ZOZUWE 20 - Bible en langue guiziga

Walahay ngi ɗum ar taŋ

¹ Bumbulvuŋ a ɓa Zozuwe:

² «Ɓa Israyeleye na: Wunam walahay ngi ɗum ar taŋ, asi i ɓa ɓi nah le zleˀe da Moyise si.

³ Kaɓa ani, da mbur a kiɗ hirnga le, a kiɗa waˀwaˀ ta malla i naŋ muwuɗ ta na, naɓa a kil avu mupula cuwala, ara ɗum ar walahay tayna.

⁴ Mbur mikiɗa hirnga tuwa, naŋ mindil le ar walahay pal asi taŋ na, a cici deŋ ar li ngi gi kiita a mizlingre ngi walahaya kwaɗay. Gwat naŋ miga na, a ɓa ɓi nah da mizli micawwa ngir walahay nah vuna. Mizli micawwa ngir walahayaya, a tiɓakaŋ ng'ar walahay avu taŋ. Joˀ a vulakaŋ li ngi cifi ti hay a wuzla taŋ.

⁵ Da mbur mupula cuwal a sipaŋ le tekeɗe kwana, a vulakaŋ di ta. Asi mike na, naŋ mikiɗa cil naŋ vagay na, a ga waˀwaˀ ta malla vur naŋ da hirsaŋ zleˀe ta ma.

⁶ Mbur mikiɗa hirnga tuwa, a cifi ar walahaya, hã jum ngi Israyeley a gakaŋ kiita ɗagay. Yo mbur magi mikuli ar hin nah na, hã a muc kwaɗay. A dirba nah so na, mbur mikiɗa hirnga tuwa, a sa mi ngi hay naŋ zuy, ng'ar walahay naŋ mikilo ti diga zleˀe tuwa.»

⁷ Walahay Israyeley muwunaka taŋ na, t'ani: i Kades ngi Galile, angi hirwuy muwã Neftali, Sikem, angi hirwuy muwã Efrayim, waɗ Kiriyat-Arba, a zilaka Hebroŋ ma, angi hirwuy muwã Zuda.

⁸ Ti dubazaw Zurdeŋ, kini ti hirnga Zeriko, tisi pas ngi miprike, a wunam di i walahayay ani: Beser a wuzlaɓuh mikirɗak kirɗak, ar miɗingir ngi sukwi ngi Ruben, Ramot, hirwuy Galaˀat ngi sukwi ngi Gat, waɗ Golaŋ, hirwuy Basaŋ, ngi sukwi ngi Manase.

⁹ A wunaka walahay tayna, ɓa Israyeley waɗ mulakay misi a wuzla taŋ, da mbur mikiɗ hirnga le gar, da a ga waˀwaˀ ta na, ara ɗum a diga. Naŋ kine, mbur mupula cuwala, manja a gakaŋ kiita a wuzla jum ngi mizli na, naŋ anta sa kiɗaŋ vagay ta.