ZOZUWE 21 - Bible en langue guiziga

Walahay ngi levihey

¹ Masay Elazar ati Zozuwe, mangal ngi Nun, waɗ buy ngi hayay ngi wuzla sukwi Israyeleye, buy ngi hay ngi wuzla mizli ngir sukwi ngi leviheye, a soko lumaka taŋ

² a Silo, hirwuy Kanaˀan. Dar a ɓaka taŋ na: «Bumbulvuŋ, a ɓa le ɗaˀ le ti balam Moyise zleˀe, ɓa a vula ndra walahayay ngi cifi ti hay ndrahay jom ti pala ngi jigina ginew taŋhaya wãˀ wãˀa ma.»

³ Akẽh na, Israyeley a vulaka walahay da leviheye ati pala ngi jigina gineweye, avu li nga taŋhay kaɓa Bumbulvuŋ miɓa ɗaˀ le tuwa.

⁴ Taŋ migaka ceregezleŋ so na, a diɗ dumbuŋ ar dideˀ ngi Kehatay. Levihey cah ar wala taŋ, i dideˀ ngi masay Aroŋhoy. A vulaka taŋ walahay kuruˀ ngaˀ makir ti gi ceregezleŋ, a vulaka taŋ avu walahay ngi sukwi ngi Zuda ati ngi Simeyoŋ waɗ ngi Benjameŋ.

⁵ Dideˀ ngi Kehat mekelemeye, a vulaka taŋ ti ceregezleŋ walahay kuruˀu. A vulaka taŋ avu walahay ngi muyoy ar sukwi ngi Efrayim, ngi Daŋ waɗ avu ngi reta ngi sukwi ngi Manase.

⁶ Dideˀ ngi sukwi ngi Gersoŋhoyo, a vulaka taŋ ti ceregezleŋ walahay kuruˀ ngaˀ makir angi hirwuy Basaŋ. A vulaka taŋ walahaya avu ngi muyoy ar sukwi ngi Isakar, ngi Aser, ngi Neftali waɗ avu ngi reta ngi sukwi ngi Manase ma.

⁷ Dideˀ ngi Merariheye, vur muyo vur muyo a vulaka taŋ walahay kuruˀ nga cuw. A vulaka taŋ avu ngi sukwi ngi Ruben, ngi Gat waɗ ngi Zabuloŋ.

⁸ Walahay tayna ati li jigina ginew taŋhaya, Israyeley muvulaka taŋ da sukwi ngi levihey na, a gam ceregezleŋ geˀ geˀ le, kaɓa Bumbulvuŋ miɓa ɗaˀ le da Moyis tuwa.

⁹ Sukwi ngi Zuda ati ngi Simeyoŋ na, a vulaka taŋ walahayay le, slimiɗ t'ani:

¹⁰ dideˀ ngi Aroŋhoy, muy ngi Kehatay, mangal ngi Levi. Naŋ kine, ceregezleŋ a diɗ dumbuŋ ar taŋ.

¹¹ A vulaka taŋ walahay Kiriyat-Arba, a zilaka Hebroŋ ma, naŋ tir vay Zuda waɗ li jigina ginewey mugun gun hirnga nah. Arba i slimiɗ ngi dideˀ ngi mizli Anakay.

¹² Amma guvahay ati prok ngi Hebroŋhoyo, a vulaka taŋ da Kalep, mangal ngi Yefune.

¹³ Walahayay ani taŋ muvulaka taŋ da dideˀ ngi Aroŋhoy, da mbur mikiɗ hirnga le na, ɓa ara ɗum a diga: i Hebroŋ ati Lipna, jom ti pala ngi jigina ginew taŋhaya wãˀ wãˀ,

¹⁴ Yatir, Estemoˀa, jom ti pala ngi jigina ginew taŋhaya wãˀ wãˀ,

¹⁵ Holoŋ, Debir, jom ti pala ngi jigina ginew taŋhaya wãˀ wãˀ,

¹⁶ Asaŋ, Yuta, Bet-Semes, jom ti pala ngi jigina ginew taŋhaya wãˀ wãˀ. Jom gar na, walahayay ngoltir. Walahay tayna gar na, taŋ angi hirwuy ngi Zuda ati ngi Simeyoŋ.

¹⁷ A vulaka taŋ angi hirwuy ngi Benjameŋ i Gabaˀoŋ, Geba, jom ti pala ngi jigina ginew taŋhaya wãˀ wãˀ,

¹⁸ Anatot, Alemet, jom ti pala ngi jigina ginew taŋhaya wãˀ wãˀ. Jom gar na, walahay mufaɗa.

¹⁹ Masayay, dideˀ ngi Aroŋhoyo, walahay taŋ mulumama, jom gar na, kuruˀ nga makir, waɗ ti pala ngi jigina ginew taŋhaya wãˀ wãˀ ma.

²⁰ Muy ngi Levi mekelemey, ziri ngi Kehataya, a vulaka taŋ ti ceregezleŋ i walahayay avu ngi sukwi ngi Efrayimey.

²¹ Walahayay ani taŋ muvulaka taŋ di, da mbur mikiɗ hirnga le na, ɓa ara ɗum a diga: i Sikem a muwã Efrayim waɗ Gezer, jom ti pala ngi jigina ginew taŋhaya wãˀ wãˀ,

²² Kipsayim ati Bet-Heroŋ. Jom gar na, walahayay mufaɗ, waɗ pala ngi jigina ginew taŋhaya wãˀ wãˀ ma.

