ZOZUWE 19 - Bible en langue guiziga

Hirwuy ngi Simeyoŋ

¹ Taŋ migaka ceregezleŋ sar mucuw naŋ na, a diɗ ar sukwi ngi Simeyoŋ. A vulaka taŋ hirwuyo vur muyo vur muyo. Hirwuy ngi sukwi ngi Simeyoŋ, naŋ a wuzla hirwuy ngi dideˀ ngi Zudahay.

² Hirwuy muvulaka taŋ di i: walahay Berseba, Seba, Molada,

³ Hasar-Suwal, Baˀala, Esem,

⁴ Eltolat, Betul, Horma,

⁵ Siklak, Bet-Markabot, Hasar-Susa,

⁶ Bet-Lebaˀot waɗ Saruwen. Jom gar na, walahay madiɗahay kuruˀ nga makir, waɗ prok taŋhaya wãˀ wãˀ ma.

⁷ Mekelemey ada ma, i: Ayin, Rimoŋ, Eter waɗ Asaŋ. Jom gar na, walahay mufaɗa, jom ti prok taŋhaya wãˀ wãˀ ma,

⁸ waɗ prokoy mugun gun hirnga ngi walahay tayna gar, hã sesẽŋ a Baˀalat-Beyer ati Rama ngir vay ruwuy. Hirwuy muvulaka da dideˀ ngi Simeyoŋhoy, vur muyo vur muyo na i hana so.

⁹ Dideˀ ngi Simeyoŋhoyo hirwuy taŋ, a slaka taŋ di avu hirwuy ngi dideˀ ngi Zudahay. Asi mike na, hirwuy ngi sukwi ngi Zuda a didila taŋ le. Sukwi ngi Simeyoŋ a lum hirwuyo mi nga naŋ a wuzla ngi Zudahay na vurˀe.

Hirwuy ngi Zabuloŋ

¹⁰ Ceregezleŋ mimakir naŋ a diɗ ar sukwi ngi Zabuloŋ. A vulaka taŋ hirwuyo vur muyo vur muyo. Maakway ngi hirwuy taŋ a ndih zle ar vay ruwuyo hã sesẽŋ a Sarit.

¹¹ Maakway a zuɓ baɗ akẽh, aru kini ng'asi pas ngi pastaˀa, hã sesẽŋ a Marala, meh meh avu Dabeset waɗ mizaw misek duba cakay ati Yokneˀam.

¹² Ti Sarite, maakway a gun kini ng'asi pas ngi mipriki, meh meh avu hirwuy Kisilot-Tabor, a muruɗ kini nga Dabrat, waɗ a zuɓ paɗ hã sesẽŋ a Yafiya.

¹³ Baɗ ti kẽh ma na, aru kini ng'asi pas ngi mipriki, hã sesẽŋ a Gat-Hefer, a Et-Kasiŋ, ara bi a Rimoŋ, waɗ a guno nga Neya.

¹⁴ Kini tir vay muŋ na, maakway a guno Hanatoŋ, waɗ ara kiɗ mi ar hurjijiŋ ngi Ifta-El.

¹⁵ Hirwuyo walahay madiɗahay anga kuruˀ nga cuw, waɗ prok taŋhaya wãˀ wãˀ ma. I walahay Katat, Nahalal, Simroŋ, Idala waɗ Betelyem.

¹⁶ Hana i hirwuy muvulaka da sukwi ngi Zabuloŋ, vur muyo vur muyo. I walahay tayna waɗ prok taŋhaya wãˀ wãˀ ma.

Hirwuy ngi Isakar

¹⁷ Ceregezleŋ mumufaɗ naŋ a diɗ ar sukwi ngi Isakar. A vulaka taŋ hirwuyo vur muyo vur muyo.

¹⁸ Maakway ngi hirwuy taŋ a bi kini ngir ti Zisreyel, Kesulot, Sunem,

¹⁹ Hafarayim, Siyoŋ, Anaharat,

²⁰ Rabit, Kisiyoŋ, Ebes,

²¹ Remet, En-Ganim, En-Hada waɗ Bet-Pases.

²² Maakway aru meh meh avu Tabor, Kasayim, Bet-Semes waɗ ara kiɗ mi a mi mizaw Zurdeŋ. Jom gar na, walahay madiɗahay anga kuruˀ nga merkeɗe, jom ti prok taŋhaya wãˀ wãˀ.

²³ Hana i hirwuy muvulaka da sukwi ngi Isakar, vur muyo vur muyo, walahay madiɗa tayna jom ti prok taŋhaya wãˀwãˀ.

Hirwuy ngi Aser

²⁴ Ceregezleŋ muzlum naŋ a diɗ ar sukwi ngi Aser. A vulaka taŋ hirwuyo vur muyo vur muyo.

²⁵ Maakway taŋ a bi ti hirwuy Helkat, Hali, Beteŋ, Akesaf,

²⁶ Alamelek, Amat waɗ Mikal. Tisi pas ngi pastaˀa, maakway aru ngbasl avu muwã Karmel waɗ sipeˀe Sihor-Lipnat.

