ZOZUWE 17 - Bible en langue guiziga

¹ Manase i modogom ngi Zozef, Makire kwana, i modogom ngi Manase ya, i cine ngi Galaˀat, muwuɗkaka hirwuy na, a lumam mi nga taŋ i vay Galaˀat ati Basaŋ. Asi mike na, Makire, i mbur ngi vurum.

² Dideˀ ngi Manase mekelemeye, li taŋ mulumam vur muyo vur muyo na, i muy ngi Abiyezerey, ngi helekey, ngi Asriyeley, ngi Sekemey, ngi Heferey waɗ ngi Semidahay. Hanayna i dideˀ ngi Manasehey cek vur muyo vur muyo Manase, mangal ngi Zozef.

³ Selofat, mangal ngi Hefer, dideˀ ngi Galaˀat, Galaˀat i mangal ngi Makir, yo Selofat vuna i dideˀ ngi poprok ngi Manase ma. Naŋ a yi ziri mizilehey ta, sey ziri mongosohoy si. Ziri mongoso tayna slimiɗ taŋhay ani: Mala, Noa, Hogla, Milka waɗ Tirsa.

⁴ Ziri mongoso tayna a soko ng'avu masay Elazar, ng'avu Zozuwe, mangal ngi Nun waɗ ng'avu buyɓi ngi wuzla mizli, a ɓaka taŋ na: «Bumbulvuŋ a ɓa Moyise le ɗaˀ le, ɓa a vula ndra hirwuy mi ngi ndra a wuzla ngi sukum ndra mizileheye ya.» Dar a vulaka taŋ mi nga taŋ a wuzla jamba taŋhaya, kaɓa Bumbulvuŋ miɓa ɗaˀ le tuwa.

⁵ Naŋ kine, dideˀ ngi Manaseheye, a lumam hirwuy mi nga taŋ le taˀ taˀ kuruˀu, jom ng'avu Galaˀat ati Basaŋ misi a dubazaw Zurdeŋ na ma.

⁶ Naŋ kanah ma, angi sukwi ngi Manase na, ko ziri mongosohoy kwana, a lumam hirwuy mi nga taŋ le a wuzla ziri mizileheye ya. Amma hirwuy Galaˀata, i ngi dideˀ mekelemey ngi Manase ɓula.

⁷ Maakway ngi Manase a zli zle angi hirwuy ngi Aser hã a Mikmeta, misek duba cakay ati Sikem, tisi pas ngi miprik naŋ, a jik jik ti Mikmeta nga Yamin, hã a hay mizli En-Tapuwahay.

⁸ Hirwuy Tapuwa i ngi Manase, amma walahay naŋ misi angi maakwaya, i ngi mizli ngi Efrayimey ɓula.

⁹ Maakway a jik jik kini nga mizaw Kana, kini tir vay ruwuy naŋ. Walahay tayna misi a wuzla walahay ngi Manasehey na, i ngi mizli ngi Efrayimey. Maakway ngi mizli ngi Manaseheye, tir vay muŋ ngi mizaw, waɗ ara kiɗ mi a mi mubuliy.

¹⁰ Naŋ kine, sukwi ngi Efrayime, naŋ tir vay ruwuy, yo ngi Manase kwana, naŋ tir vay muŋ naŋ. Maakway taŋ, i mubuliy miɓaˀ ar wala. Tisi pas ngi pastaˀa, i sukwi ngi Aser. Yo tisi pas ngi miprik naŋ kwana, i sukwi ngi Isakar.

¹¹ Angi hirwuy ngi Isakar ati ngi Asere, Manase a lum mi nga naŋ angi taŋ, i walahayay Bet-Seyaŋ ati Ibleyam, jom ati prok ngi ciki taŋhaya wãˀ wãˀ. Yo waɗ walahay Dor, En-Dor, Taˀanak, Megido, jom ti mizli ngir taŋhaya wãˀ wãˀ, waɗ prok taŋhaya wãˀ wãˀ ma, mbiɗeˀvra, prokoy walahay Dor ngir li micay miwa miwa gar.

¹² Amma so na, walahay tayna gar na, dideˀ ngi Manasehey a tiɓaka taŋ da taŋ gu ta. Kanaˀanay a cicam kaŋ kaŋ, sey ɓa a cifam ar walahay tayna.

¹³ Ko ti Israyeley mitiram gidaŋ haɗa na tekeɗe kwana, a ɓulaka taŋ avra gu ta na si. Amma sey a tikakaˀay da Kanaˀanaya, ɓa a gam slra mitakˀay ɓula.

¹⁴ Akẽh na, dideˀ ngi Zozefey a soko ng'avu Zozuwe, a ɓakaŋ na: «Ani ndra na, Bumbulvuŋ a ɗuwula ndra mi le. Vurˀe, ndra ani haɗa teˀe. Na ki sla ndra hirwuyo da ndra purla tewle si mbrike?»

¹⁵ Zozuwe a mbiɗa taŋ di: «Ki puraka na, kum haɗa teˀe, yo hirwuy vay muwã Efrayim a ndilukum ngi cife ta. Da kine na, ngam hirnga kini nga wuzlaɓuh, ɓa ki ra slam li angi hirwuy ngi Perizihey ati ngi Refay na, da kum ava.»

¹⁶ Dideˀ ngi Zozefey tuwa, a mbiɗakaŋ di: «Naŋ kanah, hirwuy muwã na, a ndila ndra ta gisiŋ gwat naŋ. Na ma na, mizli Kanaˀan ngir li micay vuna, taŋ ti mota ngi vurum ngi ɓirihey. Yo Kanaˀan ngi Bet-Seyaŋhay ati ngi prok taŋhay waɗ mekelemey ngir li micay ngi Zisreyel gar na, kanah ma.»

¹⁷ Dar Zozuwe a ɓa mizli ngi wazlaray Zozefey, ti Efrayimey ati Manaseheye: «Kum i sukwi madiɗa, yo sukwi migidaŋ ma. Anja a slukum da kum i li taˀ purla tewle si ta.

¹⁸ Amma hirwuy vay muwã, misi widisey ara ngiriɗ tekeɗe kwana, a sa slukum da kum i nah, kisa ngumaka. Kanaˀanaya, ko ti mota ngi vurum taŋ ngi ɓirihey ati gidaŋ taŋ mihaɗa na gar kwana, kisa ɓulaka taŋ gu na si.»