ZLI VIRZI 16 - Bible en langue guiziga

Abram miya Ismayel ti Agar

¹ Saray ngwas ngi Abram a yaŋ zuŋ ta. Amma naŋ da ti ngwas beke naŋ, i zuŋ Ezipte, a zilaka Agar.

² Saray a ɓa zil naŋ Abrama na: «Ani Bumbulvuŋ a giy le, i yi ta. A ra hin a vi ngwas beke ɗu na so, asinta i sa lum mangal mizile mbele naŋ kwani.» Abram a tiɓa mingiɓi ngi Saraya le.

³ Saray a vula beke naŋ Agar, zuŋ Ezipte tuwa da Abram ɓa a gi di ngwasa. Naɓa Abram a gi le vi kuruˀ angi hirwuy ngi Kanaˀanaya si.

⁴ Abram a gi ngwas ti Agara, Agara a gi hur. A dirba Agar mupura naŋ ti hur tuwa na, a zla a pura vu naŋ ɗongor avu madiɗa naŋ Saraya.

⁵ Akẽh na, Saray a ɓa Abrama: «Mazikiy hana gar na, zayɓi naŋ, naŋ a hirnga ɗiki. Muvuluw beke ɗu da ka, i ya ngbaŋ, amma diga naŋ mupura naŋ ti hur na, a pura vu naŋ ɗongor avu ya madiɗa naŋ Saraya. Da mikaslsla ar wala ndra ati ka i waka na, anja Bumbulvuŋ a biga ndra di!»

⁶ Abram a mbiɗa da Saraya: «I beke ɗiki, i ka miwaŋ. Gi di kaɓa ka mawuɗo.» Dar Saray a zla ga bonoy da Agara haɗi, hã Agar a kil sindik.

⁷ Modro ngi Bumbulvuŋ a lumaŋ, naŋ gweˀ avu miviɗiviɗi ngi yam a wuzlaɓuh mikirɗak kirɗak, gweˀ avu bohol ngi ru nga Sur,

⁸ dar a cufuɗaŋ: «Agar beke ngi Saray, ki so ti damaka? Ki ru nga maka?» Agar a mbiɗaŋ di: «I kil ti kil tivi madiɗa ɗu Saraya.»

⁹ Modro ngi Bumbulvuŋ a ɓaŋ: «Mi ng'avi madiɗa ɗik a muŋ, hin hirnga a mbuŋ naŋ.»

¹⁰ A ɓaŋ ma na: «I sa ga ɓa dideˀ ɗikey a yam haɗi, ko mbur masa slufa taŋ gu anta.»

¹¹ Ani ka ti hur, kisa yi mangal mizile, kisa caŋ slimiɗe Ismayel, asi Bumbulvuŋ a cine tuwuy ngi bonoy ɗike le.

¹² Mangal ɗik a sa tiri kaɓa zungu masirik ta. A sa kiɗ vu ati mizli gar, yo mizli gar a sa kiɗam vu ati naŋ. Naŋ a sa cifi baˀ pal naŋ avu sukum naŋhay gar.

¹³ Agar a ca slimiɗ da Bumbulvuŋ miɓaŋ ɓi zleˀe tuwa, «Elroy, Buymisemuŋ mupur ɗu.» Asi a ɓi ti kwacay naŋ zleˀe na: «Ya mupur akaka na, i ka Buymisemuŋ mupur ɗu na gisiŋ kwa?»

¹⁴ Vurˀe, vigiɗ ngi yam misi ar wala ngi Kades ati Beret na, a zilaka vigiɗ ngi yam ngi mbur misi ti siifa mapuriy.

¹⁵ Agar a ya mangal mizile da Abrama. Cine naŋ Abrama a caŋ slimiɗe Ismayel.

¹⁶ Ti Agar miya Ismayel na, naɓa Abrama naŋ ti vi kukur dangafaɗ nga merkeɗ.