²⁷ Tisi pas ngi miprike, maakway a gun kini ngir ti Bet-Dagoŋ, meh meh avu hirwuy Zabuloŋ waɗ avu hurjijiŋ ngi Ifta-El. Akẽh na, a bi kini tir vay muŋ ngi Bet-Emek ati Neˀiyel, a muruɗ kini tir vay ngi Kabul,

²⁸ ngir ti Abdoŋ, Rehop, Hamoŋ ati Kana, waɗ ara kiɗ mi a Sidoŋ, walahay madiɗaŋ.

²⁹ A mbiɗi gunno ngir ti Rama waɗ ng'ar matura ngi Tir muguno ti mohol. Akẽh na, a jik jik ngir ti Hosa, ng'ar mubuliy Mediterane, ara kiɗ mi a Mahalep, Aksip,

³⁰ Um, Afek waɗ Rehop. Jom gar na, walahay madiɗahay kukur cuw nga cuw, jom ti prok taŋhaya wãˀ wãˀ ma.

³¹ Hana i hirwuy muvulaka da sukwi ngi Aser, vur muyo vur muyo, i walahay tayna jom ti prok taŋhaya wãˀ wãˀ.

Hirwuy ngi Neftali

³² Ceregezleŋ mimerkeɗ naŋ a diɗ ar sukwi ngi Neftali. A vulaka taŋ hirwuyo vur muyo vur muyo.

³³ Maakway ngi hirwuy taŋ tir vay ruwuyo, a zli zle a Halef, waɗ zle avu widis madida ngi Saˀananim. A cuh bal ti Adami-Nekep, waɗ a Yaɓneyel, hã sesẽŋ a Lakum, waɗ ara kiɗ mi a mizaw Zurdeŋ.

³⁴ Tisi pas ngi pastaˀa, maakway a gun gunno ngir ti Azinot -Tabor, aru ti kẽh ngbasl a Hukok, tir vay ruwuyo, naŋ meh meh avu hirwuy Zabuloŋ, waɗ hirwuy Aser tisi pas ngi pastaˀ naŋ. Tisi pas ngi miprike, maakwaya ti Yehuda a mizaw Zurdeŋ.

³⁵ Walahayay muguno hirnga taŋhaya le ti mohol ani: Sidim, Ser, Hamat, Rakat, Kineret,

³⁶ Adama, Rama, Hasor,

³⁷ Kedes, Edreyi, En-Hasor,

³⁸ Iroŋ, Migdal-El, Horem, Bet-Anat waɗ Bet-Semek. Jom gar na, walahay madiɗahay kuruˀ nga ngoltir, jom ti prok taŋhaya wãˀ wãˀ ma.

³⁹ Hana i hirwuy muvulaka da sukwi ngi Neftali, vur muyo vur muyo, i walahay tayna jom ti prok taŋhaya wãˀ wãˀ.

Hirwuy ngi Daŋ

⁴⁰ Ceregezleŋ mitarnaˀ naŋ a diɗ ar sukwi ngi Daŋ. A vulaka taŋ hirwuyo vur muyo vur muyo.

⁴¹ Maakway ngi hirwuy taŋhaya i walahayay ani: Sora, Esetaˀol, Ir-Semes,

⁴² Saˀalabiŋ, Ayaloŋ, Itla,

⁴³ Eloŋ, Timna, Ekroŋ,

⁴⁴ Elteke, Gibetoŋ, Baˀalat,

⁴⁵ Yehut, Bene-Berak, Gat-Rimoŋ,

⁴⁶ mi yam Yarkoŋ, Rakoŋ, ati li mugun gun a ciki Zafa.

⁴⁷ Mizli a tiɓaka hirwuyo le avu sukwi ngi Daŋ. Akẽh na, a bam, ara gam vurum ati hirwuy Lesem. A tiɓaka hirwuyo le avu mizli Lesemeye. A kiɗaka mizli ngisi ruwuy tayna vagay vagay ti maslalam, a pam angi hirwuy taŋ. Taŋ mipam anga tuwa na, a zilaka hirwuy nah vuna Daŋ. Daŋ ti slimiɗ ngi dideˀ taŋ zleˀe.

⁴⁸ Hana i hirwuy muvulaka da sukwi ngi Daŋ, vur muyo vur muyo, i walahay tayna jom ti prok taŋhaya wãˀ wãˀ.

⁴⁹ Israyeley a kiɗaka mi ngi wuɗuka hirwuyo le ar wala taŋ, ti maakway taŋ ti maakway taŋ. Zozuwe, mangal ngi Nuno, Israyeley a vulakaŋ hirwuyo le a wuzla nga taŋhaya.

⁵⁰ A vulam da Zozuwe i walahay Timnat-Sera, angi hirwuy muwã Efrayim. Zozuwe a cufuɗa le zleˀe ɓa a vulakaŋ di. A gi le kaslsla kaɓa Bumbulvuŋ miɓa ɗaˀ le. Dar Zozuwe a mahiri ngi ndira walahaya, a cifi anga.

⁵¹ Masay Elazar ati Zozuwe, mangal ngi Nun waɗ buy ngi hayay ngi wuzla sukwi Israyeleye, a wuɗkaka hirwuyo da mizli ti gi ceregezleŋ. A gaka ceregezleŋ a Silo a mbuŋ Bumbulvuŋ, a mizlingre guɗuk. Naŋ kahana, Israyeley mikiɗaka mi ngi wuɗuka hirwuy Kanaˀan ar wala taŋ.