ZOZUWE 11 - Bible en langue guiziga

Kiɗavu a Merom

¹ Dambalaka Yabin, buy madiɗa ngi Hasoro, a cine ɓi ngi Zozuwe mulum bugawla na le, a slin mizli ng'avu Yobap, buy madiɗa ngi Madoŋ, ng'avu buy Simroŋ waɗ ng'avu buy Akesaf.

² Waɗ ma na, a slin ng'avu buy madiɗa vay muwãhay, mikini tir vay muŋ, nga Araba mikini tir vay ruwuy ngi Kinerot, nga ruwuy misi ar zugudum, waɗ ng'ar li micay ngi Dor mikini tisi pas ngi pastaˀ.

³ Yo ng'avi mizli Kanaˀanay, misi tisi pas ngi miprik waɗ tisi pas ngi pastaˀa, mizli Amorihey, Hitihey, Perizihey waɗ Zebusihey misi tir vay muwã, mizli Hivihey misi a sarmuwã Hermoŋ, angi hirwuy Mispa.

⁴ Buy ngisi ruwuy tayna tuwa, jom ti soje taŋhaya gar, a bam hiɗim hiɗim. I mizli haɗi teˀe, a sluf ta, kaɓa muyuŋ a mi mubuliy, waɗ misi pilisey ati mota ngi vurumoy haɗi.

⁵ Buy tayna gar, a wam haŋ, ara zliram, ara pam sar gar taŋ arleˀe a mi yam Merom, ɓa a zlam kiɗa vu ati Israyeleye.

⁶ Bumbulvuŋ a ɓa Zozuwe na: «Ko ki zluwun ti taŋ ta, asi tiprik hã pas kahana na, naɓa yi vula taŋ le asi haŋ ngi Israyeley, a kiɗaka taŋ le gar si. Ki sa buko zlambarkataw ngi pilis taŋhaya, yo kisa wura mota taŋhay ngi vurumo.»

⁷ Zozuwe ati mizli naŋ ngi vurumoyo gar, ara lumaka taŋ gurjik a mi yam Meromo, a ndilam vu kpis ar taŋ.

⁸ Bumbulvuŋ a vula taŋ asi haŋ ngi Israyeleye. Israyeley a kiɗaka taŋ, hã a sipaka taŋ sesẽŋ a Sidoŋ, walahay madiɗa, sesẽŋ a Misrefot-Mayim, waɗ sesẽŋ ar sozo ngi Mispe, kini tisi pas ngi mipriki. A ngizlaka taŋ kap kap ngi ga dudok da Bumbulvuŋ, ko a pulam mbur pal le ti siifa ta.

⁹ Zozuwe a ga kaɓa Bumbulvuŋ miɓaŋ di tuwa: a buko zlambarkataw ngi piliseye, waɗ a wura mota taŋ ngi vurumoyo.

Zuma walahay Hasor

¹⁰ Ti di nah na, Zozuwe a so tiɓa walahay Hasoro, a kiɗa buy madiɗa ngi raˀa ti maslalam. Naŋ kine, zleˀe na, walahay Hasor i walahay hirnga ngi li zumabuy vay tayna gar.

¹¹ A kiɗaka mizli ngir walahay nah gar ti maslalam, a ngizlaka taŋ kap kap ngi ga dudok da Bumbulvuŋ. Ko gwat misi titirihey loŋ a pulam ti siifa ta. Waɗ a wuraka walahaya zlizlar zlizlar.

¹² Walahay ngi buy tayna gar na, Zozuwe a tiɓa taŋ le, waɗ a kiɗa buy ati mizli ngi raˀahaya gar ti maslalam. A ngizla taŋ le pay kaɓa Moyis, gawla ngi Bumbulvuŋ miɓa ɗaˀ le tuwa.

¹³ Amma so na, walahay ngir li miɗingir ɗingirey gar na, ko Israyeley a wuram purla le asi taŋ ta, sey walahay Hasor pal naŋ, Zozuwe muwura na si.

¹⁴ Zlili ati ginew ngir walahay tayna gar na, Israyeley a hilaka taŋ da taŋ kaɓa gwat ngi lum ngi vurum. Amma mbur titira gar na, a kiɗaka ti maslalam, hã a ngizlaka taŋ kap kap wãˀ ɓula. Ko gwat misi titiri pal a pulam ti siifa ta.

¹⁵ Gwat tayna gar a gam na, asi Bumbulvuŋ miɓa ɗaˀ le da gawla naŋ Moyis, yo Moyis kwana miɓa ɗaˀ le da Zozuwe, Zozuwe a sipa le kasl kasl. Ɓi Bumbulvuŋ muɗuva da Moyis gar na, ko Zozuwe a hizig purla le avra ta.

Zozuwe mikiɗa mi ngi tiɓa hirwuy Kanaˀan

¹⁶ Naŋ kine, Zozuwe a tiɓa hirwuyoyo le gar: hirwuy vay muwã, vay ruwuy gar, hirwuy Goseŋ gar, hirwuy ngir zugudumoy, sozo Zurdeŋ ati hirwuy muwã Israyeley waɗ hirwuy ngir zugudum naŋhaya.

¹⁷ Buy ngir lihey misi ar wala muwã Halak, sipeˀe ngir tivi Seˀir, hã sesẽŋ a Baˀal-Gat angi sozo Libaŋ, a sar muwã Hermoŋ, Zozuwe a ja taŋ, a kiɗa taŋ vagay vagay.

¹⁸ Zozuwe a zik le ar li gi vurum ati buy tayna gar.

¹⁹ Mbak Hivihey misi angi hirwuy Gabaˀoŋ na le na, ko hirwuy mekelem mislam ˀay kiri ati Israyeley na, anta mata. Walahay mekelemey gar na, Israyeley a tiɓaka taŋ le ti vurum.

²⁰ Asi mike na, Bumbulvuŋ a juwa le a mevele, ɓa hirnga ngi mizli tayna a tiri gidaŋ. A ga kanah na, ɓa Israyeley a ngizlaka taŋ kuɗup, manja ircece, yo ɓa a ngizlaka taŋ, kaɓa Bumbulvuŋ miɓa ɗaˀ le da Moyis tuwa.

²¹ Ti di nah na, Zozuwe a kiɗa mizli Anak ngi muwãhaya, ngi Hebroŋhoy, ngi Debirey, ngi Anapay ati ngi muwã Zudahay gar waɗ ngi muwã Israyeley gar. Zozuwe a ngizla taŋ kap jom ati walahay taŋhaya wãˀ wãˀ.

²² Asi ruwuy Israyele, ko mbur Anak mindir purla tekeɗe anta mata. Amma a Gaza, a Gat waɗ a Asdot na, a ndiram le purla purla ɓula.

²³ Zozuwe a tiɓa hirwuyoyo le kasl kasl kaɓa Bumbulvuŋ miɓa zleˀe ɗaˀ le da Moyise. Akẽh na, a vula da Israyeleye, a wuɗuka taŋ di vur sukwi vur sukwi. A dirba nah, mizli a musukam vu muduba, ko vurum anta mata.