ZOZUWE 16 - Bible en langue guiziga

Hirwuy ngi Efrayim ati ngi Manase

¹ Hirwuy ngi dideˀ ngi Zozefeye, a zlo zle a mizaw Zurdeŋ migweˀ a ciki Zeriko, tisi pas ngi miprik ngi miyam Zeriko, i wuzlaɓuh mikirɗak kirɗak majiɗ zle a Zeriko ngir ti muwã Betel.

² Jek naŋ, zle a Betele kini nga Luz. A ra bi ar maakway ngi Atarot, walahay ngi mizli Arkihey.

³ Tisi pas ngi pastaˀa, maakway a jik jik kini ng'ar maakway ngi mizli Yaflehey, hã sesẽŋ a Bet-Horoŋ-muzugudum, yo sesẽŋ a Gezer, waɗ ara kiɗ mi a mi mubuliy.

⁴ Manase ati Efrayime, i ziri ngi Zozefey. Hirwuy muvulaka taŋ mi nga taŋ, naŋ kahana.

⁵ Dideˀ ngi Efrayimeye, hirwuy mislaka taŋ di vur muyo vur muyo anihĩ: Tisi pas ngi miprike, maakway taŋ a zli zle avu walahay Atrot-Adar, hã sesẽŋ a Bet-Horoŋ vay Muŋ.

⁶ Tisi pas ngi pastaˀa, jek ngi maakwaya, naŋ kini nga Mikmeta, tir vay muŋ. Yo a guno gunno ng'asi pas ngi miprike nga Taˀanat-Silo, a tuwuɗ tisi pas ngi miprike nga Yanoˀa.

⁷ Akẽh na, a pi sar ti Yanoˀa nga Atarot ati Naˀara, a ndil a Zeriko, waɗ ara kiɗo mi a mizaw Zurdeŋ.

⁸ Maakway a bi baɗ ti Tapuwa kini nga mizaw Kana tisi pas ngi pastaˀa, waɗ ara kiɗ mi a mi mubuliy Meditarane. Hirwuy muvulaka da dideˀ ngi Efrayimey vur muyo vur muyo naŋ kahana.

⁹ Mbak walahayay mihĩˀĩ ngi dideˀ ngi Efrayimey, misi a wuzla hirwuy ngi dideˀ ngi Manasehey na le na, walahay tayna jom ti prok taŋhaya, i muvula taŋ di le ma.

¹⁰ Amma Kanaˀanay misi a Gezer na, mizli ngi Efrayimey a ɓulaka taŋ ta. Vurˀe, Kanaˀanaya t'ada a wuzla dideˀ ngi Efrayimeye hã dana aruŋ. Amma so na, dideˀ ngi Efrayimeye, a vulaka taŋ slra ngi gi sey mitakˀay le ɓula.