ZLI VIRZI 2 - Bible en langue guiziga

¹ Buymisemuŋ mikiɗa mi ngi gi muŋ, hirwuy waɗ gwat ngi raˀahay gar na, naŋ kahana.

² A dirba Buymisemuŋ mikiɗa mi ngi slra naŋ gar na, a gi slra ar hin mitarnaˀ naŋ mata.

³ A ɗuwula mi da hin nah, i hin nga naŋ. Asi angi hin nah na, a gi gwat mata.

⁴ Ɓi ngi zli virzi ngi muŋ ati hirwuyo, ti di Bumbulvuŋ miga taŋ na, naŋ kahana so. Tapas Bumbulvuŋ Buymisemuŋ miga muŋ ati hirwuy na,

Buymisemuŋ migi guva ngi widis a Eden

⁵ naɓa siziɓ anta aruŋ, yo ko giziŋ mupusa a ruwuyo, anta aruŋ. Asi Bumbulvuŋ Buymisemuŋ a go vuŋ t'aruŋ, mbur titra anta ngi huva li t'aruŋ.

⁶ Amma sey yam ada bawa vilvil ti ngi miviɗiviɗi naŋ ti ruwuyo, a hira hirwuy micay na gar.

⁷ Bumbulvuŋ, Buymisemuŋ a hil murɓuk ngi ruwuy, a ndir di mbur titra, dar a ˀufoŋ musuwun ngi siifa nga hutuŋ, joˀ mbur tuwa, a tiri naŋ ti siifa.

⁸ A dirba nah, Bumbulvuŋ Buymisemuŋ a ɗuv guva ngi widis a ruwuy Eden, kini tisi pas ngi mipriki, ɓa a cufa mbur naŋ mindira tuwa angaŋ.

⁹ Bumbulvuŋ Buymisemuŋ a puso sukwi ngi widis mukuy ngi pur misi yi taŋhaya ndum ngi zum. A ngi widis mavul siifa kaˀ a hur guva waɗ widis mavul si na mezle ati malambaˀa.

¹⁰ Mizaw a bo tir miviɗiviɗi naŋ angi hirwuy Eden, a ɓul ng'ar guva tuwa. A wunkawa baɗ a diga mizaw wal wal mufaɗa.

¹¹ Mizaw mudumbuŋ a zilaka Pisoŋ, a guno hirnga ngi hirwuy Havila gun, ɓiri tapasl tapasl ada haɗi a diga,

¹² Ɓiri tapasl tapasl ngi diga naŋ mezleŋ, waɗ mukuturɓuy mazĩˀĩ ndum ati ɗugur mupuɗaw kakayak kakayaka.

¹³ Mizaw mucuw naŋ a zilaka Gihoŋ, muguno hirwuy Etiyopi gun i nah.

¹⁴ Mizaw mimakir naŋ a zilaka Tigre, a ɓul kini tisi pas ngi miprik ngi walahay madiɗa mazilaka Asur. Mizaw mumufaɗ naŋ i Efrat.

¹⁵ Bumbulvuŋ Buymisemuŋ a zuɓa mbur tuwa, a cifaŋ a hur guva ngi Eden ɓa a huvaŋ, yo ɓa a jiginaŋ.

¹⁶ Bumbulvuŋ Buymisemuŋ a ɓaŋ ɗaˀ le: «Ko widis wana gar misi ar guva na, ki zuma yi naŋ kaɓa ka mawuɗo,

¹⁷ amma widis ngi si na mezleŋ ati malambaˀ na, ki zumata ɓula, asi tapas ka misa zuma le na, kisa mucu.»

¹⁸ Bumbulvuŋ Buymisemuŋ a ɓi a kwacay naŋ na: «Ɓa mbur a ndir pal naŋ na, kuy ta. I sa gaŋ mijini naŋ, mizlir le kaslsla ava.»

¹⁹ Bumbulvuŋ Buymisemuŋ a ndira gwat misi titiri ngi ɓuhoyo gar ati ɗiyuwoy gar ti hohoy, a so taŋ da mburo, ɓa a pura, da a sa ca taŋ slimiɗe mbrike na. Gwat misãmi gar a lum slimiɗ mbur micaŋ di.

²⁰ Dar mbur a ca slimiɗ da gineweye gar, da ɗiyuwoy gar waɗ gwat misi titiri ngi ɓuhoy gar. Amma naŋ vuna, mijini naŋ, a lum ta.

²¹ Akẽh na, Bumbulvuŋ Buymisemuŋ a ka hinje da mbur tuwa buɗisl wãˀ. A muɗ cakay ngi mbur tuwa pal, dar a tiɗa meficeke ng'ar li naŋ a muŋ.

²² Bumbulvuŋ Buymisemuŋ a gi ngwas ti cakay tuwa, araŋ di.

²³ Mbur tuwa mupura ngwasa keɗ na, a til mi, a ɓi na: «Yawwa! Pura, hana i tesl ngi wuzla tesl ɗuwoy, yo i meficek ngi vi meficek ɗu. A sa zilaka ngwasa, asi a boko di ti vu mbur mizileŋ.»

²⁴ Vurˀe, mbur mizile a sa pula cine ati mumuŋ, ɓa a jumom ati ngwas naŋ, a sa tiram dumvu purla.

²⁵ Zil ati ngwas naŋ, taŋ cuw taŋ gulndiŋ gulndiŋ kine, ko mbur magi mesem ti cil naŋ anta.