²³ Angi hirwuy ngi sukwi ngi Daŋ kwana, a vulaka taŋ Elteke ati Gibetoŋ, jom ti pala ngi jigina ginewey taŋhaya wãˀ wãˀ,

²⁴ Ayaloŋ ati Gat-Rimoŋ, waɗ pala ngi jigina ginew taŋhaya wãˀ wãˀ. Jom gar na, walahay mufaɗ.

²⁵ Angi reta ngi sukwi ngi Manase na, a vulaka taŋ walahayay cuw: Taˀanak ati Ibleyam, jom ti pala ngi jigina ginew taŋhaya wãˀ wãˀ ma.

²⁶ Walahay muvulaka jom gar da dideˀ ngi Kehatay na, kuruˀu, waɗ pala ngi jigina ginew taŋhaya wãˀ wãˀ ma.

²⁷ Dideˀ ngi levihey, ziri ngi Gersoŋhoyo, walahayay ani muvulaka taŋ da reta ngi sukwi ngi Manase. Da mbur mikiɗ hirnga le na, ɓa ara ɗum a diga: Golaŋ angi hirwuy Basaŋ waɗ Besetera, jom ti pala ngi jigina ginew taŋhaya wãˀ wãˀ ma.

²⁸ Angi hirwuy ngi sukwi ngi Isakara, a vulaka taŋ walahayay Kisiyoŋ waɗ Dabrat, jom ti pala ngi jigina ginew taŋahay wãˀ wãˀ ma.

²⁹ Yarmut ati En-Ganim, waɗ pala ngi jigina ginew taŋhaya wãˀ wãˀ ma. Jom gar na, walahay mufaɗa.

³⁰ Angi hirwuy ngi Asere, i Mikal ati Abdoŋ, jom ti pala ngi jigina ginew taŋhaya wãˀ wãˀ ma.

³¹ Helkat ati Rehop, waɗ pala ngi jigina ginew taŋhaya wãˀ wãˀ ma. Jom gar na, walahay mufaɗa.

³² Angi hirwuy ngi Neftali, walahayay ani muvulaka taŋ di, da mbur mikiɗ hirnga le na, ɓa ara ɗum a diga: i walahay Kedes angi hirwuy Galile, Ramot-Dor ati Kartaŋ, jom ti pala ngi jigina ginew taŋhaya wãˀ wãˀ ma.

³³ Dideˀ ngi Gersoŋhoy a lumam walahayaya, jom gar na, kuruˀu, jom ti pala ngi jigina ginew taŋhaya wãˀ wãˀ ma.

³⁴ Dideˀ ngi Levi mekelemey, muy ngi ziri ngi Merariheye, a vulaka taŋ walahaya avu ngi sukwi ngi Zabuloŋ: i Yokneˀam, Karta,

³⁵ Dimna ati Nahalal, jom ti pala ngi jigina ginew taŋhaya wãˀ wãˀ. Jom gar na, walahay mufaɗa.

³⁶ Angi hirwuy ngi Ruben, a dubazaw Zurdeŋ, puɗak angi Zeriko na, a vulaka taŋ walahay Beser, misi ar ɗigar a wuzlaɓuh mikirɗak kirɗak, da mbur mikiɗ hirnga le na, ara ɗum a diga, waɗ Yahas, jom ti pala ngi jigina ginew taŋhaya wãˀ wãˀ,

³⁷ Kedemot ati Mefaˀat, waɗ pala ngi jigina ginew taŋhaya wãˀ wãˀ ma. Jom gar na, walahay mufaɗa.

³⁸ Angi hirwuy ngi Gata, walahayay ani muvulaka taŋ di, da mbur mikiɗ hirnga le na, ɓa ara ɗum a diga: i Ramot, hirwuy Galaˀat, Mahanayim,

³⁹ Heseboŋ ati Yazer, waɗ pala ngi jigina ginew taŋhaya wãˀ wãˀ ma. Jom gar na, walahay mufaɗ.

⁴⁰ Dideˀ ngi levihey, ziri ngi Merariheye, vur muyo vur muyo, a vulaka taŋ walahay ti gi ceregezleŋ, jom gar na, walahay kuruˀ nga cuw.

⁴¹ Walahay ngi sukwi ngi levihey, mislaka taŋ di avu ngi Israyeleye, jom gar na, walahay kukur mufaɗ nga dangafaɗa, jom ti pala ngi jigina ginew taŋhaya wãˀ wãˀ ma.

⁴² Walahay tayna gar na, a vulaka taŋ di jom ti pala ngi jigina ginew taŋhaya wãˀ wãˀ ma, gun hirnga taŋ.

⁴³ Hirwuy Bumbulvuŋ muhudum, a sa vula da Israyeley tuwa na, a vula taŋ di le gar muduba. Taŋ a tiɓaka le, a pam le anga.

⁴⁴ Bumbulvuŋ a ga taŋ di, a cifam le zuy zuy ati mizli ngir maakway taŋhaya, kaɓa naŋ miɓa ɗaˀ le da dideˀ taŋhaya tuwa si. Bumbulvuŋ a vula taŋ mesene taŋhaya gar asi haŋ taŋ. A wuzla mesene taŋhaya, ko mbur pal macici a mbuŋ taŋ gu anta.

⁴⁵ Naŋ kine, gwat mezlehey Bumbulvuŋ miɓa taŋ da sukwi Israyel gar na, misi ɓa a gi ta na, anta, a gam le gar muduba.