ZOZUWE 14 - Bible en langue guiziga

Wuɗuka hirwuy Kanaˀan

¹ Hana i ɓi ngi wuɗuka li da Israyeley angi hirwuy Kanaˀan. Masay Elazar, Zozuwe, mangal ngi Nun, waɗ buy ngi hayay ngi wuzla sukwi srayeley miwal wal na, i taŋ muwuɗkaka taŋ di.

² Wuɗuka hirwuy da sukwi mungoltir ti reta na, a vulaka ngi mburo gar ti gi ceregezleŋ, kaɓa Bumbulvuŋ miɓa taŋ di ɗaˀ le ti balam Moyis tuwa.

³ Asi sukwihey mucuw ti reta na, Moyis a vula taŋ hirwuyo le zleˀe a dubazaw Zurdeŋ si. Amma leviheye, Moyis a vula taŋ hirwuy a wuzla sukum taŋ mekelemeye ta.

⁴ Naŋ migi kahana na, asi sukwi a gi le cuw a wuzla ziri ngi Zozefeye, ngi Manase ati ngi Efrayim. Vurˀe, a vulaka li da leviheye neˀ le asi ruwuyo ta, sey a vulaka taŋ walahayay ngi cifi taŋ anga ati li ngi jigina ginew taŋhay waɗ li pi zlili taŋhay tewle si.

⁵ Israyeley a wuɗkaka hirwuyo kaɓa Bumbulvuŋ mawuɗ, miɓa da Moyis zleˀe tuwa.

⁶ Ngi hin numuŋ ada na, dideˀ ngi Zudahay a soko lumaka Zozuwe a Gilgal. Kalep, mangal ngi Yefune, mbur Kenas, a ɓa Zozuwe na: «Cina ayɗi, Moyis mbur ngi Bumbulvuŋ Buymisemuŋ, miɓaŋ vur ndra ati ka, a Kades-Barneya na, ki si na le kuy kuy.

⁷ Moyis, gawla ngi Bumbulvuŋ misliniy zleˀe baɗ ti Kades-Barneya nga pura hirwuy na, naɓa ya ti vi kukur mufaɗa. Amma yi so slufaŋ ɓi nah le kasl kasl wãˀ.

⁸ Sukum ɗuwoy, ndra miram bummoˀ na, a hurɓoko mizli Israyeleye le huroɓ huroɓ. Amma ya, yi biga gi teŋteŋ ɗu le da Bumbulvuŋ, Buymisemuŋ ɗu.

⁹ Tapas nah na, Moyis a hudum a mbuŋ ɗu, a ɓi: ‹Hadam, hirwuy ka muɗuva sar ɗik le taˀ anga gar na, a sa ndir da ka waɗ da dideˀ ɗikey. Asi ki biga gi teŋteŋ ɗike le da Bumbulvuŋ, Buymisemuŋ ɗu.›

¹⁰ Ani wurenna, zle avu Bumbulvuŋ miɓa mingiɓi hana da Moyis, ti di Israyeley mingiroko jiviɗ ngi wuzlaɓuh mikirɗak kirɗak na, a gi ti ya le ani, vi kukur mufaɗ nga zlum, kaɓa naŋ miɓa. Ani ya dana ti vi kukur dangafaɗ nga zlum.

¹¹ Y'ada dana gidaŋ gidaŋ aruŋ, kaɓa ya misi zleˀe, ti Moyis masliniy ng'ar slra na. Gidaŋ ɗu misi wurenna, naŋ kaɓa misi zleˀe, ya magi di vurum malla gwat mekelemey gar na.

¹² Yi wuɗ wurenna so na, ɓa ki vuliy hirwuy vay muwã hana kaɓa Bumbulvuŋ miɓiy di tapasa na. Ti di nah, ki cine le kuy kuy, misi angi hirwuy vay muwã tayna, i mizli Anakay ati walahay madiɗa mugunohoy le gun gun ti mohol. Asinta, da Bumbulvuŋ naŋ da ati ya na, yi sa ɓula mizli tayna avra kaɓa Bumbulvuŋ miɓiy di ɗaˀ ɗaˀ le na.»

¹³ Akẽh na, Zozuwe a ɗuwula mi da Kalep, mangal ngi Yefune. Dar a vulaŋ walahay Hebroŋ da naŋ.

¹⁴ Vurˀe, Kalep, mangal ngi Yefune, mbur Kenas, a lum hirwuy nga naŋ i Hebroŋ hã dana. Asi a biga gi teŋteŋ naŋ le da Bumbulvuŋ Buymisemuŋ ngi Israyele.

¹⁵ Zleˀe na, a zilaka Hebroŋ vuna Kiryat-Arba. Arba i slimiɗ ngi mbur madiɗa a wuzla mizli Anakay. A dirba nah na, mizli a cifam zuy zuy asi ruwuyo ko vurum anta mata.