka le a hirnga kuy kuy.

⁴ Wurenna, Bumbulvuŋ, Buymisemuŋ kumo, a vula li musuko vu le da sukum kumoyo muduba, kaɓa naŋ miɓa taŋ di ɗaˀ le zleˀe tuwa. Wurenna so na, mam ng'ar guɗuk kumoy a muŋ, nga hirwuy ngi kum. Hirwuy, Moyis, gawla ngi Bumbulvuŋ muvulukum di, a dubazaw Zurdeŋ tuwa.

⁵ Gwat purla ani: ɓimuɗuva ati ɓimujuwa, Moyis, gawla ngi Bumbulvuŋ, Buymisemuŋ kum, miɓa ɗaˀ le na, sey ki gam di slra kuy kuy ɓula. Wuɗaka Bumbulvuŋ, Buymisemuŋ kumo. Sipaka jiviɗ naŋhaya gar, jumom ng'avaŋ. Ɓi muɗuva naŋhaya, ki pulaka taŋ ta. Gakaŋ slra ti mevel purla waɗ ti dumvu kum wãˀa.»

⁶ A dirba nah na, Zozuwe a ɗuwula taŋ mi, waɗ a waha taŋ. Dar taŋ a mam ng'ar guɗuk taŋhay a muŋ.

⁷ Reta ngi sukwi ngi Manase mekeleme, Moyis a vula taŋ hirwuy nga taŋ le zleˀe angi hirwuy Basaŋ. Yo da reta numuŋ kwana, Zozuwe a vula taŋ nga taŋ tisi pas ngi pastaˀ ngi Zurdeŋ. Ti Zozuwe mawaha taŋ ɓa a ram ng'ar guɗuk taŋhay tuwa na, a ɗuwula taŋ mi ya.

⁸ A ɓa taŋ: «Mam ng'ar guɗuk kumoyo ti zlili waɗ ti ginewey haɗa, ɓiri bara, ɓiri tapasl tapasl, ɓiri gaza, ɓiri muho gar waɗ ti zanahay haɗa teˀe. Zlili ngi mesene kumoy, kum mulumoko di ar vurum na, wuɗkaka ati sukum kumoyo.»

Li gi mikuli gweˀ avu mizaw Zurdeŋ

⁹ Naŋ kine, dideˀ ngi Rubeney ati ngi Gatay waɗ reta ngi sukwi ngi Manase, a mam ngi hay taŋhay a muŋ. A pulaka Israyeley a Silo, hirwuy Kanaˀan, a ram nga Galaˀat, hirwuy nga taŋ, Bumbulvuŋ miɓa taŋ di ɗaˀ le ti balam Moyis ɓa a ndir da taŋ.

¹⁰ Dideˀ ngi Rubeney ati ngi Gatay waɗ reta ngi sukwi ngi Manase mimam na, ara ndilam a Gelilot a mi mizaw Zurdeŋ misi tir vay Kanaˀan. Dar a ndiram li madiɗa ngi gi mikuli, ndiwtiŋ, gweˀ avu mizaw Zurdeŋ.

¹¹ Israyeley a cinam, mizli a ɓam na: «Dideˀ ngi Rubeney ati ngi Gatay waɗ reta ngi sukwi ngi Manase, a ndiram li gi mikuli le a Gilo a mi mizaw Zurdeŋ tir vay Israyel, sek duba cakay ati hirwuy Kanaˀana.»

¹² Israyeley micinaka ɓi nah cin si na, a kusoko Israyeley ar jum taŋ cek cek a Silo, ɓa ara zlam kiɗa vu ati taŋ.

¹³ Dideˀ ngi Rubeney ati ngi Gatay waɗ reta ngi sukwi ngi Manase tuwa, Israyeley a slinam mizli ng'avi taŋ a hirwuy Galaˀata. A slinam di i ti Pinas, mangal ngi masay Elazar,

¹⁴ waɗ buyɓihey ngi wuzla mizli, taŋ kuruˀ jom ng'avaŋ. Asi sukwi Israyel gar na, a zuɓam buyɓi purla purla. Mbur gar na, i buyɓi ar tizer ngi dideˀ ngi Israyeley misi zlezle.

¹⁵ Misliney tuwa, a soko ng'avi dideˀ ngi Rubeney ati ngi Gatay waɗ reta ngi sukwi ngi Manase, a Galaˀat tuwa, a ɓaka taŋ na:

¹⁶ «Jum ngi mizli ngi Bumbulvuŋhoy a ɓam na: Gwat kum migaka ani da Bumbulvuŋ ngi Israyel na, i gwat malambaˀ madiɗa. Kum mindiram li gi mikuli hĩˀĩ da kum na, kite ki kiraham le dana avu Bumbulvuŋ, yo ki slikiɗam ɓi le avu Bumbulvuŋ takwa?

¹⁷ Ki puraka mungra ndra migaka zleˀe a Peˀor na, naŋ preˀ kwa mbrike? Ko ti bonoy madiɗa midiɗo ar jum ngi ndra mizli naŋhay na tekeɗe kwana, malambaˀ nah a bun dana avu ndra t'aruŋ.

¹⁸ Na kumo ma na, ki kraham le dana avu Bumbulvuŋ. Ki slikiɗam ɓi le dana ava, ɓa tiprik na, a sa slikiɗ himaˀ ar jum ndra Israyeley garaya so takwa!

¹⁹ Da kaɓa ki puraka le, hiryi ada asi hirwuy kumo na, hirwuy ngi Bumbulvuŋ misi hay naŋ anga na, moko burok ng'ara a muŋ sini. Wuɗam li ɓa ki pam a wuzla ndra vuna si. Kum mindiram li gi mikuli mekelem a ciki ngi Bumbulvuŋ, Buymisemuŋ ndra na, ki slikiɗam di i ɓi ti slikiɗ avu Bumbulvuŋ waɗ avu ndra.

²⁰ Akan, mangal ngi Zera, a gi teŋteŋ ta, asi naŋ muzuɓa gwat mitika jiviɗ nah le. Himaˀ ngi Bumbulvuŋ misa po na, ar jum ngi Israyeley gar takwa? Ko mumuc asi malambaˀ naŋ vuna, i naŋ pal naŋ ta jak ma ayɗi.»

²¹ Dideˀ ngi Rubeney ati ngi Gatay waɗ reta ngi sukwi ngi Manase tuwa, a mbiɗaka da buy ngi Israyeley mudurmuk durmuk mbeˀ mbeˀ na:

²² «Bumbulvuŋ, Buymisemuŋ i madiɗa wãˀ, Bumbulvuŋ, Buymisemuŋ i madiɗa wãˀ. Ndra migam kanah na, da i slikiɗam di i ɓi malla da i gam di i teŋteŋ avu Bumbulvuŋ ta na, Bumbulvuŋ a si na le, yo Israyeley kwana a sa sinaka ya. Anja Bumbulvuŋ a pula ndra caˀa ti siifa ta.

²³ Li gi mikuli ndra mindiraka na, da i ngi mbiɗi duba avu Bumbulvuŋ, da i ngi gi mikuli mizlam zlam, sedege ti gwat ngi migamay, malla ko mikuli ngi ngiɓiˀay kwana, anja Bumbulvuŋ a kuta ndra ti bonoy.

²⁴ Kay, kanah ta, ndra migaka kanah na, asi i ra likam. Tumbuŋ na, bista, dideˀ kumoy a sa ɓaka dideˀ ndraˀahaya: ‹Mujumukum kumo ati Bumbulvuŋ, Buymisemuŋ ngi Israyel i mike kwani?

²⁵ Kum dideˀ ngi Rubeney ati ngi Gataya, ar wala ndra ati kumo, Bumbulvuŋ a cica ndra maakwaya le ti mizaw Zurdeŋ! Lum kum anta neˀ le avu Bumbulvuŋ ta.› Kanah na, naɓa dideˀ kumoy a sa paka mi da dideˀ ndraˀahaya, ɓa a zluwunam ti Bumbulvuŋ mata.

²⁶ Akẽh na, dar i ɓam ar wala ndra so na: Zuwen ndurukum li gi mikuli. Anta ɓa i gam mikuli mizlam zlam ara ta, ko mikuli muho gar kwana, ndr'anta sa gam ara ta ma.

²⁷ Amma i ndiraka na, ɓa a ndir i sedewo ar wala ndra ati kumo waɗ ar wala ngi dideˀ ndraˀahaya ma. Mikuli ndra mizlam zlamay ati ngi ngiɓiˀay na, i ngi biga, ndra magam a mbuŋ Bumbulvuŋ na, i slra naŋ. Ɓi misi: ‹Lum kum anta avu Bumbulvuŋ ta› na, naɓa dideˀ kumoy anta sa ɓaka dideˀ ndraˀahaya tumbuŋ kanah ta.

²⁸ Ndr'i ɓam ar wala ndra na: ‹Ndra ati dideˀ ndraˀahaya, da mizli a ɓam ndra mingiɓi hana le tumbuŋ na, i sa mbiɗaka taŋ di: Li gi mikuli ngi Bumbulvuŋ, dideˀ ndrahay a ndiraka le heˀ kanah, puraka mideŋ hana i nah. Mikuli ngi zlum ti zlum ati mikuli muho gar na, ndr'anta i gam ara ta. Amma ɓa a ndir i sedewo ar wala ndra ati kumo.

²⁹ Da i ndiram li gi mikuli le ngi gi mikuli mizlam zlam, sedege ti gwat ngi migamay malla mikuli mekelemey, mbak li gi mikuli ngi Bumbulvuŋ Buymisemuŋ ndra, misi a mbuŋ hay naŋ na le na, naɓa i gam di i mungra mukuyta wãˀ, i slikiɗam di i ɓi avu Bumbulvuŋ, i mbiɗam di i duba avu Bumbulvuŋ dana.»

³⁰ Ti masay Pinas, buyɓi ngi wuzla mizli waɗ buy ngi wuzla muy ngi Israyeley mudurmuk mbeˀ mbeˀ misi akẽh, micinaka mingiɓi ngi dideˀ ngi Rubeney, ngi Gatay waɗ ngi Manasehey na, a cira taŋ hiri le.

³¹ Pinas, mangal ngi masay Elazar, a ɓa taŋ: «Dana, i sinaka le, Bumbulvuŋ naŋ da a wuzla ndra, gi teŋteŋ ta nah na, ki gaka a mbuŋ Bumbulvuŋ ta. Gwat kum migaka na, i ngi laha Israyeley ti gidaŋ ngi Bumbulvuŋ jaka.»

³² Pinas, mangal ngi masay Elazar waɗ buyɓihey tuwa, a pulaka dideˀ ngi Rubeney waɗ ngi Gataya, a slikiɗam baɗ a Galaˀata, a mam ng'avi Israyeley a Kanaˀan a muŋ, a slufaka taŋ mingiɓi nah.

³³ Mingiɓi nah, a cira hiri da Israyeleye teˀe, a gaka sise da Bumbulvuŋ. A pulaka wuluk taŋ ngi ra kiɗa vu, nga ngizla hirwuy misi dideˀ ngi Ruben ati ngi Gatay ara tuwa muduba.

³⁴ Dideˀ ngi Ruben ati ngi Gatay tuwa, a ɓam: «Li gi mikuli hana, i sedewo ar wala ndra ati Bumbulvuŋ Buymisemuŋ!» Dar a zilaka li gi mikuli nah tuwa: ‹Sedewo